អាជ្ញាធរខេត្តបន្ទាយមានជ័យ បើកកិច្ចប្រជុំត្រួតពិនិត្យវឌ្ឍនភាពគម្រោងជាមួយប្រតិភូធនាគារអភិវឌ្ឍន៍អាស៊ី (ADB) នៃគម្រោង កែលម្អគ្រប់គ្រងបរិស្ថានក្រុងជុំវិញបឹងទន្លេសាបជំហានទី២

បន្ទាយមានជ័យ៖ លោក ឃ្លោក នួយ អភិបាលរងខេត្ត តំណាងឲ្យឯកឧត្តម អ៊ុ រាត្រី អភិបាល នៃគណៈអភិបាលខេត្ត និងលោក សាន រដ្ឋា តំណាងធនាគារអភិវឌ្ឍន៍អាស៊ី (ADB) បានដឹកនាំក្រុមការងារ ចុះត្រួតពិនិត្យការងារអនុវត្តតាមការដ្ឋានជាក់ស្ដែង និងបើកកិច្ចប្រជុំពិភាក្សាពីវឌ្ឍនភាពការងារ គម្រោងជាមួយប្រតិភូធនាគារអភិវឌ្ឍន៍អាស៊ី (ADB) នៃគម្រោង កែលម្អគ្រប់គ្រងបរិស្ថានក្រុងជុំវិញបឹងទន្លេសាបជំហានទី២។

ក្នុងកិច្ចប្រជុំនេះដែរ ការចូលរួមពី លោក លោកស្រី ប្រតិភូ ធនាគារអភិវឌ្ឍន៍អាស៊ី ADB អភិបាលរងក្រុង មន្ទីរអង្គភាពពាក់ព័ន្ធ ទីប្រឹក្សាបច្ចេកទេស និងអ្នកពាក់ព័ន្ធនៅថ្ងៃទី១៩តុលាឆ្នាំ២០២៥។

លោក ឃ្លោក នួយ អភិបាលរងខេត្ត បានមានប្រសាសន៍ថា ចំពោះការគាំទ្រគម្រោងគ្រប់គ្រងបរិស្ថានក្រុងជុំវិញបឹងទន្លេសាប ជំហានទី២ ដែលផ្តោតលើការសាងសង់បណ្តាញ ទឹកកខ្វក់ ការគ្រប់គ្រងទីលានចាក់សំរាម ការងារទីលានចាស់ និងការងារសិក្សាគម្រោងផលិតជីកំប៉ុស្តិ៍ក្នុងទីលាន នៅក្នុងក្រុងសិរីសោភ័ណ និងកំពុងត្រៀមបន្តអនុវត្តនៅក្នុងក្រុងប៉ោយប៉ែត ខេត្តបន្ទាយមានជ័យ ក្រោមកំចីឥណទានហិរញ្ញប្បទានរបស់ធនាគារអភិវឌ្ឍន៍អាស៊ី ADB មានគោលដៅសំខាន់ៗដូចជា ការងារបណ្តាញប្រព័ន្ធទឹកកខ្វក់ និងដាក់លូរំដោះទឹកក្នុងទីប្រជុំជនក្រុង ការរៀបចំអាងប្រព្រឹត្តកម្មទឹកកខ្វក់ (អាងចម្លោះ) លើផ្ទៃដី២៤ហិកតា និងការសាងសង់ទីលាន គ្រប់គ្រង ទុកដាក់សំរាម លើផ្ទៃដី១១ហិកតាជាដើមផងដែរ។

លោក អភិបាលរងខេត្ត បានបញ្ជាក់ថា យោងតាមរបាយការណ៍របស់មន្ត្រីជំនាញ និងការ ចុះជាក់​ស្តែងគិតត្រឹមខែតុលាឆ្នាំ២០២៥នេះ គម្រោងប្រព័ន្ធ ទឹកកខ្វក់ និងលូរំដោះទឹកក្នុងទីប្រជុំជន អាង​ប្រព្រឹតកម្មទឹកកខ្វក់ (អាងមោះ) ដែលសមិទ្ធផលទាំងនេះ ពិតជាមានសារៈ សំខាន់ណាស់​សម្រាប់​ប្រជាពលរដ្ឋក្នុងទីប្រជុំជនក្រុង តាមរយៈការលើកកំពស់វិស័យបរិស្ថាន។ កន្លងមក ក្រុមការងារ​បច្ចេកទេស បានសិក្សា និងកំណត់ទីតាំងសម្រាប់សាងសង់អគារ និងទីធ្លាសម្រាប់ញែក សម្អាត​សម្រាមដែលស្ថិតនៅក្បែរទីលានលើផ្ទៃដីចំនួន២ហិកតា ដូច្នេះ រដ្ឋបាលខេត្តសូមគាំទ្រ​ចំពោះទីតាំង​នៅជាប់នឹងទីលានថ្មី មានហេដ្ឋារចនាសម្ព័ន្ធស្រាប់ និងកាត់បន្ថយចំណាយនៅពេលប្រតិបត្តិការ បង្កើនប្រសិទ្ធភាពលើការគ្រប់គ្រងទីលាន។

លោកបានឲ្យដឹងទៀតថា ដើម្បីធានានិរន្តភាពការងារគ្រប់គ្រង ខេត្ត បានបង្កើត​គណៈកម្មការ​គ្រប់គ្រង​ប្រតិបត្តិការទីលាន ដោយយកបទ ពិសោធន៍ពីរាជធានី ខេត្ត ដែលមានបទពិសោធន៍​រួចហើយ ខេត្ត បានប្តេជ្ញាជួយគាំទ្រដល់ ក្រុង ស្រុក ឱ្យរៀបចំតារាងតម្លៃ ប្រមូលសេវានៅតាមទីតាំង​អាជីវកម្ម លំនៅដ្ឋាន និងគ្រឹះស្ថានសាធារណៈនានាផងដែរ៕ឃិនសារិទ្ធ