លោកជំទាវបណ្ឌិត ពេជ ចន្ទមុន្នី អញ្ជើញផ្ដល់អំណោយពលរដ្ឋរងគ្រោះដោយគ្រោះធម្មជាតិជាង២ពាន់គ្រួសារនៅស្រុកព្រៃនប់

ព្រះសីហនុ៖ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានអចិន្ត្រៃយ៍កាកបាទក្រហមកម្ពុជា តំណាងដ៏ខ្ពង់ខ្ពស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានអញ្ជើញផ្ដល់អំណោយមនុស្សធម៌ ដល់ប្រជាពលរដ្ឋរងគ្រោះដោយសារគ្រោះធម្មជាតិចំនួនជាង ២ពាន់គ្រួសារ ក្នុងឃុំចំនួន៦ នៃស្រុកព្រៃនប់ ខេត្តព្រះសីហនុ ។

ក្នុងឱកាសជួបសំណេះសំណាល សួរសុខទុក្ខ និងផ្ដល់អំណោយមនុស្សធម៌ នៅថ្ងៃ៧ ខែធ្នូ ឆ្នាំ២០២៥ លោកជំទាវបណ្ឌិត បានសម្ដែងការសោកស្ដាយ ចំពោះបញ្ហាគ្រោះមហន្តរាយ ដែលបង្កឡើងដោយគ្រោះធម្មជាតិ មានខ្យល់កន្ត្រាក់នេះ បានប៉ះពាល់ផ្ទះប្រជាពលរដ្ឋ នៅក្នុងស្រុកព្រៃនប់ ក្នុងពេលកន្លងមកនេះ ។

លោកជំទាវបណ្ឌិត បានបន្តថា ទន្ទឹមនឹងបញ្ហាគ្រោះមហន្តរាយនេះ កាកបាទក្រហមកម្ពុជា ក្នុងនាមជាដៃគូជាមួយរាជរដ្ឋាភិបាលកម្ពុជា តែងតែគិតគូរ និងផ្ដល់អំណោយជូនពលរដ្ឋរងគ្រោះ ព្រោះបេសកកម្មរបស់ខ្លួន គឺប្រជាពលរដ្ឋមានការលំបាកនៅទីណា តែងតែមានកាកបាទក្រហមកម្ពុជាទៅជួយ ដោយគ្មានការរើសអើងជាតិសាសន៍ និន្នាការនយោបាយ ពណ៌សម្បុរ និងវណ្ណៈនោះទេ ។

លោកជំទាវបណ្ឌិត ពេជ ចន្ទមុន្នី បានបន្ថែមថា ជាការកត់សម្គាល់ នៅក្នុងឆ្នាំនេះ ខណៈដែលកម្ពុជាមានសង្គ្រាមជាមួយប្រទេសជិតខាង ហើយសកម្មភាពនៃកម្លាំងស្នេហាជាតិ ដែលមិនធ្លាប់ឃើញពីមុនមកនោះ កាកបាទក្រហមកម្ពុជា ក៏បានចុះសួរសុខទុក្ខប្រជាពលរដ្ឋភៀសសឹក ក៏ដូចជានាំយកអំណោយទាន់ពេលវេលា ទៅផ្ដល់ជូនពលរដ្ឋ ដើម្បីដោះស្រាយការលំបាកនៅពេលនោះ ។

ក្នុងឱកាសនោះ លកជំទាវបណ្ឌិតអនុប្រធានអចិន្ត្រៃយ៍ កាកបាទក្រហមកម្ពុជា បាននាំយកនូវការសួរសុខទុក្ខពីសំណាក់សម្ដេចតេជោ ហ៊ុន សែន ប្រធានព្រឹទ្ធសភា សម្ដេចកិត្តិព្រឹទ្ធបណ្ឌិត និងសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជូនប្រជាពលរដ្ឋ ។ ជាមួយនេះ លោកជំទាវបណ្ឌិត ក៏បានអំពាវនាវដល់ប្រជាពលរដ្ឋ បន្តគាំទ្រការដឹកនាំរបស់រាជរដ្ឋាភិបាលកម្ពុជា នាពេលបច្ចុប្បន្ន ហើយក៏សូមនាំគ្នាថែរក្សាសុខភាព ដោយមិនត្រូវបរិភោគប្រៃពេក ផ្អែមពេក និងកាត់បន្ថយបរិភោគអាហារដែលមានជាតិខ្លាញ់ច្រើន ។

ក្នុងពេលទទួលអំណោយ ប្រជាពលរដ្ឋបានបង្ហាញការរំភើបរីករាយ ចំពោះការយកចិត្តទុកដាក់ របស់សម្ដេចប្រធានកាកបាទក្រហមកម្ពុជា ដែលបានចាត់លោកជំទាវបណ្ឌិត ពេជ ចន្ទមុន្នី ចុះសួរសុខទុក្ខ និងផ្ដល់អំណោយផ្ទាល់ ដែលការគិតគូរមិនអាចកាត់ថ្លៃបាននេះ គឺជាអ្វីដែលស្របទៅតាមបេសកកម្ម របស់កាកបាទក្រហមកម្ពុជា ដែលមិនបោះបង់ពលរដ្ឋណាម្នាក់ឲ្យនៅឯកោ និងគ្មានអាហារបរិភោគ ។

ឯកឧត្តម ម៉ាង ស៊ីណេត អភិបាលខេត្តព្រះសីហនុ មានប្រសាសន៍ថា កាលពីខែវិច្ឆិកា ឆ្នាំ២០២៥ ស្រុកព្រៃនប់ មានករណីខ្យល់កន្ត្រាក់ បណ្ដាលឲ្យរំលំផ្ទះពលរដ្ឋ ១ខ្នង និងរបើកដំបូលជាង ២ពាន់ខ្នង ក្រៅពីនោះក៏មានប៉ះពាល់អគារសិក្សា និងប៉ុស្តិ៍រដ្ឋបាលឃុំផងដែរ ។

ក្នុងឱកាសនេះ ឯកឧត្តមអភិបាលខេត្ត បានថ្លែងអំណរគុណដល់សម្ដេចកិត្តិព្រឹទ្ធបណ្ឌិត និងលោកជំទាវបណ្ឌិត ដែលបានយកចិត្តទុកដាក់ និងផ្ដល់អំណោយដល់ប្រជាពលរដ្ឋ ដែលបានរងគ្រោះដោយសារគ្រោះធម្មជាតិ នៅក្នុងស្រុកព្រៃនប់នេះ ៕

អត្ថបទ បាន សុខរិទ្ធិ