ស៊ីម៉ាក់ធ្វើពិធីបញ្ចប់ការងារចាក់បេតុងសំណង់អគាររាងគ្រាប់មីន PMN-2 ដែលជានិមិត្តរូបបង្ហាញការប្តេជ្ញាចិត្តខ្ពស់របស់កម្ពុជាក្នុងការអនុវត្តអនុសញ្ញាអូតាវ៉ាប្រកបដោយជោគជ័យ

ភ្នំពេញ៖ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ បានឱ្យដឹងថា នៅព្រឹកថ្ងៃទី១ ខែធ្នូ ឆ្នាំ២០២៥នេះ នៅសារមន្ទីតេជោសន្តិភាព ស្ថិតនៅឃុំត្រពាំងធំ ស្រុកបាគង ខេត្តសៀមរាប អង្គភាពស៊ីម៉ាក់ និងក្រុមការងារព្រមក្រុមវិស្វករជប៉ុននៃក្រុមហ៊ុន SATO KOGYO បានរៀបចំពិធីបញ្ចប់ការងារចាក់បេតុងទាំងស្រុងសម្រាប់សំណង់អគាររាងគ្រាប់មីន PMN-2 ដែលអគារនេះមានទំហំផ្ទៃបាត ១០៨ម៉ែត្រ x ១០៨ ម៉ែត្រ និងមានកម្ពស់ ១៧ម៉ែត្រ ជាអគាររាងគ្រាប់មីន PMN-2 ធំជាងគេលើពិភពលោក។

ឯកឧត្តម ហេង រតនា បានថ្លែងថា អគាររាងគ្រាប់មីន PMN-2 នេះ ជានិមិត្តរូបបង្ហាញឱ្យឃើញច្បាស់នូវឆន្ទៈ និងការប្តេជ្ញាចិត្តខ្ពស់របស់រាជរដ្ឋាភិបាលកម្ពុជាក្នុងការអនុវត្តអនុសញ្ញាមីនអន្តរជាតិអូតាវ៉ាប្រកបដោយជោគជ័យ។

ឯកឧត្តមបានបន្តថា សមិទ្ធិផលនេះក៏បង្ហាញឱ្យឃើញនូវស្មារតីរួមគ្នារបស់រដ្ឋភាគីទាំងឡាយដែលបានរួមគ្នាអនុវត្តន៍អនុសញ្ញាអូតាវ៉ាប្រកបដោយការទទួលខុសត្រូវខ្ពស់។

ឯកឧត្តម ហេង រតនា បានបញ្ជាក់ថា គម្រោងសាងសង់អគាររាងគ្រាប់មីន PMN-2 នេះ បានផ្តួចផ្តើមអនុវត្តតាំងពីថ្ងៃទី២៨ ខែមករា ឆ្នាំ២០២២ និងគ្រោងបញ្ចប់នៅថ្ងៃទី២៨ ខែកុម្ភៈ ឆ្នាំ២០២៦ ខាងមុខនេះ៕