និស្សិតសិក្សានៅចិនប្ដេជ្ញាខំរៀនដើម្បីយកចំណេះចូលរួមអភិវឌ្ឍជាតិ និង​ផ្សាយ​វប្បធម៌​ខ្មែរ​ដល់​បរទេស

ភ្នំពេញ៖ សិស្សនិស្សិតដែលទទួលបានអាហារូបករណ៍ ទៅសិក្សានៅប្រទេសចិន បាន​ប្ដេជ្ញា​ចិន​ខិត​ខំ​រៀន​សូត្រ និងយកចំណេះដឹងមកចូលរួមអភិវឌ្ឍន៍ប្រទេសជាតិ ឲ្យកាន់តែរីកចម្រើន ហើយ​មិន​ត្រឹម​តែ​ប៉ុណ្ណោះ នឹងជួយផ្សព្វផ្សាយពីវប្បធម៌ខ្មែរ ទៅកាន់មិត្តរួមថ្នាក់ជាជនបរទេស ឲ្យ​ពី​គេដឹកពីអរិយធម៌ និងតំបន់ទេសចរណ៍នានារបស់កម្ពុជា ។

ក្នុងពេលត្រៀមឡើងយន្តហោះ ដើម្បីធ្វើដំណើរទៅសិក្សា នៅសាកលវិទ្យាល័យឈានណា នៃប្រទេសចិន នៅយប់ថ្ងៃទី២៨ ខែតុលា ឆ្នាំ២០២៥ និស្សិតអាហារូបករណ៍ បានឲ្យដឹងថា ជា​ឱកាស​ដ៏​ល្អ សម្រាប់ពួកគេ ដែលបានទៅសិក្សារៀនសូត្ររយៈពេល ៥ឆ្នាំ នៅប្រទេសចិន ដែល​ជា​ប្រទេស​មានការរីកចម្រើនទាំងសេដ្ឋកិច្ច និងបច្ចេកវិទ្យាជាដើមនោះ ។

ពួកគេបន្តថា ក្រៅពីការខិតខំប្រឹងប្រែងរៀនសូត្រ ក៏មិនភ្លេចផងដែរ ក្នុងការផ្សព្វផ្សាយពីវប្បធម៌ អរិយធម៌ និងតំបន់ទេសចរណ៍ទាក់ទាញនានារបស់កម្ពុជា ទៅកាន់បរទេស ពិសេស​ប្រាសាទ​អង្គរ​វត្ត​ដ៏ល្បីល្បាញក្នុងពិភពលោក ព្រមទាំងសក្ដានុពលផ្សេងៗទៀតរបស់កម្ពុជា ហើយ​ពួក​ជឿ​ជាក់​ថា ​នឹងទទួលបានចំណេះដឹងមួយច្បាស់លាស់ មកចូលរួមអភិវឌ្ឍន៍ប្រទេសជាតិ ហើយ​ក៏​សូម​ថ្លែង​អំណរគុណ ដល់សាលាអន្តរជាតិស្ទេបហ្វរវើដអន្តរជាតិ ដែលជួយសម្របសម្រួល ដើម្បី​ឲ្យ​ពួក​គេ​បានទទួលអាហារូបករណ៍នេះ ។

ឯកឧត្តមបណ្ឌិត ស្រេង វង្សហៀង ប្រធានកិត្តិយសសាលាអន្តរជាតិស្ទេបហ្វរវើដអន្តរជាតិ បាន​ថ្លែងថា នេះជាឆ្នាំទី៥ហើយ ដែលសាលាបានជួយសម្របសម្រួលដល់និស្សិតកម្ពុជា បាន​ទៅ​សិក្សា​នៅ​ប្រទេសចិន ដែលសរុបមកដល់ពេលនេះមានជាង ២៥០នាក់ ដោយពួក​គេ​សិក្សា​ទៅ​លើ​ជំនាញ​គ្រប់គ្រងពាណិជ្ជកម្ម សេដ្ឋកិច្ចអន្តរជាតិ អក្សរសាស្ត្រចិន វិទ្យាសាស្ត្រចិន ស្ថាបត្យកម្ម ឱសថ​សាស្ត្រ និងជំនាញជាច្រើនទៀត ។

ឯកឧត្តមបានបន្តថា ការជួយដល់និស្សិតកម្ពុជានេះ គោលបំណង ដើម្បីបង្កើត​ឱកាស​ជា​វិជ្ជមាន​ក្នុង​សង្គម​ សម្រាប់សិស្ស-និស្សិតកម្ពុជា ក្នុងការបន្តថ្នាក់ឧត្តមសិក្សានៅក្រៅប្រទេស ដើម្បី​ឲ្យ​យុវជន​ជំនាន់​ក្រោយ មានចំណេះដឹង ជំនាញ និងសមត្ថភាពខ្ពស់ ក្នុងកិច្ចការអភិវឌ្ឍប្រទេសជាតិ សង្គម​ជាតិ និងសេដ្ឋកិច្ចជាតិ ឲ្យកាន់តែមានភាពប្រសើរឡើង ហើយក៏​ស្រប​ទៅ​នឹង​យុទ្ធ​សាស្ត្រ​បញ្ច​កោណ​របស់រាជរដ្ឋាភិបាល ក្នុងការបណ្ដុះមូលធនមនុស្ស ។

ក្នុងពេលជូនដំណើរកូនចៅ ទៅសិក្សាថ្នាក់ឧត្តមសិក្សានៅប្រទេសចិននេះ ឪពុកម្ដាយ និងអាណាព្យាបាលសិស្ស សម្ដែងនូវការអរគុណដល់អ្នកពាក់ព័ន្ធនានា ដែល​បាន​ជួយ​កូន​ចៅ​ពួក​គាត់​បាន​ទៅរៀនបន្តនៅស្រុកក្រៅ ហើយក៏ជំរុញដល់និស្សិតទាំងនោះ ត្រូវខិតខំរៀនសូត្រ ឆ្លើយ​តប​ទៅនឹ​ងការជ្រោមជ្រែងនេះ ៕ អត្ថបទ បាន សុខរិទ្ធិ