ចលនាប្រឡងប្រណាំងអង្គភាពផ្ដល់សេវាសាធារណៈគំរូ បាន​បង្កើត​ជា​ស្នូរ​ជួង​បំផុស​ស្មារតី​ដល់​អង្គភាព​សាធារណៈ បន្តយកចិត្តទុកដាក់​ផ្ដល់​សេវា​ជូនប្រជាជនកាន់តែល្អប្រសើរ

មានប្រសាសន៍ក្នុងពិធីបើកសិក្ខាសាលាចែករំលែកបទពិសោធនៃការគ្រប់គ្រង និង​ការ​ផ្តល់​សេវា​សាធារណៈ​របស់ជ័យលាភីអង្គភាពផ្តល់សេវាសាធារណៈគំរូក្នុងវិស័យអប់រំ ឆ្នាំ២០២៤ (កម្រិត​សាលា​មត្តេយ្យសិក្សា) ឯកឧត្ដមឧបនាយករដ្ឋមន្ត្រី ហ៊ុន ម៉ានី បានលើក​ឡើង​ពី​គោល​បំណង​សំខាន់​ៗ​ចំនួ​ន៣ចំណុចធំៗ នៃការរៀបចំសិក្ខាសាលានេះឡើង ក្នុងនោះ ទី១៖ គឺដើម្បី​ចែក​រំលែកបទ​ពិសោធល្អៗ ឧត្ដមានុវត្តន៍និងនវានុវត្តន៍នៃការគ្រប់គ្រង និងការផ្ដល់​សេវា​របស់​ជ័យ​លាភី​អង្គភាព​សាលាមត្តេយ្យសិក្សា សម្រាប់ជាធាតុចូល និងជាមូលដ្ឋាននៃការគិតគូរ រៀបចំ និង​អភិវឌ្ឍអង្គភាពរបស់ខ្លួនឱ្យក្លាយទៅជាសាលាដែលមានទំនុកចិត្តពីប្រជាពលរដ្ឋនៅមូលដ្ឋាន; ទី២​៖ គឺដើម្បីជំរុញសាលាមត្តេយ្យសិក្សាទាំងអស់នៅទូទាំងប្រទេស ឱ្យចូលរួមក្នុងចលនាប្រឡងប្រណាំងការផ្ដល់សេវាសាធារណៈ ជូនប្រជាពលរដ្ឋនៅតាមមូលដ្ឋានរបស់ខ្លួនឱ្យកាន់តែល្អប្រសើរ; និងទី៣៖ គឺដើម្បីជំរុញ កៀរគរ និងលើកទឹកចិត្តដល់សហគមន៍ អាជ្ញាធរដែនដី ដៃគូអភិវឌ្ឍន៍នានា និងគ្រប់ភាគីពាក់ព័ន្ធទាំងអស់ ដើម្បីចូលរួមអភិវឌ្ឍសាលាមត្តេយ្យសិក្សា និងធានាដល់ដំណើរការផ្ដល់សេវានៅតាមសាលាមត្តេយ្យសិក្សាប្រកបដោយគុណភាព និងប្រសិទ្ធភាពជូនប្រជាពលរដ្ឋ។

ឯកឧត្ដមឧបនាយករដ្ឋមន្ត្រី ហ៊ុន ម៉ានី ក៏បានសង្កត់ធ្ងន់ថា សិក្ខាសាលាចែករំលែកបទពិសោធនៃការគ្រប់គ្រង និងការផ្តល់សេវាសាធារណៈរបស់ជ័យលាភីអង្គភាពផ្តល់សេវាសាធារណៈគំរូក្នុងវិស័យអប់រំ ឆ្នាំ២០២៤ (កម្រិតសាលាមត្តេយ្យសិក្សា) រៀបចំឡើងនាពេលនេះ នឹងផ្តល់ទស្សនទាននិងចំណេះដឹងថ្មីៗបន្ថែម ការបង្កើតទំនាក់ទំនងជាបណ្ដាញក្នុងវិស័យជាមួយគ្នា និងនៅកម្រិតដូចគ្នា ការសិក្សាស្ដីពីបទពិសោធល្អៗ ជាពិសេសការបត់បែនសម្របទៅនឹងបរិបទនិងស្ថានភាពជាក់ស្តែង ជូនដល់អ្នកពាក់ព័ន្ធទាំងអស់ ដើម្បីយកទៅអភិវឌ្ឍអង្គភាពរបស់ខ្លួនឱ្យកាន់តែល្អប្រសើរ។

តាមរយៈចលនាប្រឡងប្រណាំងអង្គភាពផ្ដល់សេវាសាធារណៈគំរូក្នុងវិស័យអប់រំ ពិតណាស់ថានឹងជំរុញលើកកម្ពស់ការផ្ដល់សេវាអប់រំប្រកបដោយគុណភាព នឹងរួមចំណែកធ្វើឱ្យកុមារ និងយុវជនកម្ពុជាក្លាយជាពលរដ្ឋប្រកបដោយសមត្ថភាព និងជាទំពាំងបន្តវេន ដែលនេះសុទ្ធតែជាកត្តាក្នុងការចូលរួមកសាងមូលធនមនុស្ស ឈានទៅសម្រេចចក្ខុវិស័យ និងបំណងប្រាថ្នាដ៏ពិសិដ្ឋរបស់ប្រមុខរាជរដ្ឋាភិបាល សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ឯកឧត្ដមឧបនាយករដ្ឋមន្ត្រី បានបន្ថែម៕