ទាហានកម្ពុជា ១៨ នាក់ដែលថៃចាប់ទៅ នឹងត្រូវដោះលែងក្នុងពេលឆាប់ៗនេះ

ភ្នំពេញ ៖ ប្រមុខការទូតកម្ពុជាបានឱ្យដឹងថា តាមរយៈកិច្ចប្រជុំកាលពីថ្ងៃទី១៧ ខែតុលា ឆ្នាំ២០២៥ កម្ពុជា-ថៃ បានឯកភាពគ្នាលើកិច្ចព្រមព្រៀងសន្តិភាពនៃប្រទេសទាំងពីរ ដែលនឹងត្រូវចុះហត្ថលេខាដោយ នាយករដ្ឋមន្រ្តីនៃប្រទេសទាំងពីរ ក្នុងកិច្ចប្រជុំកំពូលអាស៊ាននៅចុងខែនេះ។ តាមរយៈកិច្ចព្រមព្រៀងនេះ, ទាហានកម្ពុជា ១៨ នាក់ដែលថៃចាប់យកទៅឃុំ ក៏នឹងត្រូវដោះលែងមកវិញផងដែរ។​

កងទាហានកម្ពុជាចំនួន ១៨ នាក់ដែលថៃបានចាប់យកទៅនៅក្រោយបទឈប់បាញ់ជាធរមាននោះ នឹងត្រូវដោះលែងមកវិញនៅពេលឆាប់ៗខាងមុខនេះ។ នេះបើតាមឯកឧត្ដម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានថ្លែងឱ្យដឹងនៅថ្ងៃទី១៨ ខែតុលា ឆ្នាំ២០២៥។

ឯកឧត្ដមបញ្ជាក់បន្ថែមថា ដំណឹងស្ដីពីការដោះលែងទាហានកម្ពុជាទាំង ១៨ នាក់នេះ គឺបន្ទាប់ពីកម្ពុជា និងថៃបានព្រមព្រៀងគ្នាលើកិច្ចព្រមព្រៀងសន្តិភាពនៃប្រទេសទាំងពីរ ដែលនឹងត្រូវចុះហត្ថលេខាដោ យនាយករដ្ឋមន្ត្រីនៃប្រទេសទាំងពីរនៅចុងខែតុលានេះ ដោយមានឯកឧត្ដម ដូណាល់ ត្រាំ ប្រធានាធិ បតីអាម៉េរិក និងឯកឧត្ដម អាន់វ៉ា អ៊ីប្រាហ៊ីម នាយករដ្ឋមន្រ្តីម៉ាឡេស៊ី ដែលជាប្រធានអាស៊ានអញ្ជើញធ្វើជាសាក្សីផងដែរ។

​កម្ពុជា-ថៃបានមានសង្គ្រាមព្រំដែនជាមួយគ្នារយៈពេលប្រាំថ្ងៃ គិតចាប់ពីថ្ងៃទី២៤ ដល់ថ្ងៃទី២៨ ខែកក្ក ដា ឆ្នាំ២០២៥។ នៅក្រោយបទឈប់បាញ់ចូលជាធរមាននៅម៉ោង ១២ យប់នៃថ្ងៃទី២៨ ខែកក្កដា ឆ្នាំ២០២៥ នៅព្រឹកថ្ងៃទី២៩ ខែកក្កដា ឆ្នាំ២០២៥ កងយោធាថៃ បានមកព័ទ្ធចាប់ទាហានកម្ពុជា យកទៅឃុំខ្លួនតាំងពីថ្ងៃនោះមក។

កម្ពុជា-ថៃ បានប្រឹងប្រែងចរចា ដើម្បីធ្វើឱ្យតំបន់ព្រំដែននៃប្រទេសទាំងពីរមានសន្តិភាពឡើងវិញ តាមរយៈការសម្របសម្រួលពីអាម៉េរិក, ចិន និងប្រទេសនានាជាច្រើនទៀតតាំងពីពេលនោះមក។ ការចរចានេះសម្រេចបាននូវកិច្ចព្រមព្រៀងសន្តិភាពនៃប្រទេសទាំងពីរ ដែលនឹងត្រូវចុះហត្ថលេខាដោយនាយ ករដ្ឋមន្ត្រីនៃប្រទេសទាំងពីរនៅចុងខែតុលានេះ ដោយមានវត្តមានប្រធានាធិបតីអាម៉េរិក និងឯកឧត្ដមនាយករដ្ឋមន្រ្តីម៉ាឡេស៊ី ដែលជាប្រធានអាស៊ានអញ្ជើញធ្វើជាសាក្សីផងដែរ៕

ដោយ៖ គង់ ឌិន