ប្រជាពលរដ្ឋកំពុងរុះរើសម្ភារៈចេញពី អគាអតីត «សណ្ឋាគារអង្គរមានជ័យ» ដែលចាស់ទ្រុឌទ្រោមខ្លាំង

ភ្នំពេញ៖ អគាអតីត «សណ្ឋាគារអង្គរមានជ័យ» ដែលចាស់ទ្រុឌទ្រោមខ្លាំង នឹងត្រូវបានក្រសួងរៀបចំដែនដី និងអាជ្ញាធររាជធានីភ្នំពេញ ត្រៀមរៀបចំវាយរំលំ ជៀសវាងបាក់រលំបង្កផលប៉ះពាល់ដល់ពលរដ្ឋ និងអ្នកធ្វើដំណើរ ខណៈពលរដ្ឋ ក៏បានរើសសម្ភារៈចេញពីអាគារបណ្ដើរៗផងដែរ។

ក្រសួង រៀបចំដែនដី នគរូបនីយកម្ម និងសំណង់ និងអាជ្ញាធររាជធានីភ្នំពេញ បានចាប់ផ្តើមរៀបចំដំណើរការវាយរំលំអគាអតីត «សណ្ឋាគារអង្គរមានជ័យ» ដែលមានទីតាំង ស្ថិតនៅ កែងមហាវិថីព្រះមុនីវង្ស និងមហាវិថីកម្ពុជាក្រោម ភូមិ១ សង្កាត់មនោរម្យ ខណ្ឌ ៧មករា រាជធានីភ្នំពេញ ដោយអគារនេះមានសភាពចាស់ទ្រុឌទ្រោមខ្លាំងដែលអាចនឹងបាក់រលំ ធ្វើឲ្យមានគ្រោះថ្នាក់ដល់ពលរដ្ឋ។

ដំណើរការវាយរំលំអគារនេះ មានការចូលរួមពីលោក យស់ ឆោមណារ៉ាឌី រដ្ឋលេខាធិការ ក្រសួង រៀបចំដែនដី នគរូបនីយកម្ម និងសំណង់ និងអាជ្ញាធរខណ្ឌ ៧មករាផងដែរ និងក្រុមហ៊ុនទទួលម៉ៅការ សាជីវកម្ម ពិស្ណុការ អន្តរជាតិ។

លោក សុខ ស៉ីធារ៉ា អគ្គនាយកក្រុមហ៊ុនបានបញ្ជាក់ឲ្យដឹងថា ដំណើរការវាយរំលំអគារនេះ ក្រុមហ៊ុនទទួលម៉ៅការ សាជីវកម្ម ពិស្ណុការ អន្តរជាតិ ពីក្រសួងរៀបចំដែនដី នគរូបនីយកម្ម និងសំណង់ រយះពេល៤៥ថ្ងៃ គិតចាប់ពីថ្ងៃទី១៣ ខែតុលា ឆ្នាំ២០២៥ម្សិលមិញតទៅ នឹងវាយកម្ទេចរួចជាស្ថាពរ។

មន្រ្តីជំនាញបានបញ្ជាក់ផងដែរថា រហូតមកដល់ថ្ងៃទី១៤ ខែតុលា ឆ្នាំ២០២៥នេះគ្រួសារដែលរស់នៅក្នុងអគារ ឬម្ចាស់បន្ទប់ សរុប៦៥គ្រួសារ មានចំនួន ៦៣គ្រួសារ បានស្រុះស្រួលឯកភាពបញ្ឈប់ការរស់នៅក្នុងអគារអង្គរមានជ័យ និងបានរុះរើសម្ភារៈចេញដោយឯកភាពទទួលយកសំណងតាមតម្លៃទីផ្សារ ទៅរស់នៅទីកន្លែងផ្សេងដែលមានសុវត្ថិភាព។

ដោយឡែកនៅសល់គ្រួសារចំនួន២ ដែលពុំទាន់ឯកភាពទទួលយក ដំណោះស្រាយនៅឡើយ ក្រសួងជំនាញនិងបន្តសម្របសម្រួលជាមួយបងប្អូនចំនួន២គ្រួសារបន្តរហូតបានបញ្ចាប់ដោយឯកភាពគ្នា តាមយុទ្ធសាស្រ្តទទួលយកបានទាំងអស់។ ក្រសួងរៀបចំដែនដី នគរូបនីយកម្ម និងសំណង់ បានឯកភាពជាគោលការណ៍តម្លើងតម្លៃដល់ ២ ៥០០ដុល្លារអាមេរិកក្នុង១ម៉ែត្រការ៉េ ដែលធ្វើឱ្យតម្លៃគោល (គិតពីជាន់ផ្ទាល់ដីដល់ជាន់ទី៦) កើនដល់ ៧ ៦៩០ដុល្លារអាមេរិកក្នុង១ម៉ែត្រការ៉េ លើសពីតម្លៃទីផ្សារប្រមាណ ២២% ដោយយោងតាមតម្លៃដែលក្រុមហ៊ុនចំនួន ០៣បានធ្វើការវាយតម្លៃពីឆ្នាំ២០២៣ដល់២០២៥។

សូមបញ្ជាក់ថា អគារសហកម្មសិទ្ធិ (អតីតសណ្ឋាគារអង្គរមានជ័យ) មានក្រឡាផ្ទៃបាតទំហំ សរុប៥៩០ម៉ែត្រការ៉េ មានកម្ពស់៦ជាន់ ស្មើនឹង១០៧បន្ទប់។ អគារនេះមានទីតាំងស្ថិតនៅលើផ្លូវកែងរវាងមហាវិថីព្រះមុនីវង្ស និងមហាវិថីកម្ពុជាក្រោម ស្ថិតនៅក្នុងភូមិ១ សង្កាត់មនោរម្យ ខណ្ឌ៧មករា រាជធានីភ្នំពេញ ត្រូវបានសាងសង់ឡើង តាំងពីអំឡុងឆ្នាំ១៩៥០ គិតមកដល់បច្ចុប្បន្នសំណង់អគារមានអាយុ ៧៥ឆ្នាំមកហើយ។

សូមបញ្ជាក់ថាក្រសួងបានទុកពេលវេលាឱ្យជាច្រើនខែមកហើយជូន គ្រួសារដែលពុំទាន់ទទួលយកសំណង តែពួកគាត់មិនទាន់សម្រេចចិត្តមកទទួលយក ដោយសារភាពចាស់ទ្រុឌទ្រោម របស់អគារនេះ។

អត្ថបទ៖ កុម្ភៈ