ឆ្នាំ២០២៥ ជាលើកទី៧ ដែលកម្ពុជាបានឈ្នះពានរង្វាន់អង្ករល្អបំផុតនៅលើពិភពលោក

ភ្នំពេញ៖ គិតត្រឹមឆ្នាំ២០២៥នេះ អង្ករក្រអូបប្រណិតកម្ពុជា ម៉ាកវិញ្ញាតកម្ម «ម្លិះអង្គរ» ពូជស្រូវផ្ការំដួល បានឈ្នះពានរង្វាន់អង្ករល្អប្រណិតផ្តាច់គេលើពិភពលោកជាលើកទី៧ ក្នុងការប្រកួតអង្ករល្អផ្តាច់គេលើពិភពលោក នៅក្នុងកម្មវិធី «សន្និសីទស្រូវអង្ករពិភពលោកឆ្នាំ២០២៥» ។

លោក លន់ យ៉េង អគ្គលេខាធិការ នៃសហព័ន្ធស្រូវអង្ករកម្ពុជា បានមានប្រសាសន៍ប្រាប់ព័ត៌មាន ប៊ីធីវី កាលពីល្ងាចថ្ងៃទី១០ ខែវិច្ឆិកាកន្លងទៅថា កម្ពុជាតែងតែចូលរួមកម្មវិធីសន្និសីទស្រូវអង្ករពិភពលោកជារៀងរាល់ឆ្នាំ ដែលចាប់ផ្តើមតាំងពីឆ្នាំ២០០៩មកម្ល៉េះ។ ហើយកម្ពុជាក៏តែងតែយកសំណាកគំរូអង្ករទៅចូលរួមប្រកួត ដែលមកដល់ពេលនេះ កម្ពុជាទទួលបានឈ្នះពានរង្វាន់ចំនួន៧លើក។

លោកអគ្គលេខាធិការ បានរៀបរាប់បន្តថា នៅក្នុងកម្មវិធីប្រកួតប្រជែងនេះ បើតាមគណៈកម្មការរៀបចំបានឱ្យដឹងថា មានសំណាកអង្ករប្រមាណជាង ៣០ប្រភេទ មកពីប្រទេសផ្សេងៗជាច្រើន ក្នុងនោះក៏បានវាយតម្លៃថា អង្ករកម្ពុជាល្អដាច់គេលើពិភពលោក។ លោកបានបន្តថា ទាក់ទិនការនាំយកសំណាកអង្ករទៅចូលរួមប្រកួតនេះ គឺបាននាំយកពូជស្រូវជាច្រើនប្រភេទ ប៉ុន្តែជាលទ្ធផល មានតែពូជស្រូវផ្ការំដួល ដែលគណៈកម្មការវាយតម្លៃថា មានគុណភាពល្អ។

ជាមួយនេះ លោកបានថ្លែងអំណរគុណដល់ក្រសួងកសិកម្ម រុក្ខាប្រមាញ់ និងនេសាទ និងវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា ដែលបានខិតខំស្រាវជ្រាវ និងបញ្ចេញនូវពូជស្រូវល្អ និងប្រជាកសិករកម្ពុជាដែលបានខិតខំធ្វើការងារបានយ៉ាងល្អក្នុងការដាំដុះ និងបានអរគុណក្រសួង ស្ថាប័ន និងគ្រប់ភាគីពាក់ព័ន្ធទាំងអស់ ដែលបានខិតខំសម្រិតសម្រាំងនិង កិនកែច្នៃអង្ករបានយ៉ាងល្អ រហូតទទួលបានជ័យជំនះជូនប្រទេសជាតិ។

សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា នៅថ្ងៃម្សិលមិញ ក៏បានផ្ញើសារអបអរសាទរ អង្ករក្រអូបប្រណិតកម្ពុជា ម៉ាកវិញ្ញាតកម្ម «ម្លិះអង្គរ» ពូជស្រូវផ្ការំដួល បានឈ្នះពានរង្វាន់ជាអង្ករប្រណិតល្អបំផុតលើពិភពលោក (World Best Rice) ជាលើកទី៧ ក្នុងកម្មវិធី សន្និសីទស្រូវអង្ករពិភពលោកឆ្នាំ២០២៥ផងដែរ។

សូមជម្រាបជូនថា នេះគឺជាលើកទី៧ ហើយ ដែលកម្ពុជាឈ្នះពានរង្វាន់អង្ករល្អបំផុត ក្នុងកម្មវិធីលំដាប់ពិភពលោកមួយនេះ ដោយ លើកទី១ ទទួលបានកាលពីឆ្នាំ២០១២, លើកទី២ នៅឆ្នាំ២០១៣, លើកទី៣ នៅឆ្នាំ២០១៤, លើកទី៤ នៅឆ្នាំ២០១៨, លើកទី៥ នៅឆ្នាំ២០២២, លើកទី៦ នៅឆ្នាំ២០២៤, និងចុងក្រោយគឺនៅឆ្នាំ២០២៥។ អង្ករម៉ាក “ម្លិះអង្គរ” ជាអង្ករដែលមានគុណភាព និងទុកចិត្តបានសម្រាប់ អង្ករក្រអូបប្រណិតកម្ពុជា៕អត្ថប ឈិត បូរ៉ាវី