កម្ពុជា​ និង​ក្រូអាស៊ី​ នឹងពិនិត្យលទ្ធភាពបង្កើតឱ្យមានកិច្ច​សហប្រតិបត្តិការ​រវាង​គ្នា​ក្នុង​វិស័យ​សកម្មភាព​មីន​

ថ្ងៃ​​ទី២២ ខែតុលា ឆ្នាំ២០២៥ ក្នុងឱកាសចូលរួមសន្និសីទស្តីពីសកម្មភាពមីនអ៊ុយក្រែន នៅទីក្រុងតូក្រូប្រទេសជប៉ុន ឯកឧត្តមបណ្ឌិត លី ធុជ ទេសរដ្ឋមន្ត្រី អនុប្រធានទី១អាជ្ញាធរមីន បានជួបពិភាក្សាទ្វេភាគីជាមួយ ឯកឧត្តម GORDAN GRLIĆ RADMAN រដ្ឋមន្ត្រីការបរទេស និងកិច្ចការអឺរ៉ុបនៃសាធារណរដ្ឋក្រូអាស៊ី។

ក្នុងជំនួបនោះ ឯកឧត្តម GORDAN GRLIĆ RADMAN បានកោតសរសើរ និងវាយតម្លៃខ្ពស់ដល់កិច្ចខិតប្រែងក្នុងសកម្មភាពមីនមនុស្សធម៌របស់កម្ពុជា និងគ្រោងនឹងចាប់ផ្តើមកិច្ចសហប្រតិបត្តិការជាមួយកម្ពុជាក្នុងវិស័យសកម្មភាពមីន តាមរយៈអនុស្សរណៈនៃការយោគយល់គ្នា។ ឯកឧត្តម GORDAN GRLIĆ RADMAN ក៏បានលើកឡើងដែរថា កម្ពុជា គឺជាទីតាំងសំខាន់សម្រាប់ក្រូអាស៊ី ក្នុងការបង្កើនបណ្តាញទំនាក់ទំនងនៅក្នុងតំបន់អាស៊ាន ក៏ដូចជាតំបន់អាស៊ីប៉ាស៊ីហ្វិកទាំងមូល ហើយឯកឧត្តម នឹងអញ្ជើញធ្វើទស្សនកិច្ចមកកម្ពុជាដើមឆ្នាំ២០២៦ ដោយមានការចូលរួមជាមួយដោយវិនិយោគគិន និងអ្នកជំនាញពាណិជ្ជកម្ម ដើម្បីស្វែកយល់ និងបង្កើនកិច្ចសហការក្នុងវិស័យសំខាន់ៗ ដូចជា ពាណិជ្ជកម្ម ទេសចរណ៍ ថាមពល និងរួមទាំងវិស័យមីនផងដែរ។

ឯកឧត្តបណ្ឌិត លី ធុជ វាយតម្លៃខ្លស់ចំពោះឯកឧត្តម GORDAN GRLIĆ RADMAN ក៏ដូចជាប្រទេសក្រូអាស៊ី ដែលមើលឃើញពីសក្តានុពលរបស់កម្ពុជា និងបានលើកឡើងដែរថា កម្ពុជាមានបរិយាកាសវិនិយោគអំណោយផល មានភាពប្រកួតប្រជែងខ្ពស់ និងមានបណ្តាញហេដ្ឋារចនាសម្ព័ន្ធពាណិជ្ជកម្មរឹងមាំ ដែលជាលក្ខណៈពិសេសសម្រាប់ការវិនិយោគរបស់ក្រូអាស៊ី។ ឯកឧត្តមទេសរដ្ឋមន្ត្រី លើកឡើងផងដែរថា កម្ពុជា ត្រៀមខ្លួនរួចរាល់ ក្នុងកិច្ចសហការជាមួយក្រូអាស៊ី ក្នុងវិស័យសកម្មភាពមីន ហើយភាពជោគជ័យ បទពិសោធន៍ និងជំនាញរបស់កម្ពុជា នឹងធ្វើឱ្យកម្ពុជា ក្លាយជាដៃគូដ៏សំខាន់របស់ក្រូអាស៊ី ក្នុងកិច្ចការសកម្មភាពមីន ទាំងក្នុងតំបន់ និងទូទាំងពិភពលោក៕