កម្លាំងគណៈបញ្ជាការឯកភាពខណ្ឌ៧មករាបន្តចុះរៀបចំសណ្ដាប់ធ្នាប់របៀបរៀបរយនៅកំណាត់ផ្លូវលេខ១៦៤ ជាប់របងវិទ្យាល័យបាក់ទូក

ភ្នំពេញ៖ រដ្ឋបាលខណ្ឌ៧មករាក្រោមការដឹកនាំរបស់លោកថេង សុថុល អភិបាលនៃគណៈអភិបាលខណ្ឌតែងតែជំរុញដល់មន្ត្រីពាក់ព័ន្ធក្រោមឪវាទឲ្យចុះរៀបចំសណ្ដាប់ធ្នាប់របៀបរៀបរយតាមផ្លូវនៅក្នុងមូលដ្ឋានដើម្បីឲ្យមានបរិស្ថានអនាម័យសណ្ដាប់ធ្លាប់ល្អប្រសើរជូនដល់បងប្អូនប្រជាពលរដ្ឋអ្នកធ្វើដំណើរជាពិសេសគឺនៅតាមសាលារៀនជាដើម។

ជាក់ស្ដែងនារសៀលថ្ងៃទី០៧ ខែធ្នូឆ្នាំ ២០២៥ នេះ កម្លាំងគណៈបញ្ជាការឯកភាពខណ្ឌ៧មករា បានចុះរៀបចំសណ្ដាប់ធ្នាប់នៅកំណាត់ផ្លូវលេខ១៦៤ ជាប់របងវិទ្យាល័យបាក់ទូក មូលដ្ឋានសង្កាត់វាលវង់ ខណ្ឌ៧មករា ដែលកន្លងទៅកំណត់ដល់នេះបងប្អូនអាជីវករមួយចំនួនតែងតែយកផ្លូវធ្វើជាកន្លែងតាំងលក់បង្ករការកក់ស្ទះ បាត់បង់សណ្ដាប់ធ្នាប់។

កម្លាំងសណ្ដាប់ធ្នាប់នៃរដ្ឋបាលខណ្ឌ៧មករាបានបញ្ជាក់ថាកំណាត់ផ្លូវនេះកន្លងមកអាជ្ញាធរបានធ្វើសេចក្ដីណែនាំជូនដំណឹងនិងកិច្ចសន្យាជាច្រើនលើកច្រើនសារមកផងដែរក៏ប៉ុន្តែបងប្អូនអាជីវករមួយចំនួនហាក់មិនចូលរួមជាមួយអាជ្ញាធរនោះឡើយ។រហូតមកដល់ពេលនេះអាជ្ញាធរបានចាត់វិធានការមិនអនុញ្ញាតឲ្យបន្តយកផ្លូវធ្វើជាកន្លែងតាំងលក់បង្កការកកស្ទះបន្តទៀតនោះទេ នឹងបានយករនាំងដែកខ្សែរនៅកំណាត់ផ្លូវលេខ១៦៤ ដើម្បីរក្សាបានសណ្ដាប់ធ្នាប់ល្អនៅជុំវិញសាលារៀន កាត់បន្ថយការកក់ស្ទះ និងសោភ័ណភាពតាមដងផ្លូវផងដែរ។

សូមបញ្ជាក់ថាក្រោយមានការរៀបចំកំណាត់ផ្លូវលេខ១៦៤ជាប់របងវិទ្យាល័យបាក់ទូក សង្កេតឃើញថាមានសភាពស្រឡះល្អ បងប្អូនប្រជាពលរដ្ឋងាយស្រួលក្នុងការធ្វើដំណើរជាពិសេសពេលសិស្សានុសិស្សចេញពីសាលាក៏កាត់ថយការកកស្ទះបានល្អប្រសើរផងដែរ។

ជាចុងក្រោយកម្លាំងអាជ្ញាធរនៃរដ្ឋបាលខណ្ឌ៧មករាបានបញ្ជាក់ថាអាជ្ញាធរបន្តធ្វើដូចភ្លៀងរលឹមនៅតាមផ្លូវផ្សេងៗបន្តទៀតនៅក្នុងមូលដ្ឋានដើម្បីរក្សាបានសណ្ដាប់ធ្នាប់បរិស្ថានអនាម័យល្អនៅក្នុងមូលដ្ឋានទាំងមូលតែម្ដង យោងតាមការណែនាំចង្អុលបង្ហាញពីរដ្ឋបាលរាជធានីភ្នំពេញ៕

អត្ថបទ ៖កុម្ភៈ