ក្រសួងវប្បធម៌ នឹងរៀបចំពិព័រណ៍សិល្បៈសិប្បកម្មអបអរខួប១០ឆ្នាំ ល្បែងទាញព្រ័ត្រចុះបញ្ជី UNESCO

នាយកដ្ឋានអភិវឌ្ឍន៍វប្បធម៌ សហការជាមួយអគ្គនាយកដ្ឋានបច្ចេកទេសវប្បធម៌ ក្រសួងវប្បធម៌ និង​វិចិត្រសិល្បៈ នឹងរៀបចំពិព័រណ៍សិល្បៈសិប្បកម្ម នាចុងខែវិចិ្ឆកា ឆ្នាំ២០២៥ខាងមុខនេះ នៅ​ផ្លូវ​ថ្មើជើងចតុម្មុខ (Walk Street) ទល់មុខវត្តឧណ្ណាលោម រាជធានីភ្នំពេញ ដើម្បី​អបអរ​សាទរ​ខួប​១០​ឆ្នាំ ល្បែងទាញព្រ័ត្រ ដែលបានចុះក្នុងបញ្ជីសម្បតិ្តបេតិកភណ្ឌវប្បធម៌អរូបី នៃមនុស្សជាតិ កាល​ពី​ថ្ងៃទី២ ខែធ្នូ ឆ្នាំ២០១៥កន្លងទៅ។

លោក រឿង សារ៉េត ប្រធានស្តីទីនាយកដ្ឋានអភិវឌ្ឍន៍វប្បធម៌ បានថ្លែងប្រាប់ BTV News នា​ថ្ងៃ​នេះ​ថា ​ក្នុងពិព័រណ៍នោះ នាយកដ្ឋាន បានរៀបចំបើកព្រឹតិ្តការណ៍ថ្មីមួយបន្ថែមទៀត គឺ​សិល្បៈ​នៃ​ការ​«ចាក់ចេក» តំណខ្មែរតាំងពីជំនាន់ដើម និងជាសិល្បៈដ៏កម្រ និងកាន់តែ​ឈាន​ទៅ​រក​ការ​បាត់​បង់​​។ ដូច្នេះនាយកដ្ឋាន និងលើកឡើងនូវកម្មវិធីនេះ ដើម្បីឲ្យសាធារណជន ក៏ដូច​ជា​ក្មួយ​ៗ​យុវជន បានទស្សនាផ្ទាល់នៅទីតាំងនោះ អំពីសិល្បៈនៃការ «ចាក់ចេក» ក៏ដូចជា៖ ក្រងនូវស្លឹក និង​សម្ភារៈផ្សេងៗទៀត ដែលជាវត្ថុអនុស្សាវរីយ៍។

សូមរំលឹក​ឡើងវិញថា ក្នុងឆ្នាំ២០២៥នេះ នាយកដ្ឋានអភិវឌ្ឍន៍វប្បធម៌ បាន​រៀបចំ​ព្រឹតិ្តការណ៍​ធំៗ ចំនួន០២ នាចុងឆ្នាំ២០២៥នេះ គឺពិព័រណ៍ស្នាដៃមរតកមនុស្សរស់ មានរយៈពេល០៣ថ្ងៃ កាល​ពីថ្ងៃទី៦ រហូតដល់ថ្ងៃទី៨ ខែតុលា ឆ្នាំ២០២៥កន្លងទៅនេះ និងពិព័រណ៍រូបថត ក្រោម​ប្រធាន​បទ«រួមគ្នាលើកតម្កើងមរតកវប្បធម៌អរូបី»រយៈពេល០៧ថ្ងៃ កាលពីថ្ងៃទី២៤ ដល់ថ្ងៃ​ទី​៣០ ខែតុលា ឆ្នាំ២០២៥ ក្នុងសារមនី្ទរខ្លែងខ្មែរ រាជធានីភ្នំពេញ ដោយទទួល​បាន​ការ​គាំទ្រ​គួរ​ជា​ទីមោទន​សម្រាប់នាយកដ្ឋាន ក៏ដូចជាក្រសួងវប្បធម៌ និងវិចិត្រសិល្បៈ ជាពិសេសយុវជន សិស្ស និសិ្សត សាធារណជន ព្រមទាំងមានអ្នកចូលរួមតាមបណ្តាញសង្គមជាច្រើន បាន​បញ្ចេញ​នូវ​ចំណាប់​អារម្មណ៍សប្បាយរីករាយ៕ អត្ថបទ រដ្ឋា