ទីផ្សាររថយន្តថ្មីនៅកម្ពុជា មានការកើនឡើងប្រមាណ ៦០% ខណៈការលក់រថយន្តមួយទឹកមានការថយចុះ

សហព័ន្ធឧស្សាហកម្មយានយន្តកម្ពុជា បានលើកឡើងឱ្យដឹងថា ទីផ្សារប្រទេសកម្ពុជាបច្ចុប្បន្ន ការលក់រថយន្តថ្មី បានកើនឡើងឥតឈប់ឈរ ដោយរថយន្តថ្មីបានគ្រប់គ្រងចំណែកទីផ្សារប្រមាណ៦០% ដោយឡែករថយន្តចាស់ ឬរថយន្តមួយទឹកធ្លាក់ចុះមកត្រឹម៤០%ប៉ុណ្ណោះ។

ជួបសម្ភាសន៍ ឧកញ៉ាបណ្ឌិត តាន់ មុនីវណ្ណ ប្រធានសហព័ន្ធឧស្សាហកម្មយានយន្តកម្ពុជា នៅក្នុងព្រឹត្តិការណ៍ពិព័រណ៍អន្តរជាតិ CAMBUILD & CAMAUTO 2025 នៅថ្ងៃទី១៤ ខែតុលា ឆ្នាំ២០២៥កន្លងទៅ បានមានប្រសាសន៍ប្រាប់ព័ត៌មាន ប៊ីធីវី ឱ្យដឹងថា ការកើនឡើងប្រើប្រាស់រថយន្តថ្មីនេះ ដោយសារ សេដ្ឋកិច្ចប្រទេសកម្ពុជានៅតែរក្សាបានកំណើនវិជ្ជមានល្អប្រសើរ ប្រជាពលរដ្ឋកម្ពុជាបាននឹងកំពុងរស់នៅយ៉ាងសុខដុមរមនា និងមានកំរិតជីវភាពកាន់តែប្រសើរឡើងពីមួយឆ្នាំទៅមួយឆ្នាំ ស្របពេលវិស័យធនាគារចូលរួមសហការជាមួយម្ចាស់អាជីវកម្មរថយន្តថ្មី ផ្តល់ប្រាក់កម្ចីដោយអត្រាការប្រាក់សមរម្យ និងសម្រួលនីតិវិធីក្នុងការផ្តល់កម្ចីឱ្យបានងាយស្រួល ដែលនាំឱ្យតម្រូវការប្រើប្រាស់រថយន្តថ្មីនេះ កើនឡើងជាបន្តបន្ទាប់។ លោកបានបន្តថា មួយវិញទៀត ដោយសារការលើកលែងពន្ធនាំចូលរថយន្តថ្មីពីអាម៉េរិកដែលអាចធ្វើឱ្យរថយន្តថ្មីៗពីអាម៉េរិក ហូរចូលមកកម្ពុជាកាន់តែច្រើនថែមទៀតជាដើម

ឧកញ៉ាបណ្ឌិត បានបន្ថែមទៀតថា ទន្ទឹមគ្នានេះ កម្ពុជាក៏ទទួលបាននូវគម្រោងវិនិយោគលើរោងចក្រដំឡើងរថយន្តជាបន្តបន្ទាប់ ដោយបច្ចុប្បន្នកម្ពុជាមានរោងចក្រដំឡើងរថយន្តចំនួន០៧ កំពុងដំណើរការ និង០៣ផ្សេងទៀត កំពុងសាងសង់ ហើយអាចនឹងមានគម្រោងបន្តបន្ទាប់ទៀតផងដែរ។

យោងតាមរបាយការណ៍ការងារ គិតក្នុងរយៈពេល ៩ខែ ឆ្នាំ២០២៥ រថយន្តធុនស្រាលដែលបានចុះបញ្ជីនៅក្រសួងសាធារណការ និងដឹកជញ្ជូន សរុបចំនួនជាង ៦ម៉ឺនគ្រឿង មានការកើនឡើងចំនួន ៥២% បើប្រៀបធៀបរយៈពេលដូចគ្នាទៅនឹងឆ្នាំ២០២៤កន្លងទៅ មានចំនួនជាង ៤ម៉ឺនគ្រឿង។

សូមបញ្ជាក់ថា ពាក់ព័ន្ធកំណើននៃការប្រើប្រាស់រថយន្តថ្មីនេះដែរ វិស័យឯកជនខាងផ្នែកអភិវឌ្ឍន៍អាជីវកម្មនៅកម្ពុជា បានបន្តរៀបចំ ពិព័រណ៍អន្តរជាតិដ៏សំខាន់ៗចំនួនពីរ គឺវិស័យសំណង់ និងឧស្សាហកម្មយានយន្ត (CAMBUILD & CAMAUTO 2025) ដើម្បីបង្ហាញនូវសក្តានុពល និងការរួមបញ្ចូលគ្នាដែលមានភាពស៊ីសង្វាក់គ្នា រវាងឧស្សាហកម្មសំណង់ស្តង់ដារពិភពលោក និងឧស្សាហកម្មយានយន្ត ដែលមានអ្នកចូលរួមតាំងបង្ហាញផលិតផលប្រមាណជាង ១០០ក្រុមហ៊ុន មកពីជាង ១៥ប្រទេស មានដូចជា សហរដ្ឋអាម៉េរិក ចិន ជប៉ុន អ៊ីតាលី និងអាល្លឺម៉ង់ជាដើម៕អត្ថបទ៖ ឈិត បូរ៉ាវី