ការឈ្លានពានរបស់ថៃបណ្ដាលឱ្យពលរដ្ឋស៊ីវិលកម្ពុជាស្លាប់១៥នាក់ ភៀសសឹកកើនជាង៤០ម៉ឺននាក់

ភ្នំពេញ ៖ ត្រឹមម៉ោង ២ រសៀលនេះ ការឈ្លានពានរបស់យោធាថៃមកលើទឹកដីកម្ពុជា និងយកជនស៊ីវិល ជាគោលដៅវាយប្រហារផង ធ្វើឱ្យជនស៊ីវិលស្លាប់ ១៥ នាក់ និងរបួស ៧៣ នាក់។ ជនភៀសសឹកចំនួន ៤០៩ ២៩៣ នាក់។

​ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាលកម្ពុជា តាមរយៈសន្និសីទសារព័ត៌មាននៅរសៀលថ្ងៃទី១៥ ខែធ្នូនេះ បានប្រកាសថ្កោលទោសយ៉ាងខ្លាំងខ្លាំងបំផុតចំពោះទង្វើសាហាវព្រៃផ្សៃរបស់យោធាថៃមកលើជនស៊ីវិលស្លូតត្រង់កម្ពុជា និងបានអំណាវនាវដល់សហគមន៍អន្តរជាតិដាក់សម្ពាធទៅលើប្រទេសថៃឱ្យបញ្ឈប់សកម្មភាពអមនុស្សធម៌របស់ខ្លួនជាបន្ទាន់ និងបង្ខំឱ្យប្រទេសនេះងាកមករកដំណោះស្រាយដោយសន្ដិវិធីជាចាំបាច់។

ឯកឧត្តមបានបន្តថា សកម្មភាពឈ្លានពានរបស់យោធាថៃមកលើដែនអធិបតេយ្យភាពរបស់កម្ពុជា ដោយប្រើប្រាស់អាវុធធន់ធ្ងន់គ្រប់ប្រភេទ ដូចជាយន្តហោះចម្បាំង F-16 គ្រាប់បែកចង្កោម ការបាញ់ផ្សែងពុលមលើកងទ័ព និងប្រជាជនស៊ីវិលកម្ពុជា បានកើនឡើងជាលំដាប់ ដែលនេះបញ្ជាក់យ៉ាងច្បាប់អំពីមហិច្ឆិកាល្មោភសង្គ្រាមរបស់ភាគីថៃមកលើដែនអធិបតេយ្យភាពកម្ពុជា។

សូមបញ្ជាក់ថា តាមរយៈសារសង្គ្រាមឈ្លានពានវាតទីទឹកដីរបស់រដ្ឋាភិបាលក្រុងបាងកក និងយោធាថៃ គិតចាប់ពីរសៀលថ្ងៃទី៧ ខែធ្នូ មលដល់ម៉ោង២រសៀលថ្ងៃទី១៥ ខែធ្នូនេះ បានបណ្តាលឱ្យប៉ះពាល់យ៉ាងធ្ងន់ធ្ងរលើសុវត្ថិភាពប្រជាពលរដ្ឋ និងតំបន់ស៊ីវិលកម្ពុជាក្នុងខេត្តជាប់ព្រំដែនកម្ពុជា-ថៃ ក្នុងនោះពលរដ្ឋស្លាប់មានចំនួន១២នាក់ របួសចំនួន៧៤នាក់។ ចំណែកពលរដ្ឋភៀសសឹក ក្នុងខេត្តព្រះវិហារ ឧត្តរមានជ័យ បន្ទាយមានជ័យ បាត់ដំបង ពោធិ៍សាត់ កោះកុង និងខេត្តសៀមរាប មានកើនឡើងដល់ ១២០,៨១៤គ្រួសារ ស្មើនឹងមនុស្ស ៤០៣,៦០១នាក់ ក្នុងនោះស្ត្រីប្រមាណ ២សែន ៨ពាន់ នាក់ និងកុមារប្រមាណ ៩ម៉ឺន ៦ពាន់នាក់៕