ក្រុមអ្នកផលិត អំពាវនាវអ្នកប្រើប្រាស់ជឿជាក់ និងបន្តគាំទ្រផលិតផលក្នុងស្រុកឱ្យកាន់តែច្រើន

ក្រុមសហគ្រាសខ្នាតតូច និងមធ្យមនៅកម្ពុជា បានអំពាវនាវដល់អ្នកប្រើប្រាស់ទាំងអស់ មាន​ការ​ជឿ​ទុក​ចិត្ត និងបន្តគាំទ្រផលិតផលក្នុងស្រុកឱ្យកាន់តែច្រើនឡើងបន្ថែមទៀត ដើម្បី​ផ្តល់​ជា​កម្លាំង​ចិត្ត ​ក៏ដូចជាជួយកាត់បន្ថយថ្លៃដើមផលិតឱ្យមកនៅទាប ដើម្បី​ធ្វើ​ឱ្យ​តម្លៃទំ​និញ​ដែល​ដាក់​លក់​លើ​ទីផ្សារ​កាន់​តែធូរ​ថ្លៃជាងមុនផងដែរ។

នៅក្នុងបទសម្ភាសន៍ជាមួយ លោក តែ តាំងប៉ ប្រធានសម្ព័ន្ធ​សមាគម​សហ​គ្រាស​ខ្នាត​តូច​ និង​មធ្យម​ កាលពីព្រឹកថ្ងៃទី៧ វិច្ឆិកា ឆ្នាំ២០២៥នេះ លោកបានឱ្យព័ត៌មាន ប៊ីធីវី ដឹងថា ការ​គាំទ្រ​ផលិត​ផល​ក្នុង​ស្រុក គឺជាកម្លាំងចិត្តដ៏ធំធេង និងមិនអាចកាត់ថ្លៃបានជូនទៅដល់ម្ចាស់សហគ្រាស សិប្បកម្ម និងផលិតករក្នុងស្រុក ពីព្រោះដើម្បីបង្កើននូវការផ្គត់ផ្គង់ផលិតផល ដែលមានគុណភាព ក៏​ដូច​ជា​បរិមាណ ដើម្បីឆ្លើយតបនឹងតម្រូវការទីផ្សារ។ ជាពិសេស គឺបង្កើន​ការ​ប្រើ​ប្រាស់​វត្ថុ​ធាតុ​ដើម​ ធាតុផ្សំ និងសម្ភារក្នុងស្រុក សម្រាប់ខ្សែច្រវាក់ផលិតកម្ម ដើម្បី​គាំទ្រ​ជា​ចរន្ត​ផ្សេង​ៗ​ទៀត​នៃ​ការ​ផលិត​ក្នុង​ស្រុក។

លោក ឈុន វីរៈ ម្ចាស់សហគ្រាសផលិតផលជ្រុញប្រណិតខ្មែរម៉ៃសាក់ បានលើកឡើងថា រហូត​មក​ដល់​ពេលនេះ ផលិតផលខ្មែរច្រើនណាស់បានកំពុងផលិត និងដាក់លក់លើទីផ្សារ ជា​ពិសេស​តម្លៃ​ដែល​ដាក់​លក់​គឺមានការថយចុះជាងមុន ដោយសារមានការចូលរួមគាំទ្រពីអ្នកប្រើប្រាស់។ លោក​បាន​ពន្យល់ថា ជាធម្មតា កាលណាមានអ្នកគាំទ្រច្រើន ការផលិតច្រើន ថ្លៃដើម​ផលិត​ក៏​ទាប​ទៅ​តាម​នឹង​ដូច​គ្នា ដែលធ្វើការផលិតដាក់តាំងលក់ ក៏មានតម្លៃធូរជាងមុនផងដែរ។

ក្រុមអាជីករផ្សេងទៀត បាននិយាយស្រដៀងគ្នាថា ពិតជាមានការសប្បាយចិត្តណាស់ ពេល​ដែល​ផលិត​ផល​ជាតិ មានការគាំទ្រជាហូហែរបែបនេះ។ ពួកគាត់ បានសំណូមពរបន្ថែមថា សូម​ឲ្យប្រ​ជា​ពលរដ្ឋ​ខ្មែរ​ទាំងអស់ បន្តជួយគាំទ្រផលិត​ផល​ក្នុង​ស្រុក​ឲ្យ​បាន​ច្រើន​ជាង​​ផលិត​ផល​ដែល​នាំ​ចូល ​ដើម្បីផ្តល់ជាកម្លាំងចិត្តដល់ផលិតករ និងជួយលើក​ស្ទួយ​កុំ​ឲ្យ​ប្រជាជន​ចំណាក​ស្រុក​ជា​ដើម​។

ក្នុងរយៈពេលប៉ុន្មានឆ្នាំចុងក្រោយនេះ ត្រូវបានមើលឃើញថា ប្រមុខរាជរដ្ឋាភិបាលកម្ពុជា បាន​ខិត​ខំ​ជំរុញ​ចលនាភូមិមួយផលិតផលមួយ សម្រេចបានលទ្ធផលយ៉ាងល្អប្រសើរ ដែល​នាំ​ទៅ​ដល់​ការ​ប្រែប្រួល​ជាវិជ្ជមាននៃផលិតផលខ្មែរ ដូចជា គុណភាព ស្តង់ដា អនាម័យ ការវេចខ្ចប់ ជា​ពិសេស​ការ​ដាក់ស្លាកសញ្ញាសម្គាល់ លើផលិតផលជាផលិតផលភូមិមួយផលិតផលមួយ និង​ឈាន​ទៅ​ដាក់​ចំណាត់ថ្នាក់ផលិតផល ដើម្បីជួយជំរុញ និងលើកទឹកចិត្តផលិតករឆ្នើម ដែល​បាន​ខិត​ខំ​កែ​ច្នៃ ផលិតផលប្រកបដោយគុណភាពខ្ពស់ សម្រាប់ទីផ្សារក្នុងស្រុក និងក្រៅប្រទេស៕ អត្ថបទ៖ ឈិត បូរ៉ាវី