សម្តេចតេជោ៖ មិត្តភាពកម្ពុជា-កូរ៉េ ជាប្រភព​នៃ​មោទនភាព​ដ៏ធំធេង​ហើយ​នឹង​ជំរុញ​ទំនាក់​ទំនង​នេះ​បន្ថែម​ទៀត​ ដើម្បី​ផលប្រយោជន៍ប្រទេសទាំងពីរ

សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី បានអះអាងថា មិត្តភាព​រវាង​ប្រទេស​កម្ពុជា​ និងសាធារណកូរ៉េ គឺជាប្រភពនៃមោទនភាពមួយដ៏ធំធេង ហើយសម្តេចរំពឹងថា ទំនាក់​ទំនង​របស់​ប្រទេស ទាំងពីរ​នឹង​កាន់​តែ​ល្អ​ប្រសើរ​បន្ថែម​ទៀត​ដើម្បី​ឧត្តម​ប្រយោជន៍​សម្រាប់​ប្រជាជន​ និងប្រទេសទាំងពីរ។

តាមរយៈសារលិខិតផ្ញើជូនដល់ឯកឧត្តម លី ជេម្យ៉ុង ប្រធានាធិបតីកូរ៉េ កាលពីថ្ងៃទី៣ ខែតុលា ឆ្នាំ ២០២៥​ម្សិល​មិញនេះ ក្នុងឱកាសទិវាបុណ្យបង្កើតជាតិ នៃសាធារណរដ្ឋកូរ៉េ សម្តេចតេជោ ហ៊ុន សែន បាន លើកឡើងថា ក្នុងនាមប្រជាជន ស្ថាប័ននីតិប្បញ្ញត្តិ និងនីតិប្រតិបត្តិ នៃ​ព្រះរា​ជា​ណា​ចក្រ​​កម្ពុជា ​និងក្នុងនាមសម្តេចផ្ទាល់ សម្តេចសូមចូល​រួមអបអរ​សាទរ​អស់​ពី​ដួង​ចិត្ត​ចំពោះ​ឯក​ឧត្តម​ ប្រធានាធិបតី រដ្ឋាភិបាល និងប្រជាជនជាទីរាប់អាននៃសាធារណរដ្ឋកូរ៉េ ក្នុង​ឱកាស​ដ៏​មាន​នក្ខត្ត​ឬក្ស​នៃ​ទិវាបុណ្យបង្កើតជាតិ នៃសាធារណរដ្ឋកូរ៉េ។

សម្តេចតេជោប្រមុខរដ្ឋស្តីទី បានលើកឡើងទៀតថាប្រទេសកម្ពុជា បានសង្កេតឃើញ និង​មាន​ការ​កោត​សរសើរ​ចំពោះសមិទ្ធិផលដ៏អស្ចារ្យរបស់ សាធារណរដ្ឋកូរ៉េក្នុងវិស័យឧស្សាហូបនីយកម្ម និង​ការ​អភិវឌ្ឍ​សេដ្ឋកិច្ច ដែលបានធ្វើឱ្យប្រទេសកូរ៉េក្លាយ ជាអ្នកដឹកនាំ​ពិភព​លោក​ពិត​ប្រាកដ​នៅ​ក្នុង​វិស័យ​វិទ្យា​សាស្ត្រ បច្ចេកវិទ្យាឌីជីថល និងនវានុវត្តន៍។ សម្តេចតេជោ ហ៊ុន សែន មានទំនុកចិត្តថា ការ​ដឹក​នាំ​របស់ ឯកឧត្តមប្រធានាធិបតីកូរ៉េ នឹងជំរុញឱ្យមានសន្ទុះជាថ្មី ធានា​បាន​នូវ​អនាគត​ដ៏​ភ្លឺ​ស្វាង ​និងវិបុលភាពសម្រាប់ប្រជាជនកូរ៉េ និងរួមចំណែកជាវិជ្ជមាននៅក្នុងតំបន់របស់យើង និង​ពិភព​លោក​។

សម្តេចតេជោ ហ៊ុន សែន បានបញ្ជាក់ថា«សម្រាប់ប្រទេសកម្ពុជា មិត្តភាព​របស់​យើង​ជា​មួយ​សាធារណ​រដ្ឋ​កូរ៉េ គឺជាប្រភពនៃមោទនភាព ដ៏ធំធេង។ ចាប់តាំងពីការ​បង្កើត​ឡើង​វិញ​នូវ​ទំនាក់​ទំនង​ការ​ទូតរបស់យើងក្នុងឆ្នាំ១៩៩៧ ប្រទេសទាំងពីរ បានពូនជ្រុំភាពជាដៃគូ ដែល​ផ្អែក​លើ​ការ​ជឿ​ទុក​ចិត្ត​គ្នាទៅវិញទៅមក ការគោរពគ្នា និងសេចក្តីប្រាថ្នារួម។ ការតម្លើង​កម្រិត​ទំនាក់​ទំនង​របស់​យើង​ទៅ​ជា «ភាពជាដៃគូយុទ្ធសាស្ត្រ» នៅក្នុងខែឧសភាឆ្នាំមុន គឺជាព្រឹត្តិការណ៍​ដ៏​សំខាន់​មួយ​ និងជាការប្ដេជ្ញាចិត្តបន្តជំរុញភាពជាដៃគូនេះ ដើម្បីបម្រើឧត្តមប្រយោជន៍ សម្រាប់​ប្រជាជន និង​ប្រជា​ជាតិ​យើងទាំងពីរ ដែលរួមចំណែកដល់សន្តិភាព និងវិបុលភាពពិភពលោក»។

តាម​រយៈសារលិខិតខាងលើនេះដែរ សម្តេចតេជោ ហ៊ុន សែន ក៏បានជូនពរ ឯកឧត្តម លី ជេម្យ៉ុង ប្រធានា​ធិបតី​កូរ៉េ ទទួលបាន សុខភាព និងសុខុមាលភាពល្អបរិបូរណ៍ និងសាធារណរដ្ឋ​កូរ៉េ​បន្ត​ទទួល​បាន​នូវ​វឌ្ឍនភាព និងវិបុលភាពផងដែរ៕ អត្ថបទ៖បាន ចក់