តំណាងរាស្រ្តមណ្ឌលខេត្តបន្ទាយមានជ័យ ចុះសួរសុខទុក្ខកងនគរបាល និងកងរាជអាវុធហត្ថ នៅស្រុកអូរជ្រៅ

ឯកឧត្តម ខេង ស៊ុម តំណាងរាស្រ្តមណ្ឌលខេត្តបន្ទាយមានជ័យ និងជាសមាជិកគណៈកម្មការផែនការ វិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍ជនបទ បរិស្ថាន ធនធានទឹក និង ឧតុនិយម (គណៈកម្មការទី៣) នៃរដ្ឋសភា បានអញ្ជើញចុះសួរសុខទុក្ខកងនគរបាល និងកងរាជអាវុធហត្ថដែលប្រចាំការ នៅភូមិព្រៃចាន់ ឃុំអូរបីជាន់ ស្រុកអូរជ្រៅខេត្តបន្ទាយមានជ័យ នាព្រឹកថ្ងៃទី២៤ ខែតុលា ឆ្នាំ២០២៥។

ក្នុងឱកាសនោះដែរ ឯកឧត្តម ខេង ស៊ុម បានអំពាវនាវដល់បងប្អូនជនរួមជាតិទាំង អស់គ្នាបន្តជឿជាក់លើថ្នាក់ដឹកនាំរាជរដ្ឋាភិបាលបន្តវេននីតិកាលទី៧ នៃរដ្ឋសភា ក្នុងការថែរក្សាសុខសន្តិភាព និងការពារបូរណភាពដែនដី។

ឯកឧត្តម បានគូសបញ្ជាក់ថា ប្រជាពលរដ្ឋទាំងអស់គ្នាគឺជាកម្លាំងមួយដ៏កក់ក្ដៅពោរពេញទៅដោយថាមពលរបស់រាជរដ្ឋាភិបាល និងបងប្អូនកងកម្លាំងប្រដាប់អាវុធដែលជាខឿនការពារជាតិមាតុភូមិយើង។

ក្នុងឱកាសនោះ ឯកឧត្តមបានឧបត្ថម្ភទឹកបរិសុទ្ធ និងថវិកាមួយចំនួនជូនដល់កងកម្លាំងប្រដាប់អាវុធ និងការផ្ដាំផ្ញើសួរ សុខទុក្ខពី សម្ដេចមហារដ្ឋសភាធិការបតី ឃួន សុដារី ប្រធានរដ្ឋសភា និងថ្នាក់ដឹកនាំ ជូនចំពោះបងប្អូនប្រជាពលរដ្ឋដែលកំពុងឈរជើងរស់នៅទីនោះដោយសេចក្ដីនឹករលឹកបំផុត និងសូមមេត្តាអត់ធ្មត់រង់ចាំការរកដំណោះស្រាយដោយសន្តិវិធីជូនចំពោះបងប្អូនដែលកំពុងរងផលប៉ះពាល់ពីការឈ្លានពានរបស់កងទ័ពសៀមមកលើតំបន់ភូមិព្រៃចាន់ ស្រុកអូរជ្រៅ ខេត្តបន្ទាយមានជ័យ ផងដែរ៕