ប្រជាពលរដ្ឋស្រុកតំបែរទទួលបានការពិនិត្យ និងព្យាបាលជំងឺដោយឥតគិតថ្លៃ

ត្បូងឃ្មុំ ៖ ឯកឧត្តម ចាយ បូរិន រដ្ឋមន្រ្តីក្រសួងធម្មការនិងសាសនា និងជា​ប្រធាន​ក្រុម​ការងារ​រាជរដ្ឋាភិបាល​ចុះមូលដ្ឋានស្រុកតំបែរ បានដឹកនាំដោយក្រុមគ្រូពេទ្យស្ម័គ្រចិត្តជនជាតិកូរ៉េ របស់​អង្គការ​មជ្ឈមណ្ឌលសំលេង នៃក្តីសង្ឃឹម ចុះពិនិត្យព្យាបាលជំងឺជូនប្រជាពលរដ្ឋ ដោយឥតគិតថ្លៃ នៅ​ស្រុក​តំបែរ ខេត្តត្បូងឃ្មុំ នៅថ្ងៃទី៦ ខែតុលា ឆ្នាំ២០២៥ ។

នៅក្នុង​ឱកាសនោះ ឯកឧត្តម រដ្ឋមន្រ្តី ចាយ បូរិន បានពាំនាំនូវការ​ផ្ដាំផ្ញើសាក​សួរ​សុខ​ទុក្ខ​ពី​សំណាក់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា, សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រ​កម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនប្រជាពលរដ្ឋ ដែលអញ្ជើញ​មក​ពិនិត្យ​ជំងឺ និងសិស្សានុសិស្សចំនួនប្រមាណ ១,០០០នាក់ ខណៈជានិច្ចជាកាលសម្តេច ព្រមទាំង​លោក​ជំទាវ​បណ្ឌិត តែងតែយកចិត្តទុកដាក់គិតគូរអំពីសុខទុក្ខ និងការរស់នៅ​របស់បង​ប្អូន​ប្រជា​ពលរដ្ឋ​គ្រប់ពេលវេលា ។

ឯកឧត្តមរដ្ឋមន្ត្រី បានកោតសរសើរ និងថ្លែងអំណរគុណ ចំពោះអង្គការមជ្ឈមណ្ឌលសម្លេង នៃក្តី​សង្ឃឹម ដែលបានដឹកនាំក្រុមគ្រូពេទ្យស្ម័គ្រចិត្ត មកពីសាធារណរដ្ឋកូរ៉េ និងក្រុមការងារ មានទាំង​ថ្នាំ​សម្រាប់ព្យាបាល រៀបចំកម្មវិធីពិនិត្យ និងព្យាបាលជំងឺជូនប្រជាពលរដ្ឋ ដោយឥតគិតថ្លៃ នៅ​មូល​ដ្ឋានស្រុកតំបែរ ខេត្តត្បូងឃ្មុំនេះ។ ការពិនិត្យ និងព្យាបាលជំងឺនេះ មិនមែនជាលើកទី១ ទេ អង្គការមជ្ឈមណ្ឌលសម្លេង នៃក្តីសង្ឃឹម ធ្លាប់បានចុះទៅធ្វើសកម្មភាពពិនិត្យ និងព្យាបាលជំងឺជូនប្រជាពលរដ្ឋនៅតាមបណ្តាខេត្តមួយចំនួន រួចហើយដែរ ។

ឯកឧត្តមបន្តថា រាជរដ្ឋាភិបាលនីតិកាលទី ៧ នៃរដ្ឋសភា ក្រោមការដឹកនាំ​ប្រកប​ដោយ​ភាព​ប្រាកដ​និយមរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នែព្រះរាជាណាចក្រ​កម្ពុជា បានដាក់ចេញនូវយុទ្ធសាស្រ្តបញ្ចកោណដំណាក់កាលទី១ ក្នុងនោះការអភិវឌ្ឍមូល​ធន​មនុស្ស​ជាអាទិភាពដ៏សំខាន់ ដោយផ្ដោតលើអាទិភាពចំនួន៥ ខណៈ ការចុះពិនិត្យ និងព្យាបាល​ជំងឺជូនប្រជាពលរដ្ឋរបស់អង្គការមជ្ឈមណ្ឌ សំលេងនៃក្តីសង្ឃឹមនាពេលនេះ ពិតជាបានរួម​ចំណែក​ដល់ការអភិវឌ្ឍមូលធនមនុស្សផងដែរ៕ អត្ថបទ៖ ជឹង សេងឡុង