ក្រុមប្រឹក្សាអាជីវកម្មអារ៉ាប៊ីសាអូឌីត-កម្ពុជា ចាប់អារម្មណ៍ និងគ្រោងមកឈ្វេងយល់សក្តានុពលកម្ពុជា នៅខែធ្នូ

ក្រុមប្រឹក្សាអាជីវកម្មអារ៉ាប៊ីសាអូឌីត-កម្ពុជា ចាប់អារម្មណ៍លើសក្តានុពលទេសចរណ៍ដ៏សម្បូរបែបជាទីផ្សារទើបនឹងរះ និងកាលានុវត្តន៍ភាពវិនិយោគដ៏ល្អរបស់កម្ពុជា ដោយរៀបចំដំណើរមកសិក្សាឈ្វេងយល់ផ្ទាល់មកកម្ពុជានៅខែធ្នូខាងមុខ។

លទ្ធផលនេះ កើតឡើងក្នុងឱកាស ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូន ឯកឧត្តម Walid bin Nasser Al-Shahri ប្រធានក្រុមប្រឹក្សាអាជីវកម្មអារ៉ាប៊ីសាអូឌីត-កម្ពុជា និងសហការី ជាពាណិជ្ជករធំៗប្រមាណ ៥០រូប ដែលបានស្នើសុំចូលជួបសម្តែងការគួរសម និងឈ្វេងយល់ពីស្ថានភាពនយោបាយ សេដ្ឋកិច្ច សក្តានុពលទេសចរណ៍ និងកាលានុវត្តភាពវិនិយោគ។

គួរបញ្ជាក់ ជំនួបនេះធ្វើឡើង ថ្ងៃទី១០ ខែវិច្ឆិកា ឆ្នាំ២០២៥ ក្នុងឱកាស ឯកឧត្តម ហួត ហាក់ ដឹកនាំគណៈប្រតិភូជាន់ខ្ពស់ក្រសួងទេសចរណ៍ ចូលរួមកិច្ចប្រជុំមហាសន្និបាតលើកទី២៦ នៃអង្គការទេសចរណ៍សហប្រជាជាតិ (UN Tourism- 26th General Assembly) នៅរាជធានីរីយ៉ាដ ព្រះរាជាណាចក្រអារ៉ាប់ប៊ីសាអ៊ូឌីត៕