ឯកឧត្តម ហ៊ុន ម៉ានី ប្រកាសស្វាគមន៍​មតិសាធារណៈ​ពាក់ព័ន្ធ​ការងារ​កំណែ​ទម្រង់​ការ​ប្រឡង​ប្រជែង​ជ្រើស​រើស​មន្ត្រី ខណៈក្រសួង​ប្តេជ្ញាចិត្តបន្តបេសកកម្មមួយនេះឱ្យបានល្អ

ភ្នំពេញ៖ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ នៅ​ព្រឹក​ថ្ងៃ​ទី​២៩​ ខែ​តុលា ឆ្នាំ២០២៥នេះ បានប្រកាស​ស្វាគមន៍​មតិ​សាធារណៈ​ពាក់ព័ន្ធ​ការងារ​កំណែ​ទម្រង់​ការ​ប្រឡង​ប្រជែងជ្រើសរើសមន្ត្រី ខណៈក្រសួងប្តេជ្ញាចិត្តបន្តបេសកកម្មមួយនេះឱ្យបានល្អ។

ឯកឧត្តម​បានសរសេរនៅលើបណ្ដាញសង្គមហ្វេសប៊ុកថា ក្នុង​នាម​គណៈ​កម្មការ​រៀបចំ​ការ​ប្រឡង​ប្រជែង​ ក៏ដូចជាថ្នាក់ដឹកនាំមន្ត្រីគ្រប់ជាន់ថ្នាក់នៃក្រសួងមុខងារសាធារណៈ គឺបានតាម​ដាន​ដោយ​យក​ចិត្ត​ទុក ហើយក៏បានផ្តល់តម្លៃខ្ពស់ចំពោះរាល់មតិយោបល់ជាសាធារណៈ ឬតាមការ​ទាក់​ទង​មក​ផ្ទាល់ ​ឬតាមរយៈ comments តាមប្រព័ន្ធសង្គម​មិនថា​លើក​នេះ​ឬ​ដំណាក់​កាល​កន្លង​មក​នោះ​ទេ។​

ឯកឧត្តមថ្លែងថា៖«ខ្ញុំពិតជាសូមអរគុណសម្រាប់មតិយោបល់ពាក់ព័ន្ធទៅលើការងារកំណែទម្រង់ និង​ជា​ពិសេសការរៀបចំការប្រឡងប្រជែងជ្រើសរើសមន្ត្រី (ទាំងមន្ត្រីក្របខ័ណ្ឌ និង​មន្ត្រី​ផ្អែក​លើ​កិច្ច​ព្រម​ព្រៀង​ការងារ) អនុលោមនិយាមនីតិវិធីប្រតិបត្តិថ្មី និងក្រោមអភិក្រមរបស់សម្តេចធិបតី នាយករដ្ឋ​មន្ត្រី ជាប់ដោយមោទនៈ ធ្លាក់ដោយអស់ចិត្ត»។

ឯកឧត្តម ហ៊ុន ម៉ានី បានបង្ហាក្ដី​សប្បាយ​រីករាយ​ក៏​ដូច​ជា​ការ​ពេញ​ចិត្ត​សម្រាប់​អ្វី​ដែល​យើង​ទាំង​អស់​គ្នា​បាន បំពេញភារកិច្ចកន្លងមក ជាពិសេសពេល បានឃើញប្អូនៗជាយុវជន យុវនារី ដែល​ជា​បេក្ខជន​ឆ្លង​កាត់ការប្រឡង បានសម្រេចតាមបំណងប្រាថ្នារបស់ខ្លួន ដែលចង់ក្លាយ​ជា​មន្ត្រី​រាជ​ការ​ទៅ​តាម​ក្រសួង ស្ថាប័នដែលបានដាក់ពាក្យប្រឡងកន្លងមក។

ឯកឧត្តមថ្លែងថា ក្រសួងមុខងារសាធារណៈ ប្តេជ្ញាចិត្តបន្តបេសកកម្មមួយនេះអោយបានល្អ ស្រប​តាម​គោលការណ៍ជ្រើសរើសមន្រ្តីផ្អែកលើគោលការណ៍ «គុណាធិបតេយ្យ តម្លាភាព យុត្តិធម៌ និង​ប្រសិទ្ធភាព»ក៏ដូចជាដើម្បីជាការផ្តល់ឱកាសអោយបានស្មើៗគ្នា និងឱកាសច្រើនដង ក្នុង​ការ​ប្រឡង​ប្រជែង អោយក្លាយជាមន្ត្រីរាជការស៊ីវិល៕