សហគមន៍ខ្មែរឥស្លាម នាំយកនូវគ្រឿងឧបភោគបរិភោគទៅផ្ដល់ជូនដល់កងទ័ព និងអ្នកភូមិព្រៃចាន់ និងបួសសួងឲ្យកម្ពុជាមានសន្តិភាព

បន្ទាយមានជ័យ៖ បងប្អូនសហគមន៍ខ្មែរ-ឥស្លាម នៅក្នុងខេត្តបន្ទាយមានជ័យ បាននាំយកនូវគ្រឿងឧបភោគបរិភោគ ម្ហូបអាហារ និងនំបញ្ចុក ទៅផ្ដល់ជូនដល់កងទ័ព និងអ្នកភូមិព្រៃចាន់ ឃុំអូរបីជាន់ ជាមួយនឹងការលើកទឹកចិត្ត ក្នុងនាមជាសមរភូមិក្រោយ ។

ក្នុងពេលដឹកនាំយកគ្រឿងឧបភោគបរិភោគ ផ្ដល់ជូនកងកម្លាំងកម្ពុជាឈរជើងនៅភូមិព្រៃចាន់ នៅព្រឹកថ្ងៃទី៥ ខែតុលា ឆ្នាំ២០២៥ លោក​ ស្លៃម៉ាន​ ម៉ូសា​ គណៈអ៊ីម៉ាំខេត្ត និងជាប្រធានគណៈចលនាសាសនិកឥស្លាម ខេត្តបន្ទាយមានជ័យ បានលើកឡើងថា ក្នុងនាមជាប្រជាពលរដ្ឋខ្មែរឥស្លាម រស់នៅក្នុងប្រទេសកម្ពុជា ប្រកបដោយភាពសុខសាន្ត ក្រោមការដឹកនាំរបស់រាជរដ្ឋាភិបាលតាំងពីអាណត្តិមុន និងពេលបច្ចុប្បន្ន ពិតជាមានការឈឺចាប់ ដូចប្រជាពលរដ្ឋខ្មែរដទៃទៀតដែរ ពាក់ព័ន្ធនឹងអំពើរំលោភបំពាន របស់កងទ័ពថៃ មកលើបូរភាពទឹកដីកម្ពុជា ។

លោកបានបន្តថា ដូចនេះហើយ ទើបសហគមន៍ខ្មែរឥស្លាម ក្នុងនាមជាសមរភូមិក្រោយ មិនបានព្រងើយកន្តើយនោះទេ ទោះបីជាមិនបាននៅប្រឈមនៅសមរភូមិមុខ ប៉ុន្តែមានទឹកចិត្តចូលរួមការពារទឹកដី ជាមួយវីរកងទ័ព និងអ្នកភូមិព្រៃចាន់ ជាមួយនឹងការគាំទ្រ នូវវិធានការនានា របស់រាជរដ្ឋាភិបាល ដើម្បីដោះស្រាយបញ្ហាព្រំដែនកម្ពុជា-ថៃ ដោយសន្តិវិធី និងស្ដារសន្តិភាពនៅកម្ពុជាឡើងវិញ ។

គួរបញ្ជាក់ថា ក្នុងដំណាក់កាល មានបញ្ហាព្រំដែនកម្ពុជា-ថៃនេះ កម្លាំងសាមគ្គីជាតិខ្មែរ កំពុងពូតដៃគ្នាយ៉ាងខ្លាំងក្លា តាមរយៈសកម្មភាពផ្សេងៗ ដើម្បីគាំទ្រដល់រាជរដ្ឋាភិបាលកម្ពុជា ក្នុងការដោះស្រាយបញ្ហានេះដោយសន្តិវិធី ទាំងយន្តការទ្វេភាគី និងច្បាប់អន្តរជាតិ ក៏ដូចជាផ្ដល់កម្លាំងចិត្តដល់វីរកងទ័ពរបស់យើង ដែលកំពុងឈរជើងយ៉ាងរឹងមាំ ការពារបូរណភាពជាតិ ប្រកបដោយស្មារតីឆន្ទៈមុះម៉ុត ក្លាហាន និងលះបង់អាយុជីវិត ដើម្បីជាតិមាតុភូមិ ៕ អត្ថបទ បាន សុខរិទ្ធិ