កាកបាទក្រហមកម្ពុជាជូនសារលិខិតដំណឹងគ្រួសារយុទ្ធជនទាំង១៨នាក់កំពុងស្ថិតក្រោមការឃុំគ្រងដោយយោធាថៃដល់អ្នកសម្របសម្រួល ICRC

នៅព្រឹកថ្ងៃទី២៦ ខែវិច្ឆិកា ឆ្នាំ២០២៥នេះ លោកជំទាវ ម៉ែន នារីសោភ័គ អគ្គលេខាធិការរងទី១ កាក​បាទក្រហមកម្ពុជា បានទទួលជួបសវនាការ និងពិភាក្សាការងារជាមួយ លោក អ៊ិនរីកេ អែល កុង​ត្រឺរ៉ាស់ ( Enrique L. Contreras ) អ្នកសម្របសម្រួលប្រតិបត្តិការប្រចាំតំបន់ អាស៊ី​ប៉ា​ស៊ី​ហ្វិក ​នៃគណៈកម្មាធិការអន្តរជាតិនៃកាកបាទក្រហម (អាយ.ស៊ី.អរ.ស៊ី.) និងសហការី នៅ​ទីស្នាក់​ការ​កណ្តាលកាកបាទក្រហមកម្ពុជា។

ក្នុងជំនួបនោះ ប្រតិភូ អាយ.ស៊ី.អរ.ស៊ី. បានធ្វើបច្ចុប្បន្នភាព​នៃ​ការងារ​សហប្រតិបត្តិការ​មួយ​ចំនួន​ជាមួយ​កាកបាទក្រហមកម្ពុជា ក្នុងឱកាសនោះដែរ លោកជំទាវអគ្គលេខាធិការរង១ បាន​ប្រគល់​ជូន​នូវ​សារលិខិតដំណឹងគ្រួសារកាកបាទក្រហម ដែលទទួល​បាន​ពី​ក្រុម​គ្រួសារ​យុទ្ធ​ជន​ទាំង​១៨​នាក់​ សម្រាប់ជូនដល់យុទ្ធជនដែលកំពុងជាប់ឃុំជាលើកទី៤ តាមរយៈ​គណៈកម្មាធិការ​អន្តរជាតិ​នៃ​កាក​បាទក្រហមផងដែរ។

សូមបញ្ជាក់ថា គិតមកដល់ថ្ងៃទី២៦ ខែវិច្ឆិកា ឆ្នាំ២០២៥នេះជា គឺមានរយៈពេល​១២០​ថ្ងៃ​ហើយ​ដែល​វីរ​កងទ័ពកម្ពុជាចំនួន១៨រូប ត្រូវបានចាប់ខ្លួន និងដាក់ឱ្យស្ថិត​ក្រោម​ការ​ឃុំ​គ្រង​របស់​យោធា​ថៃ។​

រាជរដ្ឋាភិបាលកម្ពុជា បន្តអំពាវនាវឱ្យភាគីថៃគោរពឱ្យបានម៉ឺងម៉ាត់ ស្មោះត្រង់ និងដោយសុច្ឆន្ទៈពិតប្រាកដ នូវសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ ត្រង់កថាខណ្ឌទី៥ បានគូសបញ្ជាក់ថា “ភាគីថៃត្រូវដោះលែងយោធិនទាំង១៨នាក់របស់កម្ពុជាជាបន្ទាន់ដោយមិនបង្អែបង្អង់” ព្រមទាំងគោរពនិងអនុវត្តនូវរាល់កាតព្វកិច្ចទាំងឡាយនៅក្រោមច្បាប់អន្តរជាតិ ជាពិសេសច្បាប់មនុស្សធម៌អន្តរជាតិ ដោយដោះលែងវីរកងទ័ពកម្ពុជាឱ្យបានឆាប់រហ័សជាទីបំផុត ដើម្បីពួកគាត់អាចវិលត្រឡប់មកជួបជុំក្រុមគ្រួសារវិញ ប្រកបដោយសុខសុវត្ថិភាព។

សូមគូសបញ្ជាក់ផងដែរថា រាជរដ្ឋាភិបាលកម្ពុជា បាននឹងកំពុងធ្វើការយ៉ាងសស្រាក់សស្រាំឥតឈប់ឈរ ដោយបានប្រើប្រាស់គ្រប់មធ្យោបាយនិងយន្តការដោះស្រាយទាំងអស់ ដើម្បីទាមទារឱ្យភាគីថៃដោះលែងវីរកងទ័ពរបស់យើងទាំង១៨នាក់នោះ ឱ្យបានឆាប់រហ័សជាទីបំផុត និងដោយសុខសុវត្ថិភាព។ រាជរដ្ឋាភិបាល ក្រសួងការពារជាតិ និងកងយោធពលខេមរភូមិន្ទ មិនដែលបោះបង់កងទ័ពរបស់យើងណាម្នាក់ចោលនោះឡើយ មិនថាក្នុងកាលៈទេសៈណាក៏ដោយ៕