ក្រសួងការងារគ្រោងពង្រីកការអប់រំបណ្តុះបណ្តាលជំនាញថ្មីៗបន្ថែមទៀត ដើម្បីលើកកម្ពស់វិស័យការងារ

ដើម្បីឆ្លើយតបទៅនឹងនិន្នាការសាកលនៃតម្រូវការទីផ្សារការងារ ក៏ដូចជាការរីកចម្រើនរបស់ប្រទេស ក្រសួងការងារ និងបណ្តុះបណ្តាលវិជ្ជាជីវៈ នឹងបង្កើតឱកាសបន្ថែមទៀតសម្រាប់ឱ្យកម្មករនិយោជិត ក៏ដូចជាយុវជន តាមរយៈកម្មវិធីអប់រំបណ្តុះបណ្តាលវិជ្ជាជីវៈ និងបច្ចេកទេស (TVET) ដើម្បីទទួលបានជំនាញថ្មីៗដែលស្របជាមួយនឹងតម្រូវការការងារសាកល។

លោកជំទាវ សុវណ្ណ វណ្ណារតន៍ រដ្ឋមន្រ្តីស្តីទី នៃក្រសួងការងារ និងបណ្តុះបណ្តាលវិជ្ជាជីវៈ បានមានប្រសាន៍ឱ្យដឹងថា គម្រោងបន្ថែម នៃការអប់រំបណ្តុះបណ្តាលបច្ចេកទេស និងវិជ្ជាជីវៈ ទៅលើជំនាញថ្មីៗនេះ គឺផ្តោតខាងវិស័យកសិកម្ម មានដូចជា៖ ជំនាញឌីជីថល ជំនាញបៃតង និងជំនាញឯកទេសពាក់ព័ន្ធជាមួយការកែច្នៃកសិផល រួមជាមួយការគ្រប់គ្រងគុណភាពក្នុងខ្សែច្រវ៉ាក់ផ្គត់ផ្គង់។

លោកជំទាវ បានបន្តថា ជំនាញទាំងអស់ខាងលើនេះ គឺជាជំនាញមួយដែលនឹងត្រូវជម្រុញកិច្ចសហការគ្នាក្នុងការបណ្តុះបណ្តាលបន្ថែម ដោយសារគម្រោងនេះ រាជរដ្ឋាភិបាលក៏បានគិតគូរយ៉ាងយកចិត្តទុកដាក់ពាក់ព័ន្ធជាមួយ មិនត្រឹមតែ បង្កើតឱកាស បង្កើនប្រាក់ចំណូលជូនដល់ប្រជាពលរដ្ឋ បង្កើននូវឱកាសអាជីវកម្មជូនដល់បងប្អូនជាម្ចាស់សហគ្រាស គ្រឹះស្ថានទេ ប៉ុន្តែក៏បានគិតគូរយ៉ាងច្បាស់អំពីការការពារបរិស្ថានផងដែរ។ អញ្ចឹងចំណុចទាំងអស់នេះ រាជរដ្ឋាភិបាលបាននិងកំពុងជម្រុញ ថាតើធ្ធើយ៉ាងណាចាប់ឱ្យជាប់ជាមួយការអភិវឌ្ឍន៍នូវជំនាញបៃតង ជម្រុញឱ្យមានឱកាសការងារបៃតងច្រើនឡើង ធ្វើយ៉ាងណាឱ្យបរិស្ថានរបស់យើងអាចនៅមានចរីភាពសម្រាប់យុវជនជំនាន់ក្រោយផងដែរ។

លោកជំទាវ សុវណ្ណ វណ្ណារតន៍ សង្ឃឹមទៀតថា តាមរយៈព័ត៌មាននេះ ជាពិសេសដើម្បីឆ្លើយតបតម្រូវការទីផ្សារការងារនាពេលអនាគត សង្ឃឹមថា នឹងមានការចូលរួមភាគីពាក់ព័ន្ធបន្ថែមទៀតក្នុងការពង្រឹងនូវជំនាញនានាពាក់ព័ន្ធវិស័យកសិកម្ម និងវិស័យឧស្សាហកម្ម។ បន្ថែមពីនេះ លោកជំទាវ បានស្នើរគ្រប់ភាគីជួយផ្សព្វផ្សាយបន្ត ទៅដល់អ្នកមានបំណងចង់រៀនជំនាញថ្មីៗ ជាពិសេសពាក់ព័ន្ធជំនាញកសិកម្ម កសិ-ឧស្សាហកម្ម និងកសិ-ចំណីអាហារជាដើម ខណៈក្រសួងការងារ បានកំពុងមានកិច្ចសហការជាមួយដៃគូនានាបន្ថែមដើម្បីធានាថា ក្រោយបញ្ចប់វគ្គបណ្តុះបណ្តាលជំនាញហើយ គឺអាចទទួលបានការងារ និងដើម្បីធានាថា ប្រជាពលរដ្ឋអាចចូលរួមជាមួយរាជរដ្ឋាភិបាលដើម្បីជំរុញកំណើនសេដ្ឋកិច្ចក្នុងវិស័យកសិកម្មផងដែរ៕អត្ថបទ៖ ឈិត បូរ៉ាវី