តំណាងសហគ្រាសចំនួន១៥០នាក់ ស្វែងយល់ការពង្រឹងចំណេះដឹងបច្ចេកវិទ្យាហិរញ្ញវត្ថុនៅកម្ពុជា

ភ្នំពេញ៖ គណៈកម្មាធិការសេដ្ឋកិច្ច និងធុរកិច្ចឌីជីថល (គ.ស.ធ.ឌ.) នៅថ្ងៃទី២១ ខែតុលា ឆ្នាំ២០២៥នេះ បានបញ្ចប់ការរៀបចំសិក្ខាសាលាផ្សព្វផ្សាយ ស្តីពី “ការពង្រឹងចំណេះដឹងបច្ចេកវិទ្យាហិរញ្ញវត្ថុ សម្រាប់សហគ្រាសនៅកម្ពុជា” ប្រកបដោយផ្លែផ្កា ដោយមានអ្នកចូលរួមសរុបចំនួន ១៥០នាក់ តាមរយៈការបង្កើតវេទិកាឱ្យមានការជជែកពិភាក្សាពីបច្ចេកវិទ្យាហិរញ្ញវត្ថុសម្រាប់សហគ្រាសនៅកម្ពុជា។

សិក្ខាសាលានេះ បានប្រព្រឹត្តទៅក្រោមអធិបតីភាពរបស់ ឯកឧត្តមបណ្ឌិត គង់ ម៉ារី រដ្ឋលេខាធិការក្រសួងសេដ្ឋកិច្ច និង ហិរញ្ញវត្ថុ និងជាអគ្គលេខាធិការនៃអគ្គលេខាធិការដ្ឋានគណៈកម្មាធិការសេដ្ឋកិច្ច និងធុរកិច្ចឌីជីថល និងមានការអញ្ជើញចូលរួមពីថ្នាក់ដឹកនាំ និងតំណាងក្រសួង ស្ថាប័ននៃរាជរដ្ឋាភិបាល, វិស័យឯកជន, សមាគម, គ្រឹះស្ថានអប់រំ និង ក្រុមហ៊ុនដំណោះស្រាយឌីជីថល។ សិក្ខាសាលានេះ មានគោលបំណង ពង្រឹងចំណេះដឹងទាក់ទងទៅនឹងបច្ចេកវិទ្យាហិរញ្ញវត្ថុ, ចែករំលែកបទពិសោធន៍ និងផ្ដល់វេទិកាសម្រាប់បង្កើតទំនាក់ទំនងជាមួយគ្នាក្នុងប្រព័ន្ធអេកូឡូស៊ីនៃធុរកិច្ចក្នុងសេដ្ឋកិច្ចឌីជីថល។

ឯកឧត្តមបណ្ឌិត គង់ ម៉ារី បានគូសរំលេចពីការរីកចម្រើននៃបច្ចេកវិទ្យាឌីជីថល ជាពិសេសបច្ចេក-វិទ្យាហិរញ្ញវត្ថុ ដែលក្លាយជាកម្លាំងចលករមួយដ៏ចម្បងក្នុងការជំរុញសម្ទុះកំណើនសេដ្ឋកិច្ចកម្ពុជា តាមរយៈការប្រើប្រាស់បច្ចេកវិទ្យាថ្មីៗ និងនវានុវត្តន៍ក្នុងវិស័យហិរញ្ញវត្ថុ ទាំងវិស័យធនាគារ និងវិស័យហិរញ្ញវត្ថុមិនមែនធនាគារ។ ទៀតសោត ការប្រើប្រាស់បច្ចេកវិទ្យាហិរញ្ញវត្ថុ មានដូចជា ប្រព័ន្ធទូទាត់សងប្រាក់បាគង, ខេ-អេចឃ្យូអរ (KHQR), សេវាធនាគារចល័ត (Mobile Banking), ព្រមទាំងសេវាកម្ម និង ផលិតផលបច្ចេកវិទ្យាជាច្រើនទៀត បាននិងកំពុងបំពេញតម្រូវការ និងជួយសម្រួលដល់ការរស់នៅប្រចាំថ្ងៃ និងការធ្វើសុវុឌ្ឍិកម្មសេវាហិរញ្ញវត្ថុ សម្រាប់ប្រជាពលរដ្ឋទូទៅ និងសហគ្រាសផងដែរ។

នៅក្នុងដំណើរការនៃសិក្ខាសាលានេះ មានបទបង្ហាញចំនួន២ ដែលផ្តោតលើ៖ ១. ទិដ្ឋភាពទូទៅ និងការអភិវឌ្ឍបច្ចេកវិទ្យាហិរញ្ញវត្ថុនៅកម្ពុជា, ២.ស្វែងយល់ពីបច្ចេកវិទ្យាហិរញ្ញវត្ថុ៖ ហេតុអ្វីបានជាបច្ចេកវិទ្យាហិរញ្ញវត្ថុមានសារៈសំខាន់សម្រាប់សហគ្រាសធុនតូច និង មធ្យម និងកិច្ចពិភាក្សាចំនួន ១ លើប្រធានបទ “ការទាញយកអត្ថប្រយោជន៍៖ តើអ្វីជាអាទិភាពគន្លឹះដែលសហគ្រាសធុនតូច និងមធ្យម គួរតែស្វែងយល់ពីបច្ចេកវិទ្យាហិរញ្ញវត្ថុនៅកម្ពុជា”។ បទបង្ហាញនីមួយៗបានផ្តល់ជាព័ត៌មានមូលដ្ឋានបទពិសោធន៍ឧត្តមានុវត្តន៍ និងការបណ្តុះបណ្តាលពាក់ព័ន្ធនឹងចំណេះដឹងហិរញ្ញវត្ថុឌីជីថល និងជំនាញបច្ចេកវិទ្យាថ្មីៗ ដល់ធុរជន ម្ចាស់អាជីវកម្ម សហគ្រាសនៅកម្ពុជា និងអ្នកចូលរួម៕ អត្ថបទ៖ ឈិត បូរ៉ាវី