យុវជនកាន់តែច្រើនងាកមកចាប់អារម្មណ៍ចុះឈ្មោះរៀនជំនាញបច្ចេកទេសនិងវិជ្ជាជីវៈ ខណៈតម្រូវការទីផ្សារការងារខ្ពស់

ភ្នំពេញ ៖ មន្រ្តីក្រសួងការងារ និងបណ្តុះបណ្តាលវិជ្ជាជីវៈ បានប្រាប់ឱ្យដឹងថា រហូតមកដល់ពេលនេះឃើញមានយុវជនមកសួរនាំ និងចុះឈ្មោះរៀនជំនាញបណ្តុះបណ្តាលបច្ចេកទេស និងវិជ្ជាជីវៈ ដោយសារតម្រូវការទីផ្សារការងារមានច្រើនទាំងពេលបច្ចុប្បន្ននិងអនាគត ជាពិសេស ដោយសាររាជរដ្ឋាភិបាលកម្ពុជាបានប្រកាសផ្តល់អាហារូបករណ៍ជាច្រើនកន្លែងដល់សិស្សានុសិស្ស។

​ឯកឧត្តម ថង សាម៉ុន អគ្គនាយករង នៃអគ្គនាយកដ្ឋានអប់រំបណ្តុះបណ្តាលបច្ចេកទេសនិងវិជ្ជាជីវៈ នៃក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ប្រាប់ព័ត៌មាន ប៊ីធីវី នៅព្រឹកថ្ងៃទី១៨ តុលា ឆ្នាំ២០២៥នេះថា ការបណ្តុះបណ្តាលជំនាញបច្ចេកទេស និងវិជ្ជាជីវៈ ជាមធ្យោបាយជួយឱ្យយុវជនអាចចាប់យកឱកាសការងារបានឆាប់រហ័ស និងជំរុញការចូលរួមចំណែករបស់យុវជនបានកាន់តែទូលំទូលាយក្នុងការអភិវឌ្ឍសង្គម និងសេដ្ឋកិច្ចជាតិ។

ឯកឧត្តម បានលើកឡើងដោយរម្លឹកថា ក្រៅពីការបណ្តុះបណ្តាលជំនាញកម្រិតខ្ពស់ ចាប់តាំងពីប្រមុខរាជរដ្ឋាភិបាលកម្ពុជា បានប្រកាសដាក់ឱ្យអនុវត្តជាផ្លូវការនូវកម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេសសម្រាប់យុវជនមកពីគ្រួសារក្រីក្រ និងគ្រួសារងាយរងហានិភ័យ កាលពីចុងឆ្នាំ២០២៣មក គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈនៅទូទាំងប្រទេស បាននឹងកំពុងបន្តបេសកកម្មរបស់ខ្លួនលើការបណ្តុះបណ្តាលយុវជនជាច្រើននាក់ផងដែរ ក្នុងនោះមានយុវជនជាច្រើនបានបញ្ចប់ការសិក្សាជាបន្តបន្ទាប់ រួចបន្តចុះកម្មសិក្សានៅតាមបណ្តាក្រុមហ៊ុនឯកជន និងទទួលបានការងារធ្វើស្របតាមជំនាញដែលខ្លួនបានរៀន ដោយទទួលបានប្រាក់ចំណូលសមរម្យ។

ឯកឧត្តមអគ្គនាយករង ក៏បានអំពាវនាវដល់មាតាបិតា អាណាព្យាបាល និងភាគីពាក់ព័ន្ធ សូមជួយជំរុញកូនចៅ ឬយុវជន ជាពិសេសសិស្សានុសិស្សដែលទើបប្រឡងបញ្ចប់សញ្ញាបត្រមធ្យមសិក្សាទុតិយភូមិនាពេលថ្មីៗនេះ ឱ្យមកចុះឈ្មោះចូលរៀនជំនាញបច្ចេកទេស និងវិជ្ជាជីវៈ គ្រប់កម្រិតសិក្សា នៅតាមគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈទូទាំងរាជធានី-ខេត្ត លើមុខជំនាញសំខាន់ៗជាច្រើន ដែលទីផ្សារការងារកំពុងមានតម្រូវការខ្ពស់ផងដែរ៕

អត្ថបទ៖ ឈិត បូរ៉ាវី