កម្ពុជាពង្រឹងការធ្វើពាណិជ្ជកម្ម និងវិនិយោគជាមួយអាម៉េរិក ក្នុងបរិការណ៍កំពុងផ្លាស់ប្តូរ

កម្ពុជារៀបចំវេទិកា ស្ដីពីការវិនិយោគនិងការធ្វើពាណិជ្ជកម្មជាមួយសហរដ្ឋអាម៉េរិក ដើម្បីពង្រឹងនិងពង្រីកពាណិជ្ជកម្ម និងវិនិយោគ ជាមួយសហរដ្ឋអាម៉េរិក នឹងការដោះស្រាយបញ្ហាប្រឈមនានា នៅក្នុងបរិការណ៍នៃការផ្លាស់ប្តូរឥតឈប់ឈរ នៃបរិយាកាសពាណិជ្ជកម្ម ពិភពលោកនាពេលបច្ចុប្បន្ន។

ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅក្នុងវេទិកាស្ដីពី “ការវិនិយោគ និងការធ្វើពាណិជ្ជកម្មជាមួយសហរដ្ឋអាម៉េរិក”នៅថ្ងៃទី២ ខែតុលា ឆ្នាំ២០២៥នេះ, ឯកឧត្តមឧបនាយករដ្ឋមន្ត្រី បានរំលឹកពីសាវតា នៃការនាំចេញរបស់កម្ពុជាទៅកាន់ទីផ្សារសហរដ្ឋអាម៉េរិក តួលេខនៃការនាំចេញរបស់កម្ពុជាទៅកាន់ទីផ្សារសហរដ្ឋអាម៉េរិក និងសាវតា នៃកិច្ចសម្របសម្រួលទំនាក់ទំនងពាណិជ្ជកម្ម និងវិនិយោគទ្វេភាគីកម្ពុជា-សហរដ្ឋអាម៉េរិក ដែលបានធ្វើឡើងជាបន្តបន្ទាប់ ក្រោមការ ចង្អុលបង្ហាញដ៏ខ្ពង់ខ្ពស់ពី សម្តេចធិបតីនាយករដ្ឋមន្ត្រី។ ដោយជាលទ្ធផល រដ្ឋបាលសហរដ្ឋអាម៉េរិក បានបញ្ចុះអត្រាពន្ធបដិការមក លើកម្ពុជានៅត្រឹម ១៩% ដែលជាអត្រាមួយអនុញ្ញាតឱ្យកម្ពុជារក្សាបាននូវភាពប្រកួតប្រជែង ក្នុងការទាក់ទាញវិនិយោគ និងការនាំ ចេញទៅកាន់ទីផ្សារសហរដ្ឋអាម៉េរិក។

ឯកឧត្តមឧបនាយករដ្ឋមន្ត្រី បានគូសបញ្ជាក់អំពីសារសំខាន់នៃវេទិកានេះ ដែលត្រូវបានរៀបចំឡើង ក្នុងពេលវេលាដ៏សំខាន់ សម្រាប់អនាគតសេដ្ឋកិច្ចកម្ពុជា។ ឯកឧត្តម បានបន្ថែមថា តាមរយៈការសហការគ្នា រវាងភាគីពាក់ព័ន្ធទាំងអស់របស់រាជរដ្ឋាភិបាល និងផ្នែកឯកជន នឹងធានាបានថា កម្ពុជានៅតែរក្សាបាននូវអនុលោមភាពភាពប្រកួតប្រជែង និងភាពទាក់ទាញសម្រាប់វិនិយោគ និងពាណិជ្ជកម្ម។ ឯកឧត្តមឧបនាយករដ្ឋមន្ត្រី ក៏បានលើកទឹកចិត្តឱ្យមានការចូលរួមមតិដោយផុលផុស នៅក្នុងកិច្ចពិភាក្សានោះផង ដែរ ក៏ដូចជាបានបង្ហាញនូវសុទិដ្ឋិនិយមខ្ពស់ថា វេទិកានេះនឹងបញ្ចប់ទៅជាមួយនឹងគំនិតល្អៗ ក្នុងការថែរក្សាទីផ្សារ ការទាក់ទាញ វិនិយោគ និងការធ្វើពិពិធកម្មសេដ្ឋកិច្ចកម្ពុជាថែមមួយកម្រិតទៀត។

សូមបញ្ជាក់ថា នៅក្នុងរយៈពេល ៨ ខែ ឆ្នាំ២០២៥, ការធ្វើពាណិជ្ជកម្មទ្វេភាគីរវាងកម្ពុជា-អាម៉េរិក មានទំហំទឹកប្រាក់សរុបជាង ៨ ៥៥៥ លានដុល្លារដុល្លារអាម៉េរិក កើនឡើងជាង ២៣ ភាគរយ ក្នុងនោះការនាំចេញទំនិញរបស់កម្ពុជា ទៅកាន់ទីផ្សារសហរដ្ឋអាមេរិក មានទឹកប្រាក់ប្រមាណជាង ៨ ៣០០ លានដុល្លារអាម៉េរិក កើនឡើងជាង ២៣ ភាគរយ ខណៈការនាំចូលពីអាម៉េរិក មានទឹកប្រាក់ ជាង ២៤៣ លានដុល្លារអាម៉េរិក បានកើនឡើងជិត ៤០ ភាគរយ បើធៀបរយៈពេលដូចគ្នានិងឆ្នាំ២០២៤៕ អត្ថបទ៖ សុន រ៉ាឌី