ពលរដ្ឋជាង២ពាន់នាក់បានស្ម័គ្រចិត្តមកចូលរួមបរិច្ចាគឈាមជួយវីរកងទ័ពជួរមុខ និងពលរដ្ឋនៅព្រំដែន

នៅព្រឹកថ្ងៃទី៩ ខែធ្នូ ឆ្នាំ២០២៥នេះ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អញ្ជើញចុះសំណេះសំណាលដោយផ្ទាល់ជាមួយបងប្អូនប្រជាពលរដ្ឋជាង២ពាន់នាក់ដែលបានស្ម័គ្រចិត្តមកបរិច្ចាគឈាមជួយដល់វីរកងទ័ពជួរមុខ និងប្រជាជននៅតាមព្រំដែននៅសាកលវិទ្យាល័យការពារជាតិស្ថិតក្នុងខណ្ឌឬស្សីកែវ រាជធានីភ្នំពេញ។

សមាគមគ្រូពេទ្យយុវជនសម្តេចតេជោ (TYDA) បាននិងកំពុងចូលរួមយ៉ាងសស្រាក់សស្រាំក្នុងការសម្របសម្រួល និងអនុវត្តបច្ចេកទេសបូមឈាមរបស់បងប្អូនខ្មែរដែលស្ម័គ្រចិត្តបរិច្ចាគ ក្នុងស្មារតីខ្មែរតែមួយជួយដល់កម្លាំងកងទ័ពជួរមុខដែលកំពុងប្រយុទ្ធយ៉ាងអង់អាចក្លាហានការពារបូរណភាពទឹកដីកម្ពុជាពីសត្រូវសៀមឈ្លានពានចាប់តាំងពីថ្ងៃទី៧ ខែធ្នូ ឆ្នាំ២០២៥មកទល់នឹងពេលនេះ។

សូមបញ្ជាក់ថា ដើម្បីជាកម្លាំងចិត្តជួយដល់កងទ័ពជួរមុខ និងប្រជាជននៅតាមព្រំដែន ក៏ដូចជាការរួមចំណែកក្នុងការថែរក្សាការពារបូរណភាពទឹកដីកម្ពុជាយើង ប្រយុទ្ធនឹងសត្រូវ សៀម បងប្អូនប្រជាពលរដ្ឋខ្មែរបានរួបរួមសាមគ្គីគ្នា ចូលរួមចំណែក តាមរយៈការបរិច្ចាគឈាមដោយស្ម័គ្រចិត្តយ៉ាងច្រើនកុះករនៅថ្ងៃនេះ។ ក្នុងកាលៈទេសៈដែលប្រទេសជាតិទទួលរងការឈ្លានពាន គឺជាពេលដែលខ្មែរត្រូវរួបរួមជាងពេលណាទាំងអស់។

បងប្អូនប្រជាពលរដ្ឋដែលជាសមរភូមិជួរក្រោយ បានរួមចិត្ត រួមកម្លាំង និងរួមស្មារតី ផ្ដល់ជាកម្លាំងចិត្តដល់វីរកងទ័ពកម្ពុជា កងកម្លាំងប្រដាប់អាវុធ កងកម្លាំងជួរមុខ ដែលកំពុងឈរជើងយ៉ាងអង់អាច ក្លាហានដើម្បីការពារបូរណភាពទឹកដីពីការឈ្លានពានរបស់ប្រទេសជិតខាង។ ទន្ទឹមនឹងនេះ យើងជឿជាក់យ៉ាងមុតមាំលើកិច្ចខិតខំប្រឹងប្រែង ការដឹកនាំ ព្រមទាំងចំណាត់ការរបស់រាជរដ្ឋាភិបាលកម្ពុជា ក្នុងការដោះស្រាយបញ្ហាប្រកបដោយភាពឈ្លាសវៃ និងចាស់ទុំ ក្នុងការការពារអធិបតេយ្យជាតិ និងបូរណភាពដែនដី មិនឱ្យមានការរំលោភបំពាន ទោះក្នុងតម្លៃណាក៏ដោ៕