អភិបាលខេត្តកណ្ដាលអំពាវនាវដល់បងប្អូនប្រជាពលរដ្ឋមកទទួលយកបណ្ណកម្មសិទ្ធិដីធ្លីឱ្យបានគ្រប់ៗគ្នា

កណ្ដាល៖ ឯកឧត្តម គួច ចំរើន អភិបាលខេត្តកណ្ដាល អំពាវនាវឱ្យបងប្អូនប្រជាពលរដ្ឋ មក​ទទួល​បណ្ណ​កម្មសិទ្ធិដីធ្លីឱ្យបានគ្រប់ៗគ្នា ដើម្បីយកទៅប្រើប្រាស់តាមតម្រូវការរបស់បងប្អូន ក្នុង​រយៈ​ពេល​ដែលមន្ទីររៀបចំដែនដី នគររូបនីយកម្ម សំណង់ និងសុរិយោដីខេត្តកណ្ដាល ចុះ​ចែក​ជូន​ដល់​មូលដ្ឋានផ្ទាល់គិតមកដល់ពេលនេះ មន្ទីររៀបចំដែនដីនគររូបនីយកម្ម សំណង់ និង​សុរិយោ​ដីខេត្តកណ្ដាល បានធ្វើការចេញវិញ្ញាបនបត្រសម្គាល់ម្ចាស់អចលនវត្ថុ បានជាង ៤០​ម៉ឺន​បណ្ណ និងធ្វើការចែកបណ្ណ ជូនដល់ដៃប្រជាពលរដ្ឋ បានប្រមាណជាង ៣០ម៉ឺនបណ្ណ ហើយ​នៅ​សល់​ប៉ុន្មាន​ជាង ១១ម៉ឺនបណ្ណទៀត ប្រជាពលរដ្ឋមិនទាន់បានមកទទួលនៅឡើយទេ ដូច្នេះ​ឯកឧត្តម​អភិបាលខេត្ត បានអំពាវនាវដល់បងប្អូនប្រជាពលរដ្ឋ សូមមកទទួលបណ្ណ កម្ម​សិទ្ធិ​ដី​ធ្លី​នេះ​ឱ្យ​បាន​គ្រប់ៗគ្នា ដើម្បីយកទៅប្រើប្រាស់តាមតម្រូវការរបស់បងប្អូន។

ការអំពាវនាវនេះ ធ្វើឡើងនាព្រឹកថ្ងៃទី២១ ខែតុលា ឆ្នាំ២០២៥ ក្នុង​ពិធី​ចែក​វិញ្ញាបនបត្រ​សម្គាល់​ម្ចាស់​អចលន​វត្ថុជូនប្រជាពលរដ្ឋ ចំនួន ២ភូមិ សរុបចំនួន ៣ ០៩០ បណ្ណ ស្ថិតនៅភូមិអំពិលទឹក និង​ភូមិ​កំពង់ពោធិ៍ ឃុំកំពង់ភ្នំ ស្រុកលើកដែក ខេត្តកណ្តាល។ ឯកឧត្តម គួច ចំរើន អភិបាល​ខេត្ត​បាន​បញ្ជាក់ថា ការផ្តល់ជូននូវវិញ្ញាបនប័ត្រសម្គាល់ម្ចាស់អចលនវត្ថុ(ប្លង់រឹង) គឺផ្តល់នូវ​ការ​ធានា​បាន​នូវសិទ្ធិពេញលេញជាកម្មសិទ្ធិករស្របច្បាប់លើដីធ្លី ដូច្នេះប្រសិនបើមានអ្នកណាម្នាក់ ម​ក​រំលោភលើប័ណ្ណកម្មសិទ្ធិករស្របច្បាប់នេះ ដោយសាងសង់លំនៅឋាន ឬធ្វើអ្វីមួយ​នៅ​លើ​ដី​កម្ម​សិទ្ធិ​ករ​របស់អ្នកដទៃ នោះមានន័យថាអ្នកទាំងនោះប្រព្រឹត្តនូវអំពើល្មើសនៃច្បាប់ ដូច្នេះ​អ្នក​ទាំង​នោះ​នឹង​ត្រូវផ្ដន្ទាទោសតាមច្បាប់ដែលបានកំណត់ដោយគ្មានការលើកលែងឡើយ។ ជាមួយ​គ្នា​នេះ​ផង​ដែរ ឯកឧត្តមក៏បានសំណូមពរដល់ប្រជាពលរដ្ឋ ដែលទទួលបានបណ្ណកម្មសិទ្ធិនេះហើយ សូម​រក្សា​ទុក្ខឱ្យបានល្អ ព្រោះថាបណ្ណនេះមានអត្ថប្រយោជន៍សំខាន់ណាស់ និងមាន​ភាព​ងាយ​ស្រួល​ក្នុង​ការយកទៅប្រើប្រាស់តាមសេចក្តី ត្រូវការរបស់បងប្អូន ដូចជាយកទៅលក់, ជួល, បញ្ចាំ. ធ្វើ​អំណោយ ។ល។ ដើម្បីជាទុនក្នុងការប្រកបរបរចិញ្ចឹមជីវិតប្រចាំថ្ងៃ។

ក្នុងឱកាសនោះផងដែរ ឯកឧត្តមអភិបាលបានបញ្ជាក់ពីបញ្ហាទឹកជំនន់ឆ្នាំនេះ បា​ន​ធ្វើ​ឱ្យ​ប៉ះពា​ល់​នូវ​ហេដ្ឋា​រចនាសម្ព័ន្ធ ផ្លូវ ផ្ទះសំបែង និងស្រែចំការរបស់ប្រជាពលរដ្ឋមួយចំនួន តែ​ដោយ​មាន​ការ​យក​ចិត្ត​ទុកដាក់ពីអាជ្ញាធរពាក់ព័ន្ធគ្រប់លំដាប់ថ្នាក់ និងសាខាកាកបាទក្រហមកម្ពុជាខេត្ត ក្នុង​ការ​ជួយ​សង្គ្រោះប្រជាពលរដ្ឋបានទាន់ពេលវេលា មិនបានធ្វើឱ្យប៉ះពាល់​ធ្ងន់ធ្ងរ​ដល់​ប្រជា​ពលរដ្ឋ​ឡើយ។​ ឯកឧត្តមបានសំណូមពរដល់អាជ្ញាធរគ្រប់លំដាប់ថ្នាក់ និងប្រជាពលរដ្ឋទាំងអស់ សូម​មេត្តា​យកចិត្តទុកដាក់ខ្ពស់ចំពោះសមាជិកគ្រួសារ ពិសេសចាស់ជរា និងកុមារតូចៗ មិនត្រូវ​ឱ្យ​ពួក​គាត់​នៅ​ក្បែរ​ទឹក ឬលេងទឹកឡើយ ដែលអាចបណ្ដាលឱ្យពួកគាត់លង់ទឹកស្លាប់បាន៕