សម្ដេច ស ខេង អញ្ជើញសំណេះសំណាល និងផ្ដល់រង្វាន់ម៉ូតូដល់សិស្សនិទ្ទេស A នៅខេត្តបាត់ដំបង

សម្ដេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត និង​ជា​អ្នក​តំណាង​រាស្ត្រ​មណ្ឌល​ខេត្ត​បាត់ដំបង នៅថ្ងៃទី១១ ខែតុលា ឆ្នាំ២០២៥នេះ បានអញ្ជើញជា​អធិបតី​ក្នុង​ពិធី​សំណេះ​សំណាល និងផ្ដល់រង្វាន់ម៉ូតូដល់សិស្សប្រឡងជាប់សញ្ញាបត្រមធ្យមសិក្សាទុតិយភូមិនិទ្ទេស A ឆ្នាំ​សិក្សា​២០២៤-២០២៥ ចំនួន ១៥៥ នាក់នៅទូទាំងខេត្តបាត់ដំបង នៅសាល​មហោ​ស្រព​ស្ទឹង​សង្កែ ស្ថិតនៅក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។

បើយោងតាមរបាយការណ៍របស់ ឯកឧត្តម សុខ លូ អភិបាលខេត្តបាត់ដំបង បានឱ្យដឹងថា ឆ្នាំ​២០២​៥​នេះ បេក្ខជនទទួលបាននិទ្ទេស A នៅក្នុងខេត្តបាត់ដំបងមានចំនួន ១៥៥នាក់ បើ​ប្រៀប​ធៀប​នឹង​ឆ្នាំ​២០២៤ និទ្ទេស A កើន ២៥នាក់។

ឯកឧត្តម សុខ លូ កោតសរសើរ និងថ្លែងអំណរគុណដល់ប្រធានមន្ទីរអប់រំ យុវជន និងកីឡាខេត្ត បុគ្គលិកអប់រំគ្រប់លំដាប់ថ្នាក់ ជាពិសេស នាយក នាយិកា គណៈគ្រប់គ្រងសាលារៀនលោកគ្រូ អ្នក​គ្រូ​ទាំងអស់ ដែលបានយកអស់កម្លាំងកាយ ចិត្ត ប្រាជ្ញា ស្មារតី និងធនធានក្នុងការដឹកនាំ និង​ដំណើរ​ការ​សាលារៀន និងការ បង្រៀនក្នុងថ្នាក់ ព្រមទាំងការបំពេញការងារដទៃទៀត តាមគ្រប់​រូប​ភាព ប្រសិទ្ធភាព និងស្មារតីសាមគ្គីភាព ជាពិសេស ការផ្តោតការ​យក​ចិត្ត​ទុក​ដាក់​ការងារ​បង្រៀន ​ថែទាំកូនចៅ រួមទាំងការខិតខំប្រឹងប្រែងសិក្សារៀនសូត្រពីក្មួយៗ ទើបទទួល​បាន​លទ្ធផល​ល្អ​ប្រសើរគួជាទីគាប់ចិត្តនេះ។

ក្នុងឱកាសនោះ សម្តេចក្រឡាហោម ស ខេង មានប្រសាសន៍ថា រាជរដ្ឋាភិបាលនីតិកាលទី៧ នៃ​រដ្ឋសភា ដែលជារាជរដ្ឋាភិបាល​បន្ត​វេន​បាន​សម្រេច​ដាក់​ចេញ​នូវ​យុទ្ធសាស្ត្រ​បញ្ចកោណ​ដំណាក់​កាល​ទី១ ដែលក្នុងនោះបានកំណត់យកការអភិវឌ្ឍមូលធនមនុស្សជាបញ្ចកោណទី១ ជា​យុទ្ធសាស្ត្រ​គន្លឹះ សម្រាប់បន្តជំរុញការ​អភិវឌ្ឍ​ប្រទេស​ជា​តិ​ឱ្យ​ឈាន​ឆ្ពោះ​ទៅ​សម្រេច​បាន​ចក្ខុ​វិស័យ​កម្ពុជា​ឆ្នាំ២០៣០ ជាប្រទេសមាន​ចំណូល​មធ្យម​កម្រិត​ខ្ពស់​សម្រាប់​ជាមូលដ្ឋាន​ឆ្ពោះទៅ​សម្រេច​បាន​ចក្ខុវិស័យកម្ពុជាឆ្នាំ២០៥០ ជាប្រទេសមានចំណូលខ្ពស់។

ដើម្បីបន្តជំរុញ​ការអភិវឌ្ឍប្រទេសជាតិ និងការដោះស្រាយបញ្ហាប្រឈមនានាក្នុងសង្គម សម្តេច​បាន​ផ្តល់នូវអនុសាសន៍ដល់សិស្សដែលទើបប្រឡងជាប់សញ្ញាបត្រមធ្យមសិក្សាទុតិយភូមិ ត្រូវ​ចង​ចាំ​ថា លទ្ធផលប្រឡង គឺជាជោគជ័យមួយក្នុងការសិក្សារៀនសូត្រតែប៉ុណ្ណោះ។ ក្នុងកា​រ​កសាង​អនាគត​នៃ​ជីវិត​របស់ខ្លួន គ្រួសារ និងសង្គមជាតិ គឺត្រូវបន្តព្យាយាម​បន្ត​ដណ្ដើម​យក​ជោគ​ជ័យ​នានា​ជា​បន្ថែមទៀត ដែលចំពោះមុខនេះ​គឺ​ត្រូវ​ពិចារណា​ឱ្យ​បាន​ម៉ត់ចត់​ក្នុង​ការ​ជ្រើសរើ​ស​យក​មុខ​វិជ្ជា​ណា ​ដែលស្របតាមចំណង់ចំណូលចិត្ត និងទីផ្សារការងារក្នុងសង្គម ដើម្បីជាទុន​ដ៏សំខាន់​ក្នុង​ការ​កសាង​ជីវភាពរស់នៅផ្ទាល់ខ្លួន គ្រួសារ និងការចូលរួមអភិវឌ្ឍប្រទេសជាតិ។

ក្នុង​ឱកាសនោះ សម្តេចក្រឡាហោម ក៏បានជំរុញលើកទឹកចិត្តដល់អាជ្ញាធរ និង​កង​កម្លាំង​មាន​សមត្ថកិច្ច គ្រប់លំដាប់ថ្នាក់ បន្តយកចិត្តទុកដាក់ថែរក្សាសន្តិសុខ សណ្តាប់ធ្នាប់សាធារណៈ និង​សុវត្ថិភាព​ក្នុងសង្គម ព្រមទាំងបន្តប្រមូលផ្តុំខិតខំលើកកម្ពស់ក្នុងការផ្តល់សេវាសាធារណៈ និង​ការ​ដោះ​ស្រាយ​ឆ្លើយតបនឹងសំណើ សំណូមពររបស់ប្រជាពលរដ្ឋឱ្យមានប្រសិទ្ធភាព៕