ក្រសួងពាណិជ្ជកម្ម ពង្រឹងកិច្ចសហការ ជាមួយ ក្រុមប្រឹក្សាអភិវឌ្ឍន៍ពាណិជ្ជកម្ម នៃទីក្រុងហុងកុង

នៅទីស្ដីការក្រសួងពាណិជ្ជកម្ម ឯកឧត្តម លីម ឡោកពិសិដ្ឋ រដ្ឋលេខាធិការក្រសួងពាណិជ្ជកម្ម បានទទួលជួបពិភាក្សាការងារជាមួយនឹងគណៈប្រតិភូក្រុមប្រឹក្សាអភិវឌ្ឍន៍ពាណិជ្ជកម្ម នៃទីក្រុងហុងកុង (HKTDC) ដែលដឹកនាំដោយ លោកស្រី Tina Phan ប្រធានប្រចាំតំបន់ឥណ្ឌូចិន នៃក្រុមប្រឹក្សាអភិវឌ្ឍន៍ពាណិជ្ជកម្មទីក្រុងហុងកុង។

កិច្ចជំនួប មានគោលបំណងដើម្បីតាមដានវឌ្ឍនភាពនៃការអនុវត្តអនុស្សរណៈយោគយល់គ្នារវាងក្រសួងពាណិជ្ជកម្ម និងក្រុមប្រឹក្សាអភិវឌ្ឍន៍ពាណិជ្ជកម្មទីក្រុងហុងកុង, ពិភាក្សាលើសកម្មភាពពាក់ព័ន្ធនាំយកផលិតផល និងក្រុមហ៊ុនពីកម្ពុជាទៅកាន់ព្រឹត្តិការណ៍ពាណិជ្ជកម្មសំខាន់នៅទីក្រុងហុងកុង, ការចាប់ដៃគូអាជីវកម្មរវាងធុរជនកម្ពុជា និងហុងកុង ព្រមទាំងការពង្រឹង និងពង្រីកកិច្ចសហប្រតិបត្តិការតាមរយៈការផ្លាស់ប្តូរ និងចូលរួមព្រឹត្តិការណ៍ពាណិជ្ជកម្មនានាទាំងនៅកម្ពុជា និងទីក្រុងហុងកុង។

គួរបញ្ជាក់ថា កិច្ចជំនួបនេះ ធ្វើឡើងនៅថ្ងៃអង្គារ ទី២១ ខែតុលា ឆ្នាំ២០២៥ នេះ ដោយមានការចូលរួមពីតំណាងអគ្គនាយកដ្ឋានជំរុញពាណិជ្ជកម្ម អគ្គនាយកដ្ឋានពាណិជ្ជកម្មអន្តរជាតិ និងមន្រ្តីជំនាញនៃនាយកដ្ឋានអភិវឌ្ឍន៍ទីផ្សារ៕