ឯកឧត្តម វង សូត ដឹកនាំគណៈប្រតិភូជាន់ខ្ពស់រដ្ឋសភាកម្ពុជា ចូលរួមសន្និសីទ​សភាអន្តរជាតិ​រំលឹក​ខួប​លើក​ទី៣០ ការអនុម័តរដ្ឋធម្មនុញ្ញ នៃសាធារណរដ្ឋអាស៊ែបៃហ្សង់

ជាតំណាងដ៏ខ្ពង់ខ្ពស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា​នៃ​ព្រះ​រាជា​ណា​ចក្រ​កម្ពុជា ឯកឧត្តម វង សូត អនុប្រធានទី២ រដ្ឋសភា នាយប់ថ្ងៃទី២៨ ខែតុលា ឆ្នាំ២០២៥ បាន​ដឹក​នាំ​គណៈប្រតិភូជាន់ខ្ពស់រដ្ឋសភាកម្ពុជា អញ្ជើញដល់ទីក្រុងបាគូ ប្រទេសអាស៊ែបៃហ្សង់ ដោយ​សុវត្ថិភាព ដើម្បីចូលរួមសន្និសីទសភាអន្តរជាតិរំលឹកខួបលើកទី៣០ នៃការ​អនុម័ត​រដ្ឋ​ធម្មនុញ្ញ​នៃ​សាធារណរដ្ឋអាស៊ែបៃហ្សង់ តបតាមការអញ្ជើញរបស់លោកជំទាវ សាហ៊ីបា កាហ្វារ៉ូវ៉ា (Sahiba Gafarova) ប្រធានរដ្ឋសភា (Milli Majlis) នៃសាធារណរដ្ឋអាស៊ែបៃហ្សង់។

អញ្ជើញ​ដល់អាកាសយានដ្ឋានអន្តរជាតិ Baku Heydar Aliyev ក្នុងទីក្រុងបាគូ ប្រទេស​អាស៊ែ​បៃហ្សង់​ គណៈប្រតិភូត្រូវបានទទួលស្វាគមន៍ និងបដិសណ្ឋារកិច្ចយ៉ាងកក់ក្តៅពី ឯកឧត្តម សុខ ជា ឯកអគ្គរាជទូតព្រះរាជាណាចក្រកម្ពុជា ប្រចាំប្រទេសអាស៊ែបៃហ្សង់ រួមទាំង​រដ្ឋសភា​នៃ​សាធារណ​រដ្ឋ​អាស៊ែបៃហ្សង់ជាម្ចាស់ផ្ទះ។

តាមកម្មវិធីគ្រោងទុក នៅថ្ងៃទី២៩ តុលានេះ គណៈប្រតិភូរដ្ឋសភាកម្ពុជា នឹងអញ្ជើញចូលជួប​សម្តែង​ការ​គួរ​សម​ជាមួយថ្នាក់ដឹកនាំរដ្ឋសភានៃសាធារណរដ្ឋអាស៊ែបៃហ្សង់ និងចូលរួមក្នុង​ពិធី​បើក​សន្និសីទ​សភា​អន្តរជាតិរំលឹកខួបលើកទី៣០ នៃការអនុម័តរដ្ឋធម្មនុញ្ញ​នៃ​សាធារណ​រដ្ឋ​អាស៊ែ​បៃហ្សង់ ក្រោមមូលបទ “រដ្ឋធម្មនុញ្ញជាមូលដ្ឋានគ្រឹះនៃឯករាជ្យភាព និងអធិបតេយ្យភាព ក្នុង​ពិភព​លោក​សហសម័យ” នៅសាលប្រជុំពេញអង្គរដ្ឋសភា នៃសាធារណរដ្ឋអាស៊ែបៃហ្សង់៕