មហោស្រពភាពយន្តខ្លីចតុមុខលើកទី១៤ បិទបញ្ចប់ កំពុងត្រៀមឆ្ពោះទៅកាន់ខួបទី១៥

ភ្នំពេញ ៖ ព្រឹត្តិការណ៍ភាពយន្តខ្លីអន្តរជាតិលំដាប់កំពូលរបស់កម្ពុជា បានបញ្ចប់ដោយជោគជ័យមួយលើក ដែលផ្តោតលើការផ្លាស់ប្តូរផ្ទាល់ខ្លួន និងប្រកាសពីគំនិតផ្តួចផ្តើមថ្មីចំនួន ១៥សម្រាប់ឆ្នាំគម្រប់ខួបដ៏សំខាន់នេះ។

​មហោស្រពភាពយន្តខ្លីចតុមុខ លើកទី១៤ ជាមហោស្រពភាពយន្តខ្លីអន្តរជាតិដំបូងគេ និងតែមួយគត់ នៅកម្ពុជា បានបិទបញ្ចប់ដោយជោគជ័យនូវការប្រារព្ធរយៈពេលបួនថ្ងៃ ចាប់ពីថ្ងៃទី១៧ ដល់ថ្ងៃទី ២០ ខែតុលា ឆ្នាំ២០២៥ ដែលជាការបញ្ចប់ទៅជំនាន់នេះបង្កប់នូវខ្លឹមសារនាំឱ្យយើងបានស្វែងយល់យ៉ាងស៊ីជម្រៅអំពីប្រធានបទ «ការផ្លាស់ប្តូរ»។ រៀបចំឡើងដោយ «ក្រុមភាពយន្តឈូករ័ត្ន» មហោស្រពនេះបានអបអរសាទរថាមពលនៃការផលិតរឿងខ្លី ដោយចាប់យកនូវអារម្មណ៍សហគមន៍ និងស្នាដៃសិល្បៈឆ្នៃប្រតិដ្ឋនៃការប្រាប់រឿងដ៏លេចធ្លោ។

លោក ស៊ុ ស៊ីថែន ប្រធានមហោស្រពចតុមុខ ហៅកាត់ថា CSFF និងជាស្ថាបនិក «ក្រុមភាពយន្តឈូករ័ត្ន» បានមានប្រសាសន៍ថា ការសម្លឹង ឃើញការកើនឡើងយ៉ាងច្បាស់នៃគុណភាព និងការកើនឡើងនៃការសម្តែងការចាប់អារម្មណ៍ពី សមិទ្ធិករភាពយន្ត អន្តរជាតិដើម្បីមកចូលរួមមហោស្រពដោយផ្ទាល់ និងដើម្បីមកទស្សនាកម្ពុជា បានផ្តល់ឱ្យយើងនូវមោទនភាពយ៉ាងខ្លាំង។ មហោស្រពនេះគឺលើសពីព្រឹត្តិការណ៍មួយ វាក៏ជាកន្លែងដ៏សំខាន់មួយដើម្បីផ្សព្វផ្សាយពីកម្ពុជា ទៅកាន់តំបន់ និងពិភពលោកទាំងមូលនៃការចូលរួមរបស់យើងក្នុងការផ្តល់ឱកាសនៃការផ្លាស់ប្តូរវប្បធម៌ និងធ្វើឱ្យយើងទៅកាន់តែកៀក ជាងមុនជាមួយពិភពលោកក្នុងភាសាភាពយន្តសាកល ហើយយើងប្តេជ្ញាចិត្តជាងពេលណាៗទាំងអស់ដើម្បីបំផុសគំនិត ដល់សមិទ្ធិករភាពយន្តកម្ពុជាយើងជំនាន់ក្រោយដើម្បីចូលរួមជាសកម្មក្នុងការអភិវឌ្ឍន៍វិស័យភាពយន្ត ជាមួយនឹងដៃគូគាំទ្រនានារបស់យើង។

មហោស្រពនេះត្រូវបានគូសបញ្ជាក់ដោយភាពយន្តខ្នាតខ្លីជាប់ពាក់ព័ន្ធទៅនឹងប្រធានបទ «ការផ្លាស់ប្តូរ» ហើយស្នាដៃ ចំនួនបីសុទ្ធតែឈ្នះពានរង្វាន់ដូចជា៖ ភាពយន្តខ្លីខ្មែរល្អបំផុត (Winner): «ចៅសំណព្វចិត្ត»ទាក់ទងនឹង «ជំនាន់» ។ ភាពយន្តខ្លីខ្មែរល្អបំផុត លេខ២ (Second Place): «គ្រាំចិត្ត» ទាក់ទងនឹង «ទំនាក់ទងដៃគូ»។ ភាពយន្តខ្លីខ្មែរ «ព្រះចន្ទក្រហម» (Red Moon): ឈ្នះទាំងពានរង្វាន់ គណៈកម្មការ (Jury Mentioned award) និងពានរង្វាន់ ជម្រើសទស្សនិកជន (Audience Choice award) ដែលពានរង្វាន់ជម្រើសទស្សនិកជនមានភាពស៊ីជម្រៅជាមួយប្រធានបទ «ពេលវេលា» (Time)។

ទន្ទឹមគ្នានោះដែរ សមិទ្ធិករភាពយន្ត នៃភាពយន្តខ្លី ដែលបានឈ្នះពានរង្វាន់ បានបង្ហាញចំណាប់អារម្មណ៍រំភើបខ្លាំងណាស់ ព្រមទាំងសើចសប្បាយ ជាពិសេសមហោស្រពនេះបានផ្តល់នូវឱកាសដំបូងដើម្បីមើលភាពយន្ត នៅលើកញ្ចក់អេក្រង់ធំ ដែលជាបទពិសោធន៍សិក្សាដ៏ធំមួយ ហើយវាបានបំផុសគំនិតឱ្យបន្តកែលម្អការងារ បន្តែមទៀតឱ្យកាន់តែ ប្រសើឡើង។

នាឱកាសនោះ ឯកឧត្តម ហ៊ីម សុទិត្យា រដ្ឋលេខាធិការក្រសួងព័ត៌មាន បានថ្លែងថា ភាពយន្តគឺជាឧបករណ៍ដ៏មានឥទ្ធិពលដែលដើរតួយ៉ាងសំខាន់ក្នុងការឆ្លុះបញ្ចាំងពីវប្បធម៌ និងអត្តសញ្ញាណជាតិរបស់យើងទៅកាន់ប្រជាជនយើង និងពិភពលោក។ វេទិកាដូចជាមហោស្រពភាពយន្តខ្លីចតុមុខបង្កើតឱកាសដ៏មានតម្លៃ សម្រាប់សមិទ្ធិករវ័យក្មេងរបស់យើង ដើម្បីបញ្ចេញពន្លឺ និងតំណាងឱ្យប្រទេសកម្ពុជាជាលក្ខណៈអន្តរជាតិ។ យើងគាំទ្រយ៉ាងពេញទំហឹងចំពោះបេសកកម្មនេះដើម្បីបន្តជំរុញភាពយន្តខ្មែរទៅមុខ៕

អត្ថបទ រដ្ឋា