អភិបាលខណ្ឌច្បារអំពៅ សំណេះសំណាល សួរសុខទុក្ខបងប្អូនបោសសម្អាតក្រុមហ៊ុនស៊ិនទ្រី ក្នុងមូលដ្ឋាន

លោក ចេង មុនីរ៉ា អភិបាលខណ្ឌ និងជាប្រធានកិត្តិយសអនុសាខាកាកបាទក្រហម​ខណ្ឌច្បារ​អំពៅ នៅថ្ងៃទី២៣ ខែតុលា ឆ្នាំ២០២៥ បានចុះជួបសំណេះសំណាល សួរសុខទុក្ខ និងផ្តល់​អំណោយ​កាកបាទក្រហម ជូនបុគ្គលិកផ្នែកបោសសម្អាតក្រុមហ៊ុនស៊ិនទ្រី ក្នុងខណ្ឌច្បារអំពៅ ចំនួន១៦នាក់ ។

នាឱកាសនោះ លោក ចេង មុនីរ៉ា បានថ្លែងអរគុណដល់បងប្អូនបុគ្គលិក ផ្នែកបោសសម្អាតក្រុមហ៊ុនស៊ិនទ្រី ដែលបានរួមចំណែក ធ្វើឲ្យមូលដ្ឋានខណ្ឌច្បារអំពៅ គ្មានសំរាម បានយកចិត្ដទុកដាក់កាន់តែខ្ពស់ ក្នុងការលើកកម្ពស់អនាម័យភូមិឋាន និងអនាម័យស្អាតល្អ ដែលកិច្ចការទាំងនេះ នឹងរួមចំណែកថែរក្សាសុខភាពប្រជាពលរដ្ឋយ៉ាងល្អក្នុងមូលដ្ឋាន។

ឆ្លៀតឱកាសនោះ លោក ចេង មុនីរ៉ា សូមផ្តាំផ្ញើ និងអំពាវនាវដោយបំផុសស្មារតីប្រជាពលរដ្ឋក្នុងមូលដ្ឋាន សូមកុំយកសំរាមទៅដាក់លើគំរបលូ មាត់លូ ត្រូវវេចខ្ចប់សំរាម ទុកដាក់សំរាមនៅផ្ទះរៀងៗខ្លួន ពិសេសត្រូវបញ្ចេញសំរាមតាមពេលម៉ោងកំណត់ ដើម្បីរថយន្តដឹកជញ្ជូនសំរាម។

ជាមួយគ្នានេះ លោក ចេង មុនីរ៉ា ក៏បានធ្វើការណែនាំដល់បុគ្គលិកក្រុមហ៊ុនស៊ិនទ្រី អំពីការកាយកាកសំណល់រឹង និងកាកសំណល់ផ្សេងៗ ចេញពីមាត់លូ និងអណ្តូងលូផងដែរ ដែលធ្វើឲ្យភូមិឋានមានបរិស្ថានល្អស្អាត។

សូមជម្រាបថា អំណោយកាកបាទក្រហម ជូនបុគ្គលិកផ្នែកបោសសម្អាតក្រុមហ៊ុនស៊ិនទ្រី ក្នុងខណ្ឌច្បារអំពៅ ដោយក្នុង១នាក់ ទទួលបានអង្ករ១បាវ, មី១កេស, ភេសជ្ជៈ១កេស និងថវិកា៣០,០០០រៀល ៕ លីហេង