ក្រុមមិត្តភាពរដ្ឋសភាហុងគ្រី-កម្ពុជា ចូលរួមអបសារទរកិច្ចព្រមព្រៀងសន្តិភាពរវាងប្រទេសកម្ពុជា និងថៃ

ភ្នំពេញ៖ ក្រុមមិត្តភាពរដ្ឋសភាហុងគ្រី-កម្ពុជា បានចូលរួមអបសារទរកិច្ចព្រមព្រៀងសន្តិភាពដែលប្រទេសកម្ពុជា និងថៃ បានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥ នៅទីក្រុងឡាឡាំពួ ប្រទេសម៉ាឡេស៊ី ក្រោមអធិបតីភាពសាក្សីឯកឧត្តមប្រធានាធិបតីអាមេរិក ដូណាល់ ត្រាំ និងឯកឧត្តមនាយករដ្ឋមន្រ្តីម៉ាឡេស៊ី អាន់វ៉ា អ៊ីប្រាហ៊ីម។

ការប្រកាសអបអរសាទរនេះធ្វើឡើងក្នុងឱកាស ជំនួបពិភាក្សាការងារក្នុងពេលអាហារពេលល្ងាចរវាង ឯកឧត្តម ហ្សូលតាន់ វ៉ាចដា (Zoltán VAJDA) ប្រធានក្រុមមិត្តភាពរដ្ឋសភាហុងគ្រី-កម្ពុជា និងសម្ដេចប្រធានរដ្ឋសភាកម្ពុជា ឃួន សុដារី កាលពីរាត្រីថ្ងៃទី២៧ ខែតុលា ឆ្នាំ២០២៥ នៅប្រទេសហុងគ្រី។

ក្នុងឱកាស ឯកឧត្តម ហ្សូលតាន់ វ៉ាចដា បានវាយតម្លៃខ្ពស់ចំពោះលទ្ធផលដំណើរទស្សនកិច្ចផ្លូវការ និងមិត្តភាពរបស់សម្តេចប្រធានរដ្ឋសភាមកកាន់ប្រទេសហុងគ្រី។ វត្តមានរបស់ សម្តេចប្រធានរដ្ឋសភា នៅប្រទេសហុងគ្រី ជាទំព័រប្រវត្តិសាស្រ្តថ្មីមួយក្នុងការលើកម្ពស់កិច្ចសហប្រតិបត្តិការប្រទេសទំាងពីរឱ្យកាន់តែរឹងមាំឡើង។ ជាមួយគ្នានេះឯកឧត្តមប្រធានក្រុមមិត្តភាពរដ្ឋសភាហុងគ្រី-កម្ពុជាបានចូលរួមអបសារទរកិច្ចព្រមព្រៀងសន្តិភាពដែលប្រទេសកម្ពុជា និងថៃបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥ផងដែរ។

សម្តេចបានគូសបញ្ជាក់ថា សម្តេចបានរំលឹកឡើងវិញនូវលទ្ធផលដ៏សំខាន់មួយ ស្តែងចេញពីកិច្ចប្រជុំភាពជាដៃគូសភាអាស៊ី-អឺរ៉ុបលើកទី១១ (ASEP 11) ចុងឆ្នាំ២០២១ ដែលកម្ពុជាធ្វើជាម្ចាស់ផ្ទះរៀបចំ។ កិច្ចប្រជុំនោះបានដាក់ចេញនូវសេចក្តីថ្លែងការណ៍មួយ ដែលក្នុងនោះមាន គំនិតផ្តួចផ្តើមនៃកិច្ចសហប្រតិបត្តិការរវាងទន្លេដានូប និងទន្លេមេគង្គ។ គំនិតផ្តួចផ្តើមនេះ ជានិមិត្តរូបនៃកិច្ចខិតខំប្រឹងប្រែងយ៉ាងសកម្ម និងដ៏មានតម្លៃ ក្នុងការតភ្ជាប់តំបន់ រវាងតំបន់អាស៊ី និងតំបន់អឺរ៉ុប។ “យើងគួរតែខិតខំស្តារឡើងវិញនូវអរិយធម៌ដ៏សម្បូរបែបទាំងនេះ ដើម្បីតភ្ជាប់អរិយធម៌របស់យើងឱ្យមានភាពស៊ីជម្រៅថែមទៀត ដើម្បីបន្តកសាងសហថាមវន្ត សំដៅរួមចំណែកក្នុងការពង្រឹងកិច្ចសហប្រតិបត្តិការទាំងក្នុងតំបន់ និងអន្តរតំបន់ ព្រមទាំងជំរុញការយល់ដឹងពីគ្នាទៅវិញទៅមកឱ្យកាន់តែល្អប្រសើរផងដែរ” នេះជាការគូសបញ្ជាក់របស់សម្តេចប្រធានរដ្ឋសភា។

សម្តេចប្រធានរដ្ឋសភា និងសមាជិកគណៈប្រតិភូដទៃទៀត និងឯកឧត្តម ហ្សូលតាន់ វ៉ាចដា ព្រមទំាងសហការី បានពិភាក្សាគ្នាដោយបើកចំហរ ការជឿជាក់ និងផ្តល់តម្លៃឱ្យគ្នាទៅវិញទៅមក លើបញ្ហាអន្តរជាតិ នយោបាយ សន្តិភាព ពិសេសការចែករំលែកការងាររដ្ឋសភា ដែលជាស្ថាប័នតំណាងឱ្យពលរដ្ឋជាមួយគ្នាទៅវិញទៅមក ដើម្បីធ្វើយ៉ាងណាឱ្យការងាររដ្ឋសភាប្រទេសនីមួយៗ បម្រើពលរដ្ឋកាន់តែសកម្ម មានប្រសិទ្ធភាព និងឆ្លើយតបបំណងប្រាថ្នារបស់ប្រជាពលរដ្ឋ៕