ឯកឧត្តម វង សូត៖ និស្សិតជាចំណែកមួយដ៏សំខាន់ក្នុងការអភិវឌ្ឍសង្គមជាតិ

ឯកឧត្តម វង សូត អនុប្រធានទី២ រដ្ឋសភា តំណាងដ៏ខ្ពង់ខ្ពស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា នារសៀលថ្ងៃទី៨ ខែធ្នូ ឆ្នាំ២០២៥ បានអនុញ្ញាតឱ្យក្រុមនិស្សិតជ័យលាភីអាហារូបករណ៍ណូវែលហ្សេឡង់សម្រាប់ឆ្នាំសិក្សា២០២៥ ចំនួន៣០នាក់ ចូលជួបសម្តែងកាការគួរសម និងទទួលអនុសាសន៍ មុនពេលចេញទៅបន្តការសិក្សានៅប្រទេសនូវែលហ្សេឡង់ នាពេលខាងមុខ នៅវិមានរដ្ឋសភា។ ឯកឧត្តម វង សូត បានសម្តែងការអបអរសាទរ និងបង្ហាញនូវមោទនភាព ចំពោះនិស្សិតទាំងអស់ និងក្រុមគ្រួសារដែលទទួលបានជ័យលាភីអាហារូបករណ៍របស់រដ្ឋាភិបាលនូវែលហ្សេឡង់ គឺជាអាហារូបករណ៍មួយដែលមានការប្រកួតប្រជែងកម្រិតខ្ពស់។ ឯកឧត្តម សង្ឃឹមថា ក្រុមនិស្សិតទាំងអស់ នឹងជាចំណែកមួយដ៏សំខាន់ក្នុងការរួមចំណែកកសាង និងអភិវឌ្ឍធនធានមនុស្ស សម្រាប់អភិវឌ្ឍសង្គមជាតិនាពេលអនាគត។

ឯកឧត្តម វង សូត ក៏បានណែនាំឱ្យនិស្សិតទាំងអស់ ត្រូវប្រឹងប្រែងរៀនសូត្រ ក្រេបយកចំណេះដឹង និងបទពិសោធល្អៗពីបណ្ដាប្រទេសទាំងនោះ ដើម្បីកសាងសមត្ថភាពរបស់ខ្លួនចូលរួមអភិវឌ្ឍសង្គម និងសេដ្ឋកិច្ចកម្ពុជា។ យុវជន សិស្សនិស្សិត មានតួនាទីក្នុងការផ្សារភ្ជាប់ទំនាក់ទំនងកម្ពុជា-ណូវែលហ្សេឡង់ ហើយក៏ជាទូតសុច្ឆន្ទៈតំណាងប្រទេស ដើម្បីផ្សព្វផ្សាយអំពីពីវប្បធម៌ អរិយធម៌ អត្តសញ្ញាណជាតិ និងសក្តានុពលវិស័យទេសចរណ៍កម្ពុជា ទៅកាន់ពិភពលោក តាមរយៈស្នាមញញឹម ភាពរួសរាយរាក់ទាក់ ដើម្បីបង្កើនភ្ជាប់ទំនាក់ទំនងប្រជាជននិងប្រជាជន ក្នុងការទាក់ទាញអ្នកទេសចរ ឱ្យមកកាន់កម្ពុជាច្រើនបន្ថែមទៀត។

ឯកឧត្តម បានលើកឡើងថា ប្រទេសនូវែលហ្សេឡង់ ផ្តល់អាហារូបករណ៍ជារៀងរាល់ឆ្នាំដល់និស្សិត និងមន្ត្រីរាជការកម្ពុជា ទាំងរយៈពេលវែង បរិញ្ញាបត្រជាន់ខ្ពស់ បណ្ឌិត និងវគ្គបណ្តុះបណ្តាលរយៈពេលខ្លីលើប្រធានបទជាច្រើន ដូចជា អប់រំ អភិបាលកិច្ចល្អ ការប្រែប្រួលអាកាសធាតុ គោលនយោបាយ សាធារណៈ និងភាសាអង់គ្លេសជាដើម ។ ចាប់ពីឆ្នាំ២០០៥ រហូតដល់ឆ្នាំ២០២៦ និស្សិតកម្ពុជា ចំនួន ៤៤៧ នាក់ បានទទួលអាហារូបករណ៍ទៅបន្តការសិក្សាថ្នាក់បរិញ្ញាបត្រជាន់ខ្ពស់ និងបណ្ឌិត នៅប្រទេសណូវែលសេឡង់។ មន្ត្រីនៃអគ្គលេខាធិការដ្ឋានរដ្ឋសភា ក៏តែងទទួលបានអាហារូបករណ៍ទៅសិក្សាវគ្គខ្លី និងវគ្គបណ្តុះបណ្តាលភាសាអង់គ្លេសផងដែរ៕