ឯកឧត្តម ហ៊ុន ម៉ានី៖ ពានរង្វាន់ ASEAN Prize 2025 គឺជាពានរង្វាន់របស់សមាជិក សមាជិកា គ្រប់ៗរូបដែលបានចូលរួមក្នុងបុព្វហេតុរបស់ ស.ស.យ.ក.

ក្នុងឱកាសនៃពិធីប្រកាសទទួលស្គាល់ប្រធានកិត្តិយស និងសមាសភាពគណៈកម្មាធិការ ស.ស.យ.ក. ខេត្តកំពត ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានធ្វើការកត់សម្គាល់ពីការវិវត្តមុខមាត់យ៉ាងឆាប់រហ័សនៃខេត្តកំពតក្រោមការដឹកនាំរបស់ ឯកឧត្តម ម៉ៅ ធនិន អភិបាលនៃគណៈអភិបាលខេត្ត និងជាប្រធានកិត្តិយសស.ស.យ.ក. ខេត្តកំពត ក្នុងពេលបច្ចុប្បន្ន។ ផ្សារភ្ជាប់នឹងការកត់សម្គាល់ខាងលើឯកឧត្តមបានយកឱកាសនេះ ថ្លែងអំណគុណចំពោះសមាជិក សមាជិកាស.ស.យ.ក. ទូទាំងប្រទេសដែលជានិច្ចកាលតែងតែចូលរួមការងារសង្គម និងការងារស្ម័គ្រចិត្តផ្សេងៗជាពិសេសចូលរួមក្នុងព្រឹត្តិការណ៍ដែលបង្ហាញពីមោទនភាពជាតិនាពេលកន្លងមករហូត ស.ស.យ.ក. បានទទួលពានរង្វាន់ ASEAN Prize 2025 ។

លើសពីនេះថែមទៀតឯកឧត្តមក៏បានរំលេចពីអត្ថន័យនៃពានរង្វាន់ ASEAN Prize ដែលជាពានរង្វាន់ចំណាត់ថ្នាក់ខ្ពស់មួយក្នុងតំបន់មួយដែលបង្កើតឡើងតាំងពីឆ្នាំ២០១៨មកម្លេះ ហើយជាពានរង្វាន់មួយក្នុងចំណោមពានរង្វាន់ផ្សេងៗជាច្រើនដែលទទួលស្គាល់ភាពល្អឥតខ្ចោះនូវសមិទ្ធផលនានាដែលចូលរួមអភិវឌ្ឍសហគមន៍ និងលើកកម្ពស់ស្មារតីអាស៊ាន។ ពានរង្វាន់នេះគឺសម្រាប់សមាជិក សមាជិកា ស.ស.យ.ក. ទូទាំងប្រទេស ។

ជាកិច្ចបញ្ចប់ឯកឧត្តម បានរំលេចបន្ថែម និងអំពាវនាវដល់ប្រជាជនខ្មែរទូទាំងប្រទេស សូមបន្តគាំទ្រប្រធានទី១ គឺ សម្តេចតេជោ ហ៊ុន សែន ដែលថ្មីៗនេះមានព័ត៌មានប្រមាថពីប្រជាជនមួយចំនួនតូចរបស់ប្រទេសជិតខាង។ ក្នុងនាមជាប្រជាជនខ្មែរផង ជាយុវជនបន្តវេនផង និងជាសមាជិករបស់ ស.ស.យ.ក. ផងយើងគប្បីបង្ហាញពីការគាំទ្រ និងការការពារកិត្តិយស និងសេចក្តីថ្លៃថ្នូររបស់ប្រទេសជាតិជាពិសេសការពារកិត្តិយសរបស់ឥស្សរៈជនប្រវត្តិសាស្រ្ត។