អ្នកនាំពាក្យ៖ កិច្ចប្រជុំកំពូលអាស៊ានលើកនេះ ជាកិច្ចប្រជុំពិសេស និងជាប្រវត្តិសាស្ត្រ​របស់​អាស៊ាន

មន្ត្រីជាន់ខ្ពស់រាជរដ្ឋាភិបាលកម្ពុជានៅរសៀលថ្ងៃនេះបានឱ្យដឹងថា ប្រតិភូ​កម្ពុជាដែល​អញ្ជើញ​ទៅ​ចូល​រួម​កិច្ចប្រជុំកំពូលអាស៊ានលើកនេះ មានចំនួនច្រើនជាងសព្វដង ដោយសារតែប្រតិភូកម្ពុជា ទាំង​អស់នឹងត្រូវចូលរួមជាសាក្សីក្នុងពិធីចុះកិច្ចព្រមព្រៀងសន្តិភាពរវាងកម្ពុជា និងថៃ។

ថ្លែង​នៅអាកាសយានដ្ឋានអន្តរជាតិតេជោនារសៀលថ្ងៃទី២៥ ខែតុលា ឆ្នាំ២០២៥ មុន​ចេញ​ដំណើរ​អម សម្ដេចមហាបវរធិបតីនាយករដ្ឋមន្ត្រី អញ្ជើញទៅចូ​លរួម​កិច្ច​ប្រជុំ​កំពូល​អាស៊ាន​លើក​ទី៤៧ នៅប្រទេ សម៉ាឡេស៊ី, ឯកឧត្តមបណ្ឌិត សូ ណារ៉ូ រដ្ឋមន្ដ្រីប្រតិភូ​អមនាយក​រដ្ឋ​មន្ដ្រី​បាន​ឱ្យ​ដឹង​ថា នៅក្នុងបេសក កម្មអញ្ជើញចូលរួមកិច្ចប្រជុំកំពូលអាស៊ានលើកនេះ ប្រតិភូ​កម្ពុជា​មាន​ចំនួន​សមាជិក​ច្រើន​ដោយសារត្រូវចូលរួមធ្វើជាសាក្សីនៃពិធីចុះហត្ថលេខាលើកិច្ច​ព្រមព្រៀង​សន្តិភាព​រវាង​កម្ពុជា និងថៃ ដែលមានប្រ ធានាធិបតីអាម៉េរិក, ភាគីចិន, ម៉ាឡេស៊ី និងប្រទេស​នានា​ជា​ច្រើន​ទៀត​អញ្ជើញធ្វើជាសាក្សីផងដែរ។

កិច្ចប្រជុំកំពូលអាស៊ានលើកទី៤៧ និងកិច្ចប្រជុំកំពូលពាក់ព័ន្ធ ដែលត្រូវវេនម៉ាឡេស៊ីទទួលធ្វើជាម្ចាស់ផ្ទះរៀបចំនេះមានកិច្ចប្រជុំកំពូលជាច្រើនក្នុងនោះមានដូចជា កិច្ចប្រជុំកំពូលអាស៊ាន, កិច្ចប្រជុំកំពូលចង្អៀត, កិច្ចប្រជុំកំពូលអាស៊ាន-ជប៉ុន, អាស៊ាន-ឥណ្ឌា, អាស៊ាន-កូរ៉េខាងត្បូង, អាស៊ានបូក៣, អាស៊ាន-អាស៊ីបូព៌ា, អាស៊ាន-អង្គការសហប្រជាជាតិ, អាស៊ាន-ចិន, អាស៊ាន-អូស្ត្រាលី និងអាស៊ាន-នូវែលសេឡង់ ជាដើម។ ក្រៅពីនេះក៏មានព្រឹត្តិការណ៍ជាប្រវត្តិសាស្ត្រចំនួន ២ ដែលត្រូវរៀបចំធ្វើនៅអំឡុងកិច្ចប្រជុំនេះដែរ ក្នុងនោះមានដូចជា ពិធីចុះហត្ថលេខាលើកិច្ចព្រមព្រៀងសន្តិភាពរវាងកម្ពុជា និងថៃ ព្រមទាំងការទទួលស្គាល់ប្រទេសទីម័រឡេស្តេជាសមាជិកទី១១ របស់អាស៊ានជាដើម៕ ដោយ៖ គង់ ឌិន