នាយឧត្តមសេនីយ៍ ស ថេត ណែនាំដល់នាយកដ្ឋានកណ្ដាល​នគរបាល​យុត្តិធម៌ទើប​ចូល​កាន់​តំណែង​​​​ត្រូវ​លើក​កម្ពស់ស្មារតីទទួលខុសត្រូវ និង​ប្រសិទ្ធ​ភាព​ការងារ

នាយឧត្តមសេនីយ៍ ស ថេត អគ្គស្នងការនគរបាលជាតិ បានផ្ដល់អនុសាសន៍​ណែនាំ​មួយ​ចំនួន​ដល់ឧត្តមសេនីយ៍ទោ ហ៊ុន គឹមជាតិ ដែលទើប​ត្រូវ​បាន​ប្រកាស​ចូលកាន់​តំណែង​ជា​ប្រធាន​នាយក​ដ្ឋាន​កណ្ដាល​នគរបាលយុត្តិធម៌ ត្រូវលើកកម្ពស់ស្មារតីទទួលខុសត្រូវ និងលើកកម្ពស់​ប្រសិទ្ធ​ភាព​ការងារ ស្របតាមអ្វីដែលជាតួនាទីភារកិច្ច និងឲ្យសាកសមអ្វីដែល​រាជ​រដ្ឋាភិបាល​ប្រគល់​ជូន​។

ក្នុងពិធីប្រកាសចូលកាន់តំណែងនៅព្រឹកថ្ងៃទី១១ ខែវិច្ឆិកា ឆ្នាំ២០២៥នេះ នាយឧត្តមសេនីយ៍ ស ថេត បានបង្ហាញជំនឿចិត្តយ៉ាងមុតមាំថា ប្រធាននាយកដ្ឋានកណ្ដាល​ថ្មី​នឹង​ខិត​ខំពុះ​ពា​រ​ដឹក​នាំ​អង្គភាព ​ឲ្យបានល្អ និងទទួលបានជោគជ័យដូចអ្វីដែលបានធ្វើការប្តេជ្ញាចិត្ត។ ឯកឧត្តម បាន​ឲ្យ​ដឹង​ថា នាយដ្ឋានកណ្ដាលនគរបាលយុត្តិធម៌ គឺជាអង្គភាពដ៏សំខាន់មួយដែលមាននាយកដ្ឋាន និង​មន្ទីរចំណុះចំនួន៥ គឺនាយកដ្ឋាននគរបាលព្រហ្មទណ្ឌ នាយកដ្ឋាន​នគរបាល​ប្រឆាំង​បទ​ល្មើស​សេដ្ឋកិច្ច នាយកដ្ឋាននគរបាលបច្ចេកទេសនិងវិទ្យាសាស្ត្រ នាយកដ្ឋាន​ប្រឆាំង​ការ​ជួញ​ដូរ​មនុស្ស និងការពារអនីតិជន និងមន្ទីរប្រឆាំងបទល្មើសគ្រឿងញៀនជាដើម។

នាយឧត្តម​សេនីយ៍ អគ្គស្នងការនគរបាលជាតិ បានបញ្ជាក់ថា យោងតាមភារ​កិច្ច​ដែល​បាន​កំណត់ ​អង្គភាពទាំងនេះត្រូវគ្រប់គ្រង ដឹកនាំបញ្ជា និងចាត់វិធានការបង្ការ ទប់ស្កាត់ និង​បង្ក្រាប​បទ​ល្មើស​នានា ដែលធ្វើឲ្យប៉ះពាល់ដល់ដំណើរការ នៃជីវភាពរស់នៅរបស់ប្រជាជនកម្ពុជា និង​មនុស្ស​ទូទៅ មានជាអាទិ៍បទឧក្រិដ្ឋ បទល្មើសព្រហ្មទណ្ឌគ្រប់ប្រភេទ អំពីជួញដូរមនុស្ស អាជីវកម្ម​ផ្លូវភេទលើនីតិជន និងអនីតិជន បទល្មើសគ្រឿងញៀន អំពើវិច្ឆេទកម្មសេដ្ឋកិច្ច និង​បទ​ល្មើស​សេដ្ឋកិច្ចគ្រប់ទម្រង់ រួមទាំងការធ្វើកោសល្យវិច័យវិទ្យាសាស្ត្រនានា ដើម្បីបម្រើ​ឲ្យ​ការ​ងារ​ជំនាញ​។

ក្នុងឱកាសនោះដែរ នាយឧត្តមសេនីយ៍ ស ថេត ក៏បានលើកឡើងផងដែរថា ការងារខាងលើនេះ គឺ​ជា​កិច្ចការងារមួយមានវិសាលភាពធំធេង ដែលទាមទារឲ្យថ្នាក់ដឹកនាំគ្រប់កម្រិត មាន​សមត្ថភាព​ ចំណេះដឹង ជំនាញ បទពិសោធ ទេព្យកោសល្យ ស្មារតីម្ចាស់ការទទួលខុសត្រូវ និង​ការ​ប្ដេជ្ញា​ចិត្តខ្ពស់ ដើម្បីបំពេញបេសកម្ម ស្នូលដ៏មានសារៈសំខាន់នេះ ក្នុងការ​ធានា​បាន​នូវ​សុវត្ថិភាព និងសុខុមាលភាព ជូនប្រជាពលរដ្ឋ និងសង្គមជាតិទាំងមូល។

ជាមួយ​គ្នានោះ​ដែរនាយឧត្តមសេនីយ៍ ស ថេត បានធ្វើការណែនាំ និងផ្ដល់អនុសាសន៍មួ​យ​ចំនួន​ផង​ដែរ ​ដោយក្នុងនោះរួមមាន ដូចជាត្រូវក្តាប់ឲ្យបាន និងឲ្យយល់​អំពី​គោល​នយោបាយ​កំណែ​ទម្រង់​ និងអនុសាសន៍ ដឹកនាំរបស់ប្រមុខរាជរដ្ឋាភិបាល ព្រមទាំងផែនការយុទ្ធសាស្រ្ត គោ​ល​ការណ៍​ដឹកនាំនានារបស់ក្រសួងមហាផ្ទៃ និងអគ្គស្នងការដ្ឋាននគរបាលជាតិ។ ត្រូវពិនិត្យ​ពង្រឹង​រចនា​សម្ព័ន្ធ​នាយកដ្ឋាន មន្ទីរ និងលេខាធិការដ្ឋាន ចំណុះនាយកដ្ឋានកណ្តាល ដោយ​តម្រង់​ទិស​ដល់​ការ​កំណត់អំពីសមត្ថកិច្ចស្នូលរៀងៗខ្លួន ការបែងចែកប្រគល់ភារកិច្ចថ្នាក់ដឹកនាំ ឲ្យត្រូវ​នឹង​ជំនាញ បទពិសោធ ការគោរពឋានានុ ក្រមការងារ និងរបៀប​របប​ការងារ​ដែល​បាន​កំណត់​ជា​ដើម​។

ឯកឧត្តមអគ្គស្នងការក៏បានណែនាំឲ្យនាយកដ្ឋានកណ្តាលយុត្តិធម៌ ត្រូវធ្វើការពិនិត្យ តាមដាន និ​ង​វាយម្លៃលទ្ធផលការងារដែលសម្រេចបាន តាមរយៈកិច្ចប្រជុំប្រចាំខែ ត្រីមាស ឆមាស ប្រចាំឆ្នាំ និង​កិច្ចប្រជុំវិសាមញ្ញតាមការចាំបាច់ ព្រមទាំងត្រូវដាក់ចេញនូវបទបញ្ជា និងអនុ​សាសន៍​ណែនាំ​តម្រង់​ទិសបន្តដល់អនុប្រធាន ថ្នាក់ដឹកនាំអង្គភាព និងមន្ត្រីក្រោមឱវាទ។ ត្រូវមានកា​រ​ផ្ដួច​ផ្ដើម​គំនិត​ និងភ្ញាក់រឭកខ្ពស់ ក្នុងភាពម្ចាស់ការលើការបំពេញ តួនាទីនិង​ភារកិច្ច​ទទួ​លខុសត្រូ​វ​រប​ស់​ខ្លួនដែ​ល​បានកំណត់ច្បាស់រួចហើយ ដោយមិនចាំបាច់រងចាំមានបទបញ្ជា ឬអនុសាសន៍​ណែនាំ​ពី​ថ្នាក់​លើ។​ ត្រូវមានគំនិតច្នៃប្រឌិត និងវិធីសាស្ត្រក្នុងការដោះស្រាយបញ្ហានានា និងពិនិត្យ មើ​ល​រាល់​​ចំណុចខ្វះខាតទាំងឡាយ ដើម្បីធ្វើការកែលម្អ និងកែទម្រង់​ឲ្យមា​ន​លក្ខណៈ​ល្អ​ប្រសើរ​ឡើង​វិញ ព្រមទាំងត្រូវបង្កើតគំនិតថ្មីៗ ដើម្បីអភិវឌ្ឍន៍អង្គភាព និងលើកក​ម្ពស់​ប្រសិទ្ធ​ភាពកា​រងា​រឲ្យ​បា​នល្អ​ប្រ​សើរ រួមទាំងការខិតខំបង្កើតស្នាដៃ និងសមិទ្ធផលថ្មីៗបន្ថែមទៀត ជូនអគ្គស្នង​ការដ្ឋាន​នគរបាល​ជាតិ​។

ឯកឧត្តមបានបន្ថែមទៀតថា ត្រូវបន្ដពង្រឹងសាមគ្គីភាព កិច្ចសហការ និងទំនាក់ទំនង​ការងារ​ផ្ទៃ​ក្នុង​ឲ្យ​បានល្អ រួមទាំងការពិនិត្យ និងកែលម្អរបៀបរបប និងលំហូរការងារតាមឋានានុក្រម ដើម្បី​ឲ្យ​ដំណើរ​ការ នៃការងារប្រព្រឹត្តទៅដោយរលូន និងសម្រេចបានលទ្ធផលជោគជ័យ។ ត្រូវបន្ត​ពិនិត្យ​តាម​ដាន​លទ្ធផល នៃការអនុវត្តចំណារបស់ថ្នាក់ដឹកនាំដែលបានចារប្រគល់ជូនជាសមត្ថកិច្ច រួម​ទាំង​តាមដានលទ្ធផល នៃការអនុវត្តអនុសាសន៍ របស់ថ្នាក់ដឹកនាំដែលបានប្រគល់ជូន។ ត្រូវ​យក​ចិត្តទុ​ក​ដាក់ខ្ពស់ ក្នុងការអភិវឌ្ឍសមត្ថភាព ក្រមសីលធម៌វិជ្ជាជីវៈ និងជំនាញពាក់ព័ន្ធនានា ដល់​ថ្នាក់​ដឹក​នាំគ្រប់កម្រិត និងមន្ត្រីជំនាញដើម្បីបន្តវេន និងធានានិរន្តភាព​ការងារ​នៅ​ក្នុង​អង្គភា​ព​នីមួ​យ​ៗ។​ មួយវិញទៀតនាយកដ្ឋានកណ្តាលយុត្តិធម៌ ត្រូវតែពិនិត្យ និងរៀប​ចំ​ពង្រឹង​ការ​ងារ​របស់​ខ្លួនតាមប្រព័ន្ធព័ត៌មានវិទ្យា ដែលជាប្រព័ន្ធការងារទំនើប ដែលរាជរដ្ឋាភិបាលកម្ពុជា និង​ក្រសួង​មហា​ផ្ទៃ បានកំណត់យកធ្វើជាការងារជាអាទិភាពនៅក្នុងកម្មវិធីកំណែទម្រង់របស់ខ្លួនជាដើម៕អត្ថបទ៖ បាន ចក់