គណៈកម្មការទី៥ព្រឹទ្ធសភា ប្រជុំជាមួយតំណាងរាជរដ្ឋាភិបាល ដើម្បីពិនិត្យសិក្សាលើសេចក្តីព្រាងច្បាប់ពាក់ព័ន្ធនឹងការយកពន្ធត្រួតគ្នា

នាព្រឹកថ្ងៃពុធ ១៣កើត ខែមិគសិរ ឆ្នាំម្សាញ់ សប្ដស័ក ពុទ្ធសករាជ២៥៦៩ ត្រូវនឹងថ្ងៃទី៣ ខែធ្នូ ឆ្នាំ២០២៥ វេលាម៉ោង ១១:០០ នាទី នៅសាលប្រជុំពិសេស៣ វិមានព្រឹទ្ធសភា គណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន នៃព្រឹទ្ធសភា (គណៈកម្មការទី៥) ដឹកនាំដោយ ឯកឧត្តមបណ្ឌិត ចែម វីឌ្យ៉ា ប្រធានគណៈកម្មការ បានអញ្ជើញដឹកនាំកិច្ចប្រជុំអន្តរគណៈកម្មការនានារបស់ព្រឹទ្ធសភា ជាមួយតំណាងរាជរដ្ឋាភិបាល ដឹកនាំដោយឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដើម្បីពិនិត្យសិក្សាលើសេចក្តីព្រាងច្បាប់ស្តីពីការអនុម័តយល់ព្រមលើ៖

១.កិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋប្រជាធិបតេយ្យប្រជាមានិតឡាវ ស្តីពីការលុបបំបាត់ការយកពន្ធត្រួតគ្នាពាក់ព័ន្ធនឹងពន្ធលើប្រាក់ចំណូល និងការបង្ការការគេចវេះពន្ធ និងការចៀសវាងពន្ធ។

២.កិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋហ្វីលីពីន ស្តីពីការលុបបំបាត់ការយកពន្ធ និងការចៀសវាងពន្ធត្រួតគ្នាពាក់ព័ន្ធនឹងពន្ធលើប្រាក់ចំណូល និងការបង្ការការគេចវេះពន្ធ។

៣.ពិធីសារទី២ ដើម្បីធ្វើវិសោធនកម្មលើកិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋសិង្ហបុរី ស្តីពីការចៀសវាងការយកពន្ធត្រួតគ្នានិងការបង្ការការកិបកេងបន្លំពន្ធពាក់ ព័ន្ធនឹងពន្ធលើប្រាក់ចំណូល។

កិច្ចព្រមព្រៀងស្តីពីការចៀសវាងការយកពន្ធត្រួតគ្នា កម្ពុជា-ឡាវ និងកម្ពុជា-ហ្វីលីពីន ត្រូវបានចរចាដោយឈរលើមូលដ្ឋាន ដែលកម្ពុជាមានក្នុងកិច្ចព្រមព្រៀងដែលបានចុះហត្ថលេខានិងផ្តល់សច្ចាប័នរួចទាំង១១នេះ និងបានឆ្លុះបញ្ចាំងអំពីគោលការណ៍សំខាន់ៗនៃគោលនយោបាយពន្ធដារ អន្តរជាតិ និងច្បាប់ និងបទប្បញ្ញត្តិស្តីពីពន្ធដាររបស់កម្ពុជា ក៏ដូចជាតាមលំនាំគំរូអង្គការសហប្រជាជាតិ ដែលមានលក្ខណៈអំណោយផល ដល់ប្រទេសកំពុងអភិវឌ្ឍដូចជាកម្ពុជាជាដើម។

ចំពោះពិធីសារទី២ ដើម្បីធ្វើវិសោធនកម្មលើកិច្ចព្រមព្រៀងស្តីពីការចៀសវាងការយកពន្ធត្រួត គ្នារវាងកម្ពុជានិងសិង្ហបុរី កម្ពុជាក៏បានបញ្ចប់ការចរចានិងចុះហត្ថលេខាលើពិធីសារទី២នេះ ដែលមានគោលបំណងកែសម្រួល និងធ្វើឱ្យប្រសើរឡើងនូវកិច្ចព្រមព្រៀងដែលមានស្រាប់ អាចឆ្លើយតបទៅនឹងការវិវត្តថ្មីៗ នៅក្នុងបរិបទពន្ធដារអន្តរជាតិ ដូចជាបានកែសម្រួលចំណងជើងនិងបុព្វកថារបស់កិច្ចព្រម ព្រៀង និងបន្ថែមមាត្រាស្តីពីសិទ្ធិទទួលផលប្រយោជន៍ ដូចមានក្នុងគំរូកិច្ចព្រមព្រៀងស្តីពីការចៀសវាង ការយកពន្ធត្រួតគ្នារបស់កម្ពុជាបច្ចុប្បន្ន ដែលបានរៀបរាប់ខាងលើនេះ។ ការធ្វើវិសោធនកម្មលើកិច្ចព្រមព្រៀងតាមរយៈពិធីសារទី២នេះ ក៏ដើម្បីឱ្យមានសង្គតិភាពជាមួយស្តង់ដាអប្បបរមានៃក្របខ័ណ្ឌ បរិយាបន្នរបស់អង្គការសហប្រតិបត្តិការ និងអភិវឌ្ឍន៍សេដ្ឋកិច្ចនិងប្រទេសដែលមានសេដ្ឋកិច្ចធំ២០ (G20) សម្រាប់ប្រឈមនឹងការបន្ថយមូលដ្ឋានគិតពន្ធនិងការបង្វែរប្រាក់ចំណេញផងដែរ។