ឧត្តមសេនីយ៍ឯក ជួន ណារិន្ទ ដឹកនាំកិច្ចប្រជុំបូកសរុបសភាពការណ៍ លើកិច្ចការងារ​សន្តិសុខ​សុវត្ថិភាព

កាលពីរសៀលថ្ងៃទី២៨ ខែតុលា ឆ្នាំ២០២៥ ឯកឧត្តម ឧត្តមសេនីយ៍ឯក ជួន ណារិន្ទ អគ្គ​ស្នងការង និងជាស្នងការនគរបាលរាជធានីភ្នំពេញ បានដឹកនាំកិច្ចប្រជុំបូកសរុបវាយតម្លៃ​សភាពការណ៍ និងលទ្ធផល នៃកិច្ចប្រតិបត្តិការប្រចាំខែ តុលា លើកទិសដៅការងារខែវិច្ឆិកា ឆ្នាំ២០២៥ និងប្រកាសកែសម្រួលសមាសភាព ក្រុមការងារ ( HOTLINE ) ជនបរទស ។

ក្នុងកិច្ចប្រជុំខាងលើនេះដែរ ក៏មានការរៀបចំពិធីប្រកាសតែងតាំងភារកិច្ច ជូនមន្ត្រីនគរបាលចំនួន​០២រូប ៖ លោកឧត្តមសេនីយ៍ទោ ហេង រតនា ស្នងការរងទទួលផែនការងារនគរបាលចរាចរណ៍ និងលោកឧត្តមសេនីយ៍ទោ ញ៉ុង រស់មេត្តា ជាស្នងការរង ទទួលជួយការងារស្នងការ ដឹកនាំការិយាល័យនគរបាលព្រហ្មទណ្ឌកម្រិតធ្ងន់ តាមប្រកាសរបស់ក្រសួងមហាផ្ទៃ និងអគ្គស្នងការដ្ឋាននគរបាលជាតិ ។

ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការង និងជាស្នងការនគរបាលរាជធានីភ្នំពេញ បានលើកឡើងពីសភាពការណ៍បទល្មើស និងធ្វើការវាយតម្លៃចំពោះសភាពការណ៍នីមួយៗ ដើម្បីបន្តតាមដាន និងគ្រប់គ្រងសភាពការណ៍ ឲ្យបានកាន់តែល្អប្រសើរ ដើម្បីធានាបានភាពសុខសាន្ត ក្នុងរាជធានីភ្នំពេញ ។

ឯកឧត្តម ឧត្តមសេនីយ៍ឯក ជួន ណារិន្ទ បានបន្តដាក់បទបញ្ជា ឲ្យការិយាល័យជំនាញពាក់ព័ន្ធ និងបណ្តាអធិការនគរបាលខណ្ឌទាំង១៤ ត្រូវបន្តពង្រឹងឲ្យខ្លាំងបន្ថែមទៀតលើ បញ្ហាក្រុមក្មេងទំនើង ពិសេសក្មេងទំនើងពេលរាត្រី ដែលក្រុមទាំងនេះ នៅតែបន្តគគ្លើន និងពុំខ្លាចរអាជាមួយវិធានការណ៍ច្បាប់នៅឡើយនោះទេ ។ ទន្ទឹមនឹងបញ្ហាជាអាទិ៍ខាងលើនេះ ឯកឧត្តមស្នងការ ក៏បន្តជម្រុញ ឲ្យកម្លាំងនគរបាល បង្កើនការយកចិត្តបន្ថែមទៀត លើកិច្ចការងារបង្ក្រាបគ្រឿងញៀន , ល្បែងស៊ីសង , អំពើឆបោកតាមប្រព័ន្ធអនឡាញ ឬកម្ចីអនឡាញខុសច្បាប់ ពិសេសការបន្តបញ្ចេញកម្លាំងចុះទៅសម្រួលលំហូរចរាចរណ៍ធ្វើដំណើរជូនបងប្អូនប្រជាពលរដ្ឋ តាមដងផ្លូវនានា ដែលប្រឈមនឹងការកកស្ទះ ។

ពាក់ព័ន្ធនឹងលំហូរចរាចរណ៍នេះដែរ ឯកឧត្តមស្នងការ ក៏បានដាក់បញ្ជាឲ្យកម្លាំងជំនាញចរាចរណ៍ ត្រូវពង្រឹងចុះហាមឃាត់រាល់រថយន្តធុនធំៗដែលបើកបរចូលក្នុងរាជធានីភ្នំពេញខុសពេលវេលាដែលត្រូវហាមឃាត់នោះ ៕ តារ៉ាវុទ្ធី