ផែនការងារនគរបាលព្រហ្មទណ្ឌ នៃស្នងការដ្ឋាននគរបាលរាជធានីប្រជុំពង្រឹងការថែរក្សាសន្តិសុខ សណ្តាប់ធ្នាប់ខែធ្នូ ឆ្នាំ២០២៥

ភ្នំពេញ ៖ ដោយទទួលបានការអនុញ្ញាតពី លោក ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កាលពីរសៀលថ្ងៃទី០៥ ខែធ្នូ ឆ្នាំ២០២៥ លោកឧត្តមសេនីយ៍ត្រី ប៊ុន សត្យា ស្នងការរងទទួលផែនការងារនគរបាលព្រហ្មទណ្ឌ និងលោកឧត្តមសេនីយ៍ទោ ញ៉ុង រស់មេត្តា ស្នងការរងទទួលដឹកនាំការិយាល័យនគរបាលអព្រហ្មទណ្ឌកម្រិតធ្ងន់ បានដឹកនាំកិច្ចប្រជុំបូកសរុបសភាពការណ៍ កិច្ចប្រតិបត្តិការរក្សាសន្តិសុខ សណ្តាប់ធ្នាប់សង្គមប្រចាំខែវិច្ឆិកា និងទិសដៅការងារខែធ្នូ ឆ្នាំ២០២៥ ពិសេសផ្តោតសំខាន់កិច្ចប្រតិបត្តិការទប់ស្កាត់ និងបង្ក្រាបក្រុមក្មេងទំនើង ក្នុងភូមិសាស្ត្ររាជធានីភ្នំពេញ ។

កិច្ចប្រជុំនេះ ដោយមានការចូលរួមពីលោកនាយការិយាល័យជំនាញទាំង ០៣រូប , លោកនាយរងការិយាល័យ និងលោកអធិការរងផែនការងារនគរបាលព្រហ្មទណ្ឌទាំង ១៤ខណ្ឌផងដែរ ។

លោកឧត្តមសេនីយ៍ត្រី ប៊ុន សត្យា ស្នងការរងទទួលផែនការងារនគរបាលព្រហ្មទណ្ឌ នៃស្នងការដ្ឋាននគរបាលរាជធានីភ្នំពេញ បានធ្វើការកោតសរសើរសមត្ថកិច្ចជំនាញ និង តាមបណ្តាអធិការដ្ឋានខណ្ឌទាំង ១៤ រយៈពេលកន្លងទៅនេះដែលបានបំពេញតួនាទីភារកិច្ច ខិតខំថែរក្សាសន្តិសុខ សណ្តាប់ធ្នាប់ សុវត្ថិភាពជូនប្រជាពលរដ្ឋបានល្អប្រសើរ ។

ជាមួយគ្នានេះ លោកឧត្តមសេនីយ៍ត្រី ប៊ុន សត្យា ក៏បានធ្វើការណែនាំកងកម្លាំងទាំងអស់ សូមបន្តតាមស្រាវជ្រាវ បង្រ្កាបមុខសញ្ញាសេសសល់ ដូចជា ករណីលួច ឆក់ ប្លន់ ចាប់ជំរិត និងក្រុមក្មេងទំនើងគ្រប់ប្រភេទ ជាងទៅទៀតសូមបន្តតាមចាប់ មុខសញ្ញាមានដីការ ក្នុងករណីលួច ឆក់ ប្លន់ ដើម្បីយកមកផ្តន្ទាទោសតាមច្បាប់ឲ្យអស់៕ តារាវុទ្ធី