គណៈកម្មការនីតិកម្ម និងយុត្តិធម៌រដ្ឋសភាស្វែងយល់ពីវិស័យយុត្តិធម៌ ការអនុវត្តច្បាប់ និង​វឌ្ឍនភាពនៅខេត្តកោះកុង

ឯកឧត្តម អង្គ វង្ស វឌ្ឍានា ប្រធានគណៈកម្មការ នីតិកម្ម និងយុត្តិធម៌ នៃរដ្ឋសភា បាន​អញ្ជើញ​ដឹក​នាំ​កិច្ច​ប្រជុំស្តីពីវិស័យយុត្តិធម៌ ជាមួយលោកជំទាវ ឈី វ៉ា អភិបាល នៃ​គណៈ​អភិបាល​ខេត្ត​កោះកុ​ង ឯកឧត្តម ថុង ណារុង ប្រធានក្រុមប្រឹក្សាខេត្តកោះកុង និងលោក លោកស្រី ជាប្រធាន អនុ​ប្រធានមន្ទីរពាក់ព័ន្ធ។ កិច្ចប្រជុំ បានត្រូវធ្វើឡើងនាព្រឹកថ្ងៃទី២៧ ខែតុលា ឆ្នាំ២០២៥ នៅ សាលាខេត្តកោះកុង។

ឯកឧត្តម អង្គ វង្ស វឌ្ឍានា បានមាន ប្រសាសន៍ថា គណៈកម្មការ នីតិកម្ម និងយុត្តិធម៌ នៃរដ្ឋសភា អញ្ជើញចុះមកខេត្តកោះកុងនាពេលនេះក្នុងគោលបំណងមកសិក្សាស្វែងយល់ពីវិស័យយុត្តិធម៌ ការអនុវត្តច្បាប់ របស់ប្រធានតុលាការ សាលាដំបូង ចៅក្រម ព្រះរាជអាជ្ញា ព្រះរាជអាជ្ញារង ស្តាប់នូវរបាយការណ៍ និងសំណូមពរផ្សេងៗពីរដ្ឋបាលខេត្ត និងមន្ទីរពាក់ព័ន្ធខេត្តកោះកុងដើម្បីរួមគ្នាដោះស្រាយឱ្យប្រសើរតទៅ មុខទៀត។

លោកជំទាវ ឈី វ៉ា បានមានប្រសា សន៍ថា ក្រោមការដឹកនាំដ៏ឈ្លាសវៃដោយគិតិបណ្ឌិត និងនយោបាយ ឈ្នះ ឈ្នះ របស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាអតីតនាយករដ្ឋមន្ត្រី និងក្រោមការដឹកនាំប្រកបដោយថាមពលរបស់សម្តេចមហាបរធិបតីហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ប្រទេសជាតិយើងទទួលបានសន្តិភាព និងស្ថិរភាពទូទាំងប្រទេស ប្រជាពលរដ្ឋទាំងអស់មានសេចក្តីក្រេតអរ ទទួលបានសេចក្តីសុខសប្បាយ និងមានឱកាសអភិវឌ្ឍន៍លើគ្រប់វិស័យ។ដោយឡែកខេត្តកោះកុងទទួលបានការអភិវឌ្ឍ លើហេដ្ឋារចនាសម្ព័ន្ធរូបវ័ន្ត និងអរូបវ័ន្តហើយជីវភាពរបស់ប្រជាពលរដ្ឋត្រូវបានលើកកម្ពស់ពីមួយថ្ងៃទៅមួយថ្ងៃ។

លោកជំទាវបានបន្តថា ទន្ទឹម​នឹង នោះរដ្ឋបាលខេត្តកោះកុងបាន បន្តពង្រឹងការអនុវត្ត តួនាទីនិងភារកិច្ចស្របតាមច្បាប់ និងអនុក្រិត្យគោលនយោបាយ និងលិខិតបទដ្ឋាននានាដែលមានជាធរមានឱ្យកាន់តែមានការវិវត្តន៍រីកចម្រើនជាលំដាប់។

លោកជំទាវ បានបន្ថែមថា ខេត្តកោះកុងទន្ទឹមនឹងមានការរីកច្រើន ក៏នៅមានបញ្ហាប្រឈមមួយចំនួនដូចជាការចុះបញ្ជីដីធ្លីនៅមិនទាន់ចប់និងការអនុវត្តច្បាប់នៅមានការ លំបាកដោយប្រជាពលរដ្ឋយល់ដឹងមានកម្រិត។

ដោយឡែកឯកឧត្តម មីន មករា ប្រធានសាលាដំបូងខេត្តកោះកុង បានជម្រាបជូនពីសមិទ្ធិផលធំចំនួនពីរដែលតុលាការេខត្តកោះកុងសម្រេចបាន ទី១ ការដោះស្រាយការកកស្ទះសំណុំរឿងបាន ៩៥% មុនឆ្នាំ២០២៤ និងទី២៖សំណុំរឿងឆ្នាំ២០២៥ ដោះស្រាយបាន៩២%។

ឯកឧត្តម អង្គ វង្ស វឌ្ឍានា បានថ្លែងការកោតសរសើរនិងវាយតម្លៃខ្ពស់ ជូនរដ្ឋបាលខេត្តកោះកុង និង ឯក ឧត្តម ប្រធានសាលាដំបូងខេត្តកោះកុងចូលរួមអនុវត្តច្បាប់និងវិស័យយុត្តិធម៌បានល្អប្រសើរជាបណ្តើៗ និងកាន់តែល្អនាថ្ងៃអនាគត។ទន្ទឹមនឹងនោះ ឯកឧត្តម បានសំណូមពរ ឱ្យរដ្ឋបាលខេត្តក៏ដូចជាសាលា ដំបូងខេត្តខិតខំចូលរួមផ្សព្វផ្សាយច្បាប់បន្ថែមទៀតដល់ប្រជាពរដ្ឋដើម្បីឱ្យគាត់បានយល់និងចូលរួមអនុវត្តច្បាប់ និងគោរពច្បាប់៕