សមាគមគីមីកម្ពុជា ត្រៀមបង្កើតក្លឹបគីមីនៅតាមវិទ្យាល័យនានា ដើម្បីជួយបង្រៀនសិស្សបន្ថែម

ដើម្បីជួយសិស្សានុសិស្សលើផ្នែកគីមីវិទ្យា នៅឆ្នាំ២០២៦ សមាគមគីមីកម្ពុជា នឹងបង្កើតក្លឹបគីមី នៅ​តាម​វិទ្យាល័យនានា ដើម្បីជួយបង្រៀនសិស្ស ពិសេសនឹងជួយ​បង្រៀន​សិស្ស​ខ្សោយ​លើ​ផ្នែក​គីមី​វិទ្យា ដើម្បីឱ្យពួកគេបានសិក្សាតាមឱ្យទាន់ ហើយក៏​ដើម្បី​ជួយ​លើក​កម្ពស់​លើ​មុខ​វិជ្ជា​គីមី​ផង​ដែរ​។

បញ្ជាក់ប្រាប់ BTV ក្រោយពិធីបើកសន្និសីទអន្តរជាតិសមាគមគីមីកម្ពុជា លោកជំទាវ សៀង ហ៊ុយ ប្រធាន​ក្រុមប្រឹក្សាភិបាលសមាគមគីមីកម្ពុជា បានប្រាប់ថា សន្និសីទអន្តរជាតិលើកនេះ មាន​ការ​ចូល​រួម​ពី​សមាគមគីមីកម្ពុជា និងសមាគមគីមីជប៉ុន ដើម្បីរួមគ្នា​បង្ហាញ​លទ្ធផល​នៃ​ការ​ធ្វើ​ពិសោធន៍​ ក្រោយពីបានសិក្សាស្រាវជ្រាវកន្លងមក។ លោកជំទាវបានបន្តថា សមាគមគីមីកម្ពុជា បាន​បណ្តុះបណ្តាលលោកគ្រូអ្នកគ្រូ ផ្នែកគីមីវិទ្យា បានចំនួន២៣រាជធានី.ខេត្តហើយ ដើម្បី​ឱ្យ​លោក​គ្រូអ្ន​កគ្រូ កាន់តែយល់ដឹងគីមីវិទ្យា ពិសេសផ្នែកពិសោធន៍គីមីវិទ្យាផ្ទាល់តែម្តង ហើយការ​បណ្តុះ​បណ្តាល​ទំាងនោះ គឺចង់ឱ្យលោកគ្រូអ្នកគ្រូ យកទៅបង្រៀនសិស្ស​ឱ្យ​កាន់​តែ​យល់​ដឹង​បន្ថែម​មុខ​លើ​មុខវិជ្ជាគីមី ហើយសមាគមគីមីវិទ្យា នឹងសហការជាមួយក្រសួងអប់រំ ដោយ​នៅ​ឆ្នាំ​២០២៦ នឹងបង្កើតឱ្យមានក្លឹបគីមីវិទ្យានៅតាមវិទ្យាល័យនានាដើម្បីជួយបង្រៀនសិស្សបន្ថែម ពិ​សេស​គឺ​សិស្សដែលខ្សោយគីមីវិទ្យា។

ចំណែកឯកឧត្តមបណ្ឌិត អ៊ុម រម្យណី រដ្ឋលេខាធិការ តំណាងឯកឧត្តមបណ្ឌិតសភាចារ្យ ហង់ ជួន​ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជននិងកីឡា បានលើកឡើងថា សន្និសីទ​អន្តរជាតិ​នៃ​សមាគមគីមីកម្ពុជា នៅពេលនេះ ពិតជាមានសារសំខាន់ណាស់ ដើម្បីផ្តល់​ឱកាស​ឱ្យ​អ្នក​សិក្សា​ស្រាវជ្រាវផ្នែកគីមីវិទ្យាទំាងអស់ បានមកជួបជុំគ្នា និងបានបង្ហាញ​ពី​លទ្ធផល​នៃ​ការ​ស្រាវ​ជ្រាវ ​ដើម្បីគំណត់រូបមន្តសម្រាប់ចងក្រងជាឯកសារដើម្បីទុកឱ្យសិស្សនិស្សិត បានសិក្សាបន្ត ដូច​នេះ​ឯកឧត្តមសង្ឃឹមថា តាមរយៈសន្និសីទអន្តរជាតិនៃសមាគមគីមីកម្ពុជានៅពេលនេះ នឹង​ទទួល​បាន​លទ្ធផល​ជាវិជ្ជមាន សម្រាប់កម្ពុជា-ជប៉ុន ដែលបានរួមគ្នាធ្វើសន្និសីទ​រួមគ្នានៅ​ពេល​នេះ​តែ​ម្តង​។

សូមបញ្ជាក់ថា សមាគមគីមីកម្ពុជា បានបង្កើតឡើងមានរយៈពេលជាង១០ឆ្នាំមកហើយ ដែល​បាន​បង្កើតចេញពី សាស្ត្រាចារ្យផ្នែកគីមីវិទ្យា ក្នុងគោលបំណងដើម្បីសិក្សាស្រាវជ្រាវ និងរក​អ្វី​ថ្មី​ៗ​ពាក់​ព័ន្ធ​នឹងគីមីវិទ្យា ដើម្បីចងក្រងឱ្យសិស្សនិស្សិតបានសិក្សារៀនសូត្រ រួមនឹងផល​វិបាក​នៅ​ការ​ប្រើប្រាស់​គីមី និងគុណសម្បត្តិនៃការប្រើប្រាស់គីមីផងដែរ៕ អត្ថបទ៖ គង់ រ៉េន