ពលរដ្ឋខ្មែរប្រមាណ ៤ ០០០ នាក់ចូលរួមសមាធិ ក្រោមប្រធានបទ «ចិត្តស្អាត ខ្មែរស្អាត ដើម្បីសន្តិភាព»

នៅល្ងាចថ្ងៃទី២៩ វិច្ឆិកា ម្សិលមិញនេះ ប្រជាពលរដ្ឋប្រមាណ ៤ ០០០នាក់ បានមកជួបជុំគ្នានៅពហុកីឡដ្ឋានជាតិអូឡាំពិក ចូលរួមក្នុងវិធីសមាធិ ក្រោមប្រធានបទ«ចិត្តស្អាត ខ្មែរស្អាត ដើម្បីសន្តិភាព»។ ការសមាធិនេះ កម្មវិធីមួយរបស់គម្រោងស្អាត ក្រោមការចូលរួម ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និង ជាប្រធានក្រុមប្រឹក្សាភិបាលនៃគម្រោងស្អាត វត្តមានរបស់ ឯកឧត្ដម ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តី ក្រសួងអប់រំ រួមទាំងមានការសម្តែងធម្មទេសនាពី ព្រះភិក្ខុ វជិរប្បញ្ញោ គូ សុភាព។

ក្នុងឱកាសនោះ ឯកឧត្តម ឧបនាយករដ្ឋមន្ត្រី ហ៊ុន ម៉ានី ក្នុងនាមជាប្រធានក្រុមប្រឹក្សាភិបាលនៃគម្រោងស្អាត បានលើកឡើងដែរថា នេះជាការជួបជុំបង្ហាញពីសាមគ្គីភាពរបស់ប្រជាពលរដ្ឋខ្មែរ។ សាមគ្គីភាពជាធ្លុងមួយ សាមគ្គីភាពបង្ហាញពីការគាំទ្រ ដល់រាជរដ្ឋាភិបាល គាំទ្រលើកទឹកចិត្តដល់កងកម្លាំងជួរមុខ ក្នុងការការពារមាតុភូមិទឹកដី។ ទន្ទឹមគ្នានេះដែរ ឯកឧត្តម ក៏បានលើកឡើងដែរថា នេះក៏ជាការជួបជុំ ធ្វើឱ្យផ្លូវចិត្តម្នាក់ៗ បានស្ងប់។ ស្ងប់ពីបញ្ហាដែលកម្ពុជា បានជួបប្រទះជាច្រើន នៅក្នុងឆ្នាំ ២០២៥នេះ។

ស្របគ្នានឹងការលើកឡើងរបស់ ឯកឧត្តម ឧបនាយករដ្ឋមន្ត្រី ហ៊ុន ម៉ានី ផងដែរ អ្នកចូលរួមទូទៅលើកឡើងដូចគ្នាថា នេះជាការជួបជុំដ៏សំខាន់។ ជាការជួបជុំលាងសម្អាតផ្លូវចិត្ត ធ្វើឱ្យចិត្តបានស្ងប់ ធូរស្រាល ពីបញ្ហានានាដែលគ្រប់គ្នាជួបប្រទះ ពិសេសបញ្ហាព្រំដែនដែលមិនទាន់បិទបញ្ចប់។ លើសពីនេះ ក៏ជាការជួបជុំបង្ហាញពីសាមគ្គីភាពរបស់ប្រជាពលរដ្ឋខ្មែរ បង្ហាញពីការស្រឡាញ់សន្តិភាពរបស់ខ្មែរ។

គួរបញ្ជាក់ដែរថា នៅក្នុងកម្មវិធីសមាធិនេះ សម្តេចព្រះឧត្តមវង្សាបណ្ឌិត គូ សុភាព ជាសមាជិកថេរភាពសភានៃព្រះពុទ្ធសាសនានៅព្រះរាជាណាចក្រកម្ពុជា បានផ្តល់ឱវាទរៀបចំកម្មវិធីនេះឡើង និងបានសម្តែងធម្មទេសនា ។ ទន្ទឹមនិងនេះ លោក នឹម ឈុន្នី បានដឹកនាំធ្វើសមាធិដើម្បីអប់រំចិត្តឲ្យក្លាយទៅ កូនល្អ ពលរដ្ឋល្អ ដោយផ្តោតចម្បងទៅលើស្អាតកាយ ស្អាតវាចា និងចិត្តស្អាត និងជាពិសេសក្លាយជាទំពាំងស្នងឬស្សីសម្រាប់សង្គមជាតិ៕ អត្ថបទ៖ គឹមហុក