កម្ពុជាត្រូវការអ្នកជំនាញផ្នែកគណនេយ្យ និងហិរញ្ញវត្ថុ ខណៈកំពុងមានសម្ទុះកំណើន​អាជីវកម្ម​ថ្មីៗ

អ្នកជំនាញផ្នែកការងារគ្រប់គ្រងគណនេយ្យនៅកម្ពុជា បានបញ្ជាក់ឱ្យដឹងថា បច្ចុប្បន្ននេះ ដោយ សារមានការរីកលូតលាស់ច្រើនក្នុងការបើកអាជីវកម្មជាហូរហែរទាំងខ្នាតតូចនិងមធ្យម វិស័យ​ការ​ងារ​ជំនាញផ្នែកគណនេយ្យនិងហិរញ្ញវត្ថុ កំពុងមានតម្រូវការជាចាំបាច់ ខណៈ​អ្នក​ធ្វើ​ការ​ក្នុង​ជំនាញ​នេះ នៅមានចំនួនតិចតួចនៅឡើយ។

នៅក្នុងកម្មវិធីប្រគល់វិញ្ញាបនបត្រជ័យលាភីលើមុខវិជ្ជា ATQ1 និង ATQ4 ជូននិស្សិត​សាកល​វិទ្យាល័យ ពាណិជ្ជសាស្រ្ត អេស៊ីលីដា នាព្រឹកថ្ងៃទី១៦ តុលា ឆ្នាំ២០២៥នេះ លោកស្រី សាវុធ ដាលី នាយកប្រតិបត្តិ នៃវិទ្យាស្ថានគណនេយ្យករជំនាញ និងសវនករកម្ពុជា បានមានប្រសាសន៍ កម្ពុជា ជាប្រទេសដែលកំពុងតែមានការរីកចម្រើនពីមួយថ្ងៃ ទៅមួយថ្ងៃ ដែល​ធ្វើ​ឲ្យ​មាន​តម្រូវ​ការ​ខ្ពស់​លើ​ធន​ធានអ្នកជំនាញនានា ជាពិសេសអ្នកជំនាញផ្នែកគណនេយ្យ និងហិរញ្ញវត្ថុ ដែលជា​ជំនាញ​ស្នូល​មួយ ក្នុងចំណោមជំនាញនានា។ លោកស្រី បានបន្តថា កត្តានេះហើយ ទើប​ធ្វើ​ឲ្យ​មាន​​ការកើនឡើងនូវតម្រូវការអ្នក ជំនាញផ្នែកគណនេយ្យ និងហិរញ្ញវត្ថុ នៅលើទីផ្សារការងារ ខណៈកម្រិតចំណេះ និងជំនាញច្បាស់លាស់ គឺជាកត្តាសំខាន់មួយ ដែល​​អ្នក​ដាក់​ពាក្យ​ចូល​ធ្វើ​ការ​ត្រូវ​មាន​គ្រប់គ្រាន់សម្រាប់បម្រើការងារនោះ។

ក្នុងនាមជាដៃគូកិច្ចសហប្រតិបត្តិការ លើការបណ្តុះបណ្តាលធនធានមនុស្សជំនាញផ្នែកនេះ លោក​បណ្ឌិត ផុន ណារិន សាកលវិទ្យាធិការ នៃសាកលវិទ្យាល័យ ពាណិជ្ជសាស្រ្ត អេស៊ីលីដា បាន​បញ្ជាក់ឱ្យដឹងដែរថា ដូចដឹងហើយថា យោងតាមបទបង្ហាញក្នុងកិច្ចប្រជុំ តាម​រយៈ​ក្រសួង​ពាណិជ្ជ​កម្ម​ដែលជាសេនាធិការរបស់រាជរដ្ឋាភិបាលកម្ពុជា ក្រុមហ៊ុនដែល​បាន​ចុះ​បញ្ជី​ចំនួ​ន​ប្រមាណ​ជាង​ ៦ម៉ឺនក្រុមហ៊ុន ហើយចំពោះអ្នកជំនាញ ដូចជា គណនេយ្យករ និយ័តករ និង​សវនករ​ជា​ដើម មានប្រមាណជាង ១៥០នាក់ប៉ុណ្ណោះ ដែលបានបង្ហាញឱ្យឃើញថា ចំនួន​នៃ​អ្នក​ជំនាញដែលបម្រើការងារនៅបណ្តាក្រុមហ៊ុន ហាក់នៅមានខ្វះខាតនៅឡើយ។

លោក​បណ្ឌិត ផុន ណារិន បានអំពាវនាវ និងលើកទឹកចិត្តដល់សិស្សនិស្សិត ក៏ដូច​ជា​ភាគី​ពាក់​ព័ន្ធ​ទាំង​អស់ ​និងម្ចាស់អាជីវកម្មនានា ចូលរួម​ជួយ​គ្នា​ក្នុង​ការ​ជំរុ​ញ​បណ្តុះ​បណ្តាល​ដល់​វិស័យ​វិជ្ជាជីវៈ​គណនេយ្យ​នេះ​ឱ្យកាន់តែច្រើនបន្ថែមទៀត ដើម្បីអាចជួយអភិវឌ្ឍក្នុងវិស័យឯកជន ដែល​ជា​វិស័យ​​ឆ្អឹង​ខ្នងសេដ្ឋកិច្ចជាតិ ក៏ដូចជាវិស័យ​មួយ​ដែល​បា​ន​ផ្តល់​នូវ​ការងារ​ធំបំផុត​សម្រាប់​សេដ្ឋកិច្ច​ផង​ដែរ​៕ អត្ថបទ៖ ឈិត បូរ៉ាវី