ការអភិវឌ្ឍន៍ហេដ្ឋារចនសម្ព័ន្ធរបស់រាជរដ្ឋាភិបាលនៅមូលដ្ឋាន កំពុង​ជួយលើកកម្ពស់ជីវភាពរបស់ពលរដ្ឋ

រាជរដ្ឋាភិបាល តាមរយៈក្រសួងអភិវឌ្ឍន៍ជនបទ កំពុងខិតខំ​កសាង​នូវ​ហេដ្ឋា​រចនា​សម្ព័ន្ធ​នៅ​តំបន់​ជន​បទ​ មានផ្លូវ ស្ពាន និងប្រព័ន្ធលូនជាដើម ត្រូវចំតម្រូវការរបស់ប្រជាពលរដ្ឋនៅតាមមូលដ្ឋាន ហើយ​ក៏​បាន​ជួយលើកកម្ពស់ជីវភាព របស់ប្រជាពលរដ្ឋផងដែរ។

នៅ​ក្នុងឱកាសតំណាងឯកឧត្តម ឆាយ ឫទ្ធិសែន រដ្ឋមន្ត្រីអភិវឌ្ឍន៍ជនបទ ចុះត្រួតពិនិត្យ និង​វាយ​តម្លៃ​លើ​ការ​ងារចំនួន២គម្រោង ទី១. ផ្លូវកៅស៊ូពីរជាន់ (DBST) ប្រវែងជិត៣គីឡូម៉ែត្រ និង​ប្រព័ន្ធ​លូ ​នៅឃុំក្រាំងស្វាយ ស្រុកព្រះស្ដេច ខេត្តព្រៃវែង និងទី២. ផ្លូវប្រវែង ១ពាន់ ៤០០ម៉ែត្រ (មាន​កៅស៊ូ​ និងបេតុង) នៅឃុំក្រាំងយ៉ូវ ស្រុកស្អាង ខេត្តកណ្ដាល នៅថ្ងៃទី៧ ខែវិច្ឆិកា ឆ្នាំ​២០២៥​ ឯកឧត្តមបណ្ឌិត សៅ ជីវ័ន្ត រដ្ឋលេខាធិការក្រសួងអភិវឌ្ឍន៍ជនបទ បានថ្លែងថា រាជ​រដ្ឋាភិបាល បាននឹងកំពុងខិតខំអភិវឌ្ឍន៍ប្រទេសជាតិ លើគ្រប់វិស័យឱ្យកាន់តែមានភាពរីកចម្រើន ដោយបានដាក់ចេញ នូវយុទ្ធសាស្ត្របញ្ចកោណ ដែលកំណត់អាទិភាពគន្លឹះ៥ រួមមានមនុស្ស ផ្លូវ ទឹក ភ្លើង និងបច្ចេកវិទ្យាឌីជីថល ជាបាវចនា ដើម្បីកំណើនការងារ សមធម៌ ប្រសិទ្ធភាព និង​ចីរភាព។

ឯកឧត្តមបណ្ឌិតបន្តថា ទន្ទឹមនេះ ក្រសួងអភិវឌ្ឍន៍ជនបទកំពុងពន្លឿនកិច្ចអភិវឌ្ឍន៍ និង​ជំរុញ​ការ​អនុវត្ត​នូវ​យុទ្ធសាស្ដ្រ​សំខាន់ៗ គឺទី១. អភិវឌ្ឍហេដ្ឋារចនាសម្ព័ន្ធរូបវន្ត និងគមនាគមន៍​ជន​បទ​ប្រទាក់​ក្រឡា ខិតខំលើកកម្ពស់កម្រិតគុណភាពផ្លូវពីផ្លូវដីស និងផ្លូវដីល្បាយក្រួស ទៅ​ជា​ផ្លូ​វ​ក្រាល​កៅ​ស៊ូ​ពីរ​ជាន់ និងផ្លូវបេតុង, ទី២. លើកកម្ពស់ការទទួលបានទឹកស្អាត និងអនាម័យ​បរិស្ថាន​ជន​បទ​ តាមរយៈជំរុញអត្រាគ្របដណ្ដប់ នៃការផ្គត់ផ្គង់ទឹកស្អាត និងអនាម័យជនបទ ១០០%, ទី៣. ការ​ជំរុញអភិវឌ្ឍសហគមន៍ជនបទ និងចលនាភូមិគំរូ តាមរយៈការជំរុញអភិវឌ្ឍសហគមន៍ជនបទ និង​ចលនាភូមិគំរូ ដែលជាការអភិវឌ្ឍភូមិចម្រុះឱ្យប្រែក្លាយទៅជាភូមិគំរូ, ទី៤. លើក​កម្ពស់​ការ​ធ្វើ​ពិពិធ​កម្ម​សេដ្ឋកិច្ចជនបទ តាមរយៈការបណ្តុះបណ្តាលជំនាញមូលដ្ឋានបំណិនជីវិត និងទី៥. ការ​ពង្រឹង​ស្ថាប័ន និងកិច្ចការតាមរយៈបណ្ដុះបណ្ដាល ពង្រឹងសមត្ថភាពមន្ដ្រីរាជការគ្រប់លំដាប់ថ្នាក់, ការ​រៀបចំនូវសណ្ដាប់ធ្នាប់ និងការពង្រឹងសាមគ្គីភាព ដើម្បី​ចូល​រួម​ចំណែក​អនុវត្ត​ការងារ​ប្រកប​ដោយ​ប្រសិទ្ធភាព និងការទទួលខុសត្រូវ ។

ក្នុងពេល​ទទួលសមិទ្ធផលផ្លូវថ្មី អាជ្ញាធរ និងប្រជាពលរដ្ឋ បានថ្លែងអំណរគុណដល់រាជរដ្ឋាភិបាល បាន​ខិត​ខំ​កសាងហេដ្ឋារចនាសម្ព័ន្ធ មានផ្លូវ ប្រឡាយ ទឹក និងស្ពានជាដើម គឺ​បាន​ជួយ​ជំរុញ​កំណើន​សេដ្ឋ​កិច្ចរបស់ពួកគេ ជាមួយនឹងការប្ដេជ្ញាចូលរួមថែទាំផ្លូវ និងហេដ្ឋា​រចនា​សម្ព័ន្ធ​ទាំង​អស់​នេះ​ ដើម្បីធ្វើដំណើរស្រួល និងប្រើប្រាស់បានយូរ។

ជាមួយនេះ ពួកគេក៏បានស្នើដល់រាជរដ្ឋាភិបាល បន្តអភិវឌ្ឍន៍​ហេដ្ឋា​រចនា​សម្ព័ន្ធ​នៅ​ក្នុង​មូល​ដ្ឋាន​បន្ថែម​ទៀត​ ដើម្បីអាចប្រកបមុខរបរងាយស្រួល និងមានជីវភាពកាន់តែរីកចម្រើន៕