នាយកវិទ្យាល័យទូទាំងប្រទេស ផ្លាស់ប្ដូរបទពិសោធន៍ ការគ្រប់គ្រង និងការផ្តល់សេវាសាធារណៈ

នាយក នាយិកាវិទ្យាល័យ នៅទូទាំងប្រទេស បានជួបជុំគ្នានៅខេត្តបាត់ដំបង ដើម្បីផ្លាស់ប្ដូរបទពិសោធគ្នាទៅវិញទៅមក ស្តីពី ការគ្រប់គ្រង និងការផ្តល់សេវាសាធារណៈ ជូនដល់ប្រជាជនក្នុងមូលដ្ឋានរបស់ខ្លួន។

ក្រោយពីប្រកាសបើកសិក្ខាសាលាចែករំលែកបទពិសោធន៍នៃការគ្រប់គ្រង និងការផ្តល់សេវាសាធារណៈរបស់ជ័យលាភីអង្គភាពផ្តល់សេវាសាធារណៈគំរូក្នុងវិស័យអប់រំឆ្នាំ២០២៤ កម្រិតវិទ្យាល័យ ដោយ ឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ តំណាងដ៏ខ្ពង់ខ្ពស់ ឯកឧត្តមឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការវាយតម្លៃអង្គភាពផ្តល់សេវាសាធារណៈថ្នាក់ជាតិ (គ.វ.ជ.) រួចមក អង្គសិក្ខាសាលាបានផ្ដល់ជូនសិក្ខាកាមនូវវេទិកានៃការធ្វើបទបង្ហាញ ស្ដីពីការគ្រប់គ្រង និងការផ្តល់សេវាសាធារណៈ របស់លោកនាយកវិទ្យាល័យចំនួន៨ ដែលបានជាប់ជាអង្គភាពផ្ដល់សេវាសាធារណៈគំរូក្នុងវិស័យអប់រំ ឆ្នាំ២០២៤ សម្រាប់កម្រិតវិទ្យាល័យ។

ក្រោយការបញ្ចប់បទបង្ហាញ ដោយមានការសម្របសម្រួលពីថ្នាក់ដឹកនាំនៃក្រសួងមុខងារសាធារណៈ និងក្រសួងអប់រំ យុវជន និងកីឡា សិក្ខាកាមមានឱកាសសួរសំណួរ ទៅកាន់វាគ្មិនទាំង៨រូប ដែលមានបទពិសោធល្អៗ ចំណេះដឹងថ្មីៗ លើការគ្រប់គ្រង និងការផ្តល់សេវាសាធារណៈ ជាពិសេសពាក់ព័ន្ធនឹងឧត្ដមានុវត្តន៍ និងនវានុវត្តន៍ ដែលធ្វើឱ្យសាលាទទួលបានភាពជោគជ័យ ក្នុងការងារផ្ដល់សេវាអប់រំល្អប្រសើរសម្រាប់សិស្សានុសិស្ស និងគន្លឹះសំខាន់ៗ នៃការទទួលបានការចូលរួមសាមគ្គីគាំទ្រពីបុគ្គលិក គ្រូបង្រៀនក្នុងអង្គភាព អាជ្ញាធរនៅមូលដ្ឋាន ដៃគូអភិវឌ្ឍន៍ និងអ្នកពាក់ព័ន្ធផ្សេងៗទៀត។

គួរបញ្ជាក់ថា ក្នុងសិក្ខាសាលារយៈពេលពីរថ្ងៃនេះ ចាប់ពីថ្ងៃទី២៧ ដល់២៨ ខែវិច្ឆិកា ឆ្នាំ២០២៥ ក្រៅពីទទួលបានការចែករំលែកបទពិសោធន៍ តាមរយៈបទបង្ហាញពីអង្គភាពជ័យលាភីនានា សិក្ខាកាមក៏មានឱកាសទៅទស្សនកិច្ចដោយផ្ទាល់នៅ វិទ្យាល័យពេជ្រចិន្តា ដែល​ជា​អង្គភាព​ផ្តល់​សេវា​សាធាណៈគំរូជ័យលាភីលេខ១ ប្រចាំឆ្នាំ២០២៤ ផងដែរ។

វិទ្យាល័យដែលបានចូលរួមចែករំលែកបទពិសោធជោគជ័យរបស់ខ្លួនក្នុងសិក្ខាសាលានេះ រួមមាន​៖ ១. វិទ្យាល័យសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដើមឫស ២. វិទ្យាល័យ ហ៊ុន សែន ឧត្តរមានជ័យ ខេត្តឧត្តរមានជ័យ ៣. វិទ្យាល័យ ហ៊ុន សែន វាលរេញ ខេត្តព្រះសីហនុ ៤. វិទ្យាល័យ​កំពង់ស្ពឺ ខេត្តកំពង់ស្ពឺ ៥. វិទ្យាល័យចំណេះទូទៅ និងបច្ចេកទេសពួក ខេត្តសៀមរាប ៦.វិទ្យាល័យកោះស្តេច ខេត្តកោះកុង ៧.វិទ្យាល័យ ហ៊ុន សែន ប្រសូតិ ខេត្តស្វាយរៀង និង ៨. វិទ្យាល័យ​កំពង់ស្រឡៅ ខេត្តព្រះវិហារ៕