ក្រសួងសុខាភិបាលកំពុងអនុវត្តយុទ្ធសាស្ត្រពន្លឿនការកាត់បន្ថយអត្រាមរណភាពមាតា និងទារក

លោកជំទាវសាស្រ្តាចារ្យ អ៊ឹម សិទ្ធិការ្យ រដ្ឋលេខាធិការ ក្រសួងសុខាភិបាល និងជា​ប្រធាន​សមាគម​គ្រូពេទ្យ​ទារកកម្ពុជា បានថ្លែងថា ក្រសួងសុខាភិបាល កំពុងអនុវត្តតាមរយៈយុទ្ធសាស្ត្រ ផែន​ទី​បង្ហាញ​ផ្លូវសម្រាប់ពន្លឿនការកាត់បន្ថយអត្រាមរណភាពមាតា និងទារក២០២៥-២០៣០។

លោកជំទាវសាស្រ្តាចារ្យ អ៊ឹម សិទិ្ធការ្យ ថ្លែងបញ្ជាក់បែបនេះ ក្នុងពិធីបើកសិក្ខាសាលាលើកទី៦ ស្តីពី «START4NEWBORN – ការជួយសង្គ្រោះទារកទើបនឹងកើត» រៀបចំ​ដោយ​សមាគម​គ្រូ​ពេទ្យ​ទារក​កម្ពុជា នាមនី្ទរពេទ្យកាល់ម៉ែត ព្រឹកថ្ងៃទី៥ ខែធ្នូ ឆ្នាំ២០២៥។

លោកជំទាវសាស្រ្តាចារ្យបានសង្កត់ធ្ងន់ថា យោងតាមរយៈ​របាយការណ៍​សូចនករ​ស្នូល​នៃ​ការ​អង្កេត​ប្រជា​សាស្ត្រ និងសុខភាព នៅកម្ពុជាឆ្នាំ២០២១-២០២២ បានបង្ហាញឲ្យឃើញថា អត្រា​មរណ​ភាព​ទារកនៅក្នុងប្រទេសកម្ពុជា មានការថយចុះគួរឲ្យកត់សំគាល់ពី៣៧នាក់ ក្នុងចំនោម ១០០០កំនើតរស់ ក្នុងឆ្នាំ ២០០០ មកត្រឹមតែ ៨នាក់ ក្នុងចំនោម ១០០០ កំនើតរស់ក្នុងឆ្នាំ ២០២១-២០២២។ នេះជាសមិទ្ធផលយ៉ាងធំ ធេងរបស់ក្រសួងសុខាភិបាល ក៏ដូចជា​រាជ​រដ្ឋាភិបាល​កម្ពុជា ក្រោមការដឹកនាំដ៏ឈ្លាសវៃ ដែលមានសម្តេចអគ្គមហាសេនាបតីតេជោ ហ៊ុន សែន អតីត​នាយករដ្ឋមន្ត្រី និងបន្តមករាជរដ្ឋាភិបាល នីតិកាលទី៧ ដែល​មាន​សម្តេច​មហា​បវរ​ធិបតី ​ហ៊ុន ម៉ាណែត នាយករដ្ឋមន្ត្រី ។ បើទោះបីជាយ៉ាងណា អត្រា​មរណ​ភាព​ទារក​នៅ​ក្នុង​ប្រទេស​កម្ពុជា​នៅ តែមានកម្រិតខ្ពស់នៅឡើយបើធៀបទៅនឹងប្រទេសអភិវឌ្ឍន៏ដទៃទៀត។

ឯកឧត្តមសាស្ត្រាចារ្យ គង់ សន្យា អគ្គនាយកមន្ទីរពេទ្យកាល់ម៉ែត លើកឡើងថា មន្ទីរ​ពេទ្យ​កាល់​ម៉ែត​ក៏​ដូច​ជា​សមាគមគ្រូពេទ្យទារកកម្ពុជា និងជាថាមពល​ជំរុញ​ដល់​សិក្ខា​កាម​ទាំង​អស់​ឲ្យ​មាន​ការ​យល់​ដឹង និងមានជំនាញពិតប្រាកដ ក្នុងការសង្គ្រោះទា​រកក្រោ​យ​សម្រាល​បាន​ត្រឹម​ត្រូវ​តាម​ឯក​ទេស​ជំនាញ សំដៅកាត់បន្ថយអត្រាមរណភាពទារកទើបនឹងកើតឱ្យស្ថិតក្នុងកម្រិតទាបបំផុត ដែល​ស្រប​នឹងគោលដៅសំខាន់របស់ក្រសួងសុខាភិបាល ក៏ដូចជាក្តី​សង្ឃឹម​របស់​មាតា​ទាំង​ឡាយ​នៅ​ពេល​មានទម្ងន់។

សូមបញ្ជាក់ថា សិក្ខាសាលានេះមានគោលបំណងក៏ដូចជាគោលការណ៍ START4NEWBORN គឺ​ផ្តោត​លើការបណ្តុះបណ្តាលសមត្ថភាពបុគ្គលិកសុខាភិបាល អោយចេះអនុវត្តការសង្គ្រោះទារក អោយ​បាន​ត្រឹមត្រូវ ទាក់ទងនឹងការសង្គ្រោះទារកក្រោយសម្រាល ជាពិសេសនៅ១នាទី មាស​ដំបូង​នៃ​ជីវិតទារក ចេះប្រើប្រាស់ឧបករណ៍សាមញ្ញ ត្រឹមត្រូវ និងមានគុណភាព ចេះ​កសាង​ប្រព័ន្ធ​បញ្ជូន​បាន​ត្រឹមត្រូវ និងមានប្រសិទ្ធភាពតាមស្តង់ដា នៅគ្រប់កំរិតសង្គ្រោះទារក និងដើម្បីធ្វើ​បច្ចុប្បន្ន​ភាព អភិវឌ្ឍលើជំនាញរបស់ខ្លួន ព្រមទាំងទទួលបានការផ្លាស់ប្តូរបទពិសោធន៍ថ្មីៗ ដល់​សិក្ខា​កាម​ទាំងអស់ទាំងស្ថាប័នរដ្ឋ និងឯកជនទាក់ទងនឹងផ្នែកសម្ភព និងទារក ជាពិសេស គ្រូ​ពេទ្យ ឆ្មប គិលានុបដ្ឋាក ដែលកំពុងបំរើការងារតាមមន្ទីរពេទ្យ ខេត្ត មន្ទីរពេទ្យបង្អែកស្រុក មណ្ឌល​សុខភាព ទូទាំងរាជធានី-ខេត្ត ទាំង២៥ ដោយមានការធ្វើបទបង្ហាញជាទ្រឹស្តី និងការ​អនុវត្ត​ផ្ទាល់​ទៅលើ Mannequin ពីក្រុមគ្រូពេទ្យជំនាញ​សង្គ្រោះ​ និង​ថែ​ទាំ​ទារក​នៃ​មន្ទីរ​ពេទ្យ​កាល់​ម៉ែត និងមន្ទីរពេទ្យគន្ធបុប្ផា៕ អត្ថបទ រដ្ឋា