ព័ត៌មាន
គម្រោងព្រែកជីកហ្វូណនតេជោ ធ្វើឲ្យកម្ពុជាចំណេញថ្លៃដឹកជញ្ជូនពី ២០០ ទៅ ៣០០ ដុល្លារ
លោក ស៊ុន ចាន់ថុល បានគូសបញ្ជាក់ថា ទំនិញចេញពីកម្ពុជាជាង ៣០% បានដឹកឆ្លងកាត់ប្រទេសវៀតណាម។ អីចឹងទេ តាមរយៈគម្រោងព្រែកជីកហ្វូណននឹងសម្រួលថ្លៃដឹកជញ្ជូន ធ្វើឲ្យកម្ពុជាមានលទ្ធភាព…
បើតាមការគូសបញ្ជាក់ពីលោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទីមួយក្រុមប្រឹក្សាអភិវឌ្ឍកម្ពុជា គម្រោងព្រែកជីកហ្វូនណនតេជោ អាចធ្វើឲ្យថ្លៃដឹកជញ្ជូនទំនិញចេញពីកម្ពុជាចំណេញប្រហែល ២០០ ដុល្លារ ទៅ ៣០០ ដុល្លារ ដោយមិនបាច់ឆ្លងកាត់ប្រទេសវៀតណាម។
លោក ស៊ុន ចាន់ថុល បានគូសបញ្ជាក់ថា ទំនិញចេញពីកម្ពុជាជាង ៣០% បានដឹកឆ្លងកាត់ប្រទេសវៀតណាម។ អីចឹងទេ តាមរយៈគម្រោងព្រែកជីកហ្វូណននឹងសម្រួលថ្លៃដឹកជញ្ជូន ធ្វើឲ្យកម្ពុជាមានលទ្ធភាពប្រកួតប្រជែងថ្លៃដឹកជញ្ជូនជាមួយប្រទេសជិតខាង។ «៣៣ ភាគរយនៃទំនិញអន្តរជាតិរបស់កម្ពុជាដឹកចេញទៅខាងវៀតណាម ដោយសារទំនិញចូលតាមកំពង់ផែស្វយ័តភ្នំពេញ ហើយការដឹកជញ្ជូនតាមផ្លូវទឹកថោកជាង។ ការដឹកតាមច្រកកំពង់ផែប្រទេសវៀតណាម ដោយសារនៅវៀតណាមមានកប៉ាល់ធំៗមានលទ្ធភាពដឹកបានច្រើនទៅអឺរ៉ុបនិងអាមេរិកដោយផ្ទាល់»។ លោក ស៊ុន ចាន់ថុល បន្ថែម។
លោកបន្តថា ផែទឹកជ្រៅខេត្តព្រះសីហនុបច្ចុប្បន្នអាចទទួលបាននាវាដឹកជញ្ជូនបានត្រឹម ១៨ ភាគរយទេ ហើយកប៉ាល់យក្សធំៗមិនអាចចូលដឹកជញ្ជូនបានទេ។ ប៉ុន្តែថ្ងៃក្រោយរំពឹងទុកថា នៅពេលមានផែទឹកជ្រៅនៅខេត្តព្រះសីហនុសាងសង់រួចរាល់ និងព្រែកជីកហ្វូណនតេជោទៀតនោះ នឹងសម្រួលការដឹកជញ្ជូនតាមកំពង់ផែប្រទេសកម្ពុជាមិនបាច់ប្រើប្រាស់កំពង់ផែប្រទេសជិតខាងនោះទេ។ ទាក់ទងគម្រោងព្រែកជីកហ្វូនណនតេជោ លោក ស៊ុន ចាន់ថុល ក៏បានបញ្ជាក់ជាថ្មីដើម្បីបំភ្លឺជុំវិញការចោទប្រកាន់ដោយមានមតិជ្រុលនិយមមួយចំនួនថា គម្រោងព្រែកជីកនេះធ្វើឲ្យកម្ពុជាខាតបង់និងប៉ះពាល់ដល់បរិស្ថាននោះ ដោយលោកបានអះអាងថា ជាការលើកឡើងដោយគ្មានមូលដ្ឋាន។ លោកថា គម្រោងព្រែកជីកនេះ បានសិក្សាទាំងផលប៉ះពាល់បរិស្ថាន ការសិក្សាលំហូរទឹកចេញចូល ផលប៉ះពាល់ចំពោះសង្គម និងផ្នែកផ្លូវច្បាប់។ ការសិក្សាសាងសង់ព្រែកជីកបានប្រើប្រាស់ពេលជាង ២៤ ខែ ដោយអ្នកជំនាញបរទេសមានទាំងអ្នកបច្ចេកទេសជប៉ុន និងប្រទេសចិនជាដើម។
លោក ស៊ុន ចាន់ថុល បានអះអាងថា ការសិក្សាគម្រោងព្រែកជីកហ្វូណនតេជោ មានការសិក្សារួមគ្នារវាងក្រុមអ្នកជំនាញបច្ចេកទេសជាតិ និងអន្តរជាតិចំនួន ៤២ នាក់ ហើយការសិក្សាត្រូវបានធ្វើឡើងទាំងនៅលើដីផ្ទាល់និងប្រើឧបករណ៍សិក្សាពីលើអាកាស។ លោកបន្តថា គម្រោងព្រែកជីកដែលមានប្រវែងប្រមាណ ១៨០ គីឡូម៉ែត្រ មិនមែនអភិវឌ្ឍន៍លើដីថ្មីទាំងស្រុងនោះទេ ពោលគឺអភិវឌ្ឍន៍តាមគំរូព្រែកចាស់ដែលត្រូវបានប្រើប្រាស់តាំងពី២ ០០០ ឆ្នាំមកម្ល៉េះ។ ដូច្នេះការអភិវឌ្ឍន៍គម្រោងនេះ គ្រាន់តែពង្រីកទំហំទទឹង និងជីកឱ្យជ្រៅជាងមុន ដែលអាចធ្វើឱ្យនាវាចំណុះ ៣ ពាន់តោនអាចធ្វើចរាចរណ៍បានតែប៉ុណ្ណោះ។ លោក ស៊ុន ចាន់ថុល ថា តាមរយៈគម្រោងព្រែកជីកហ្វូណនតេជោ អាចធ្វើឲ្យកម្ពុជាមានឯករាជ្យភាព និងផ្តល់គុណប្រយោជន៍មិនអាចកាត់ថ្លៃសម្រាប់អនាគតកម្ពុជា។ គម្រោងព្រែកជីកដែលគ្រោងចាយទុនជាង ១ ៧០០ លានដុល្លារ ជាគម្រោងសាងសង់ដោយឯកជន មិនបានប្រើប្រាស់ថវិកាជាតិនោះទេ។ លោក ស៊ុន ចាន់ថុល បានបញ្ជាក់បន្ថែម។ ទាក់ទងគម្រោងព្រែកជីកនេះ ដែលថាដើម្បីសម្រួលកងទ័ពចិន ជាការមូលបង្កាច់ ១០០ % ។ នេះបើតាមលោក ស៊ុន ចាន់ថុល។ លោកថា រដ្ឋធម្មនុញ្ញកម្ពុជាបានកំណត់ច្បាស់ហើយថា មិនអនុញ្ញាតឲ្យបរទេសដាក់កងទ័ពប្រើប្រាស់ទឹកដីកម្ពុជានោះទេ។
ថ្លែងនៅក្នុងជំនួបជាមូយសមាគមឧកញ៉ាកាលពីនៅយប់ថ្ងៃទី២៦ ខែមេសា ឆ្នាំ២០២៤ អតីតនាយករដ្ឋមន្រ្តីកម្ពុជា សម្តេចតេជោ ហ៊ុន សែន បានប្រកាសដាច់អហង្ការថានឹងឲ្យគម្រោងព្រែកជីកតេជោសម្រេចឲ្យបានទោះបីត្រូវបង់តម្លៃណាក៏ដោយ។ សម្តេចថា គម្រោងព្រែកជីកនេះជាតម្រូវការរបស់កម្ពុជា ព្រោះព្រែកជីកនេះនឹងផ្តល់អត្ថប្រយោជន៍ជាច្រើន រួមទាំងការដឹកជញ្ជូន ការផលិតត្រី ជលផល និងជីវភាពរស់នៅ ហើយនឹងអាចបញ្ចៀសទឹកជំនន់នៅក្នុងខេត្តមួយចំនួនផងដែរ។ ដោយមានជំនឿចិត្តថា កម្ពុជាត្រូវតែសាងសង់ព្រែកជីកហ្វូណន-តេជោឱ្យបាន សម្តេចបានលើកឡើងថា បើទោះបីជាកម្ពុជា មិនអាចរកទុនពីបរទេសមកវិនិយោគក្តី ក៏កម្ពុជាត្រូវរកទុនក្នុងស្រុកតាមរយៈអ្នកឧកញ៉ា និងឧកញ៉ា ដែលជាអ្នកមានធនធាន។ សម្តេចតេជោ ហ៊ុន សែន សង្កត់ធ្ងន់ថា សម្តេចនឹងឈរជាប់ជាមួយរាជរដ្ឋាភិបាល គាំទ្ររាជរដ្ឋាភិបាល ក្នុងការកៀរគរទុនមកវិនិយោគឱ្យខានតែបាន ព្រោះគម្រោងនេះផ្តល់ប្រយោជន៍យ៉ាងធំធេងសម្រាប់ប្រជាជនកម្ពុជា៕
ប្រភពអត្ថបទ ៖ កម្ពុជាថ្មី
-
ព័ត៌មាន1 week agoនាយខណ្ឌរដ្ឋបាលជលផលខេត្តកណ្តាល បានព្រមានចាត់វិធានការក្តៅ ដោយគ្មានការលើកលែងចំពោះជនប្រព្រឹត្តបទល្មើសនេសាទដោយខុសច្បាប់
-
ព័ត៌មាន1 week agoរោងចក្រផ្តុំ និងដំឡើងរថយន្តដ៏ធំមួយនៅខេត្តកំពង់ឆ្នាំងនឹងសម្ភោធដាក់អោយដំណេីរការជាផ្លូវការ ស្អែកនេះក្រោមអធិបតីភាពដ៏ខ្ពង់ខ្ពស់សម្តេចធិបតី ហ៊ុន ម៉ាណែត
-
ព័ត៌មាន1 week agoសម្ដេចធិបតី ប្រកាសឆ្មក់ចុះពិនិត្យតាមមណ្ឌលសុខភាពនៅម៉ោង២ទៀបភ្លឺ ដើម្បីប្រាកដថាបើក២៤ម៉ោង
-
ព័ត៌មាន1 week agoសម្ដេចតេជោលើកទឹកចិត្តឱ្យកម្ពុជា និងស៊ីបរកឱកាស និងយន្តការថ្មីៗជំរុញការវិនិយោគ និងពាណិជ្ជកម្មទ្វេភាគីឱ្យកាន់តែរីកចម្រើន
-
ព័ត៌មាន7 days agoមុខជំនាញចំនួន ២ ដែលមានការគាំទ្រពីយុវជន និងលេចធ្លោជាងគេ នៅក្នុងវិទ្យាស្ថានពហុបច្ចេកទេសខេត្ដកោះកុង (PIKK)
-
ព័ត៌មាន3 days agoឧត្តមសេនីយ៍ទោ ប៊ុន សុសិក្ខា៖វត្តុតាងមួយចំនួនធំ ត្រូវបានដកហូតក្នុងប្រតិបត្តិការបង្ក្រាប Online Scams រយៈពេល១ឆ្នាំមកនេះ
-
ព័ត៌មាន6 days agoលោកជំទាវ ហ៊ុន ម៉ាណា អញ្ជើញប្រគេនទេយ្យវត្ថុដល់វត្តចំនួន៨ ,ចែកអំណោយជូនប្រជាពលរដ្ឋចំនួន៥៦៨គ្រួសារ និងចែកកាតាបដល់សិស្សានុសិស្ស៧០០នាក់ នៅឃុំកំពង់ភ្លុក ស្រុកប្រាសាទបាគង ខេត្តសៀមរាប
-
ព័ត៌មាន1 week agoក្រុមហ៊ុន-សហគ្រាសចិនជាង៤០ បង្ហាញពីគម្រោងចង់បោះទុនវិនិយោគនៅខេត្តកំពង់ស្ពឺ