ឧបនាយករដ្ឋមន្ដ្រី ហ៊ុន ម៉ានី៖ កម្ពុជា-ចិន បន្ដឈរជាមួយគ្នា គ្រប់កាលៈទេសៈ ទាំងក្នុងតំបន់ និងអន្ដរជាតិ

ឧបនាយករដ្ឋមន្ដ្រី ហ៊ុន ម៉ានី រដ្ឋមន្ដ្រីក្រសួងមុខងារសាធារណៈ នៅថ្ងៃទី១៥ ខែធ្នូ ឆ្នាំ២០២៥នេះ បានលើកឡើងថា កម្ពុជា-ចិន បន្ដឈរជាមួយគ្នា គ្រប់កាលៈទេសៈ និងធ្វើការយ៉ាងជិតស្និត ដើម្បីជំរុញកិច្ចសហប្រតិបត្ដិការ ទាំងនៅក្នុងឆាកតំបន់ និងអន្ដរជាតិ។

ការលើកឡើងបែបនេះ ធ្វើឡើងក្នុងឱកាសដែល ឧបនាយករដ្ឋមន្ដ្រី ហ៊ុន ម៉ានី តំណាងសម្ដេចបវធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា អញ្ជើញចូលរួម ក្នុងមហោស្រពមិត្ដភាព កម្ពុជា-ចិន លើកទី២ «មិត្ដភាពដ៏រឹងមាំគ្រប់រដូវកាល ផ្សារភ្ជាប់បេះដូងប្រជាជន និងប្រជាជន» នាព្រឹកថ្ងៃទី១៥ ខែធ្នូ ឆ្នាំ២០២៥។

ឧបនាយករដ្ឋមន្ដ្រី ហ៊ុន ម៉ានី បានបញ្ជាក់យ៉ាងដូច្នេះថា «ប្រទេសយើងទាំងពីរ (កម្ពុជា-ចិន) បន្ដឈរជាមួយគ្នា គ្រប់កាលៈទេសៈ និងធ្វើការយ៉ាងជិតស្និត ដើម្បីជំរុញកិច្ចសហប្រតិបត្ដិការ និងពង្រឹងផ្នែកឯករាជ្យភាព និងកិត្យានុភាពខ្លួន នៅក្នុងឆាកតំបន់ និងអន្ដរជាតិ»។

ឧបនាយករដ្ឋមន្ដ្រី ហ៊ុន ម៉ានី បានថ្លែងថា ក្នុងនាមរាជរដ្ឋាភិបាល និងប្រជាជនកម្ពុជា សូមថ្លែងអំណរគុណយ៉ាងជ្រាលជ្រៅ ចំពោះរដ្ឋាភិបាល និងប្រជាជនចិន ដែលតែងតែគាំទ្រមាគ៌ា អភិវឌ្ឍន៍របស់កម្ពុជា ស្របតាមលក្ខខណ្ឌជាតិខ្លួន ហើយកម្ពុជាតែងតែគាំទ្រ នូវគំនិតផ្ដួចផ្ដើមនេះ របស់មិត្ដចិនដូចគ្នាផងដែរ។

ទន្ទឹមគ្នានេះ ឧបនាយករដ្ឋមន្ដ្រី ហ៊ុន ម៉ានី ក៏សូមថ្លែងអំណរគុណ ចំពោះការគាំទ្រ និងការចូលរួមរបស់ប្រទេសចិន ក្នុងការរួមចំណែកសម្របសម្រួល ដល់ជម្លោះព្រំដែនរវាងកម្ពុជា និងថៃ នាពេលកន្លងទៅផងដែរ។

ឧបនាយករដ្ឋមន្ដ្រី ហ៊ុន ម៉ានី បានលើកឡើងថា ជាអកុសលនាពេលថ្មីៗនេះ ស្ថានការណ៍បានវិវត្ដ នូវស្ថានភាពអាក្រក់សារជាថ្មី ស្មារតី ទឹកចិត្ដ និងអារម្មណ៍របស់ប្រជាជនខ្មែរគ្រប់រូប ស្ថិតនៅជុំវិញស្ថានការណ៍ ដែលកាន់តែតាន់តឹង បណ្ដាលមកពីការផ្ទុះអាវុធ តាមបណ្ដោយបន្ទាន់ព្រំដែន រវាងកម្ពុជា-ថៃ។

ជាមួយគ្នានេះ ឧបនាយករដ្ឋមន្ដ្រី ហ៊ុន ម៉ានី ក៏បានគូសបញ្ជាក់អំពីការប្ដេជ្ញាចិត្ដឥតងាករេ និងជំហរប្រកបដោយភាពម្ចាស់ការជាក់លាក់ សុច្ឆន្ទៈ និងការទទួលខុសត្រូវខ្ពស់របស់កម្ពុជា ពុះពារស្វែងរកដំណោះស្រាយ ដែលត្រឹមត្រូវមាគ៌ាសន្ដិភាព សម្រាប់រយៈពេលវែង។

ឧបនាយករដ្ឋមន្ដ្រី ហ៊ុន ម៉ានី ជឿជាក់ថា សហគមន៍អន្ដរជាតិ ជាពិសេសមិត្ដចិន នឹងបន្ដចូលរួម ហើយភាគីកម្ពុជា-ភាគីថៃ នឹងងាកមករកនូវកិច្ចព្រមព្រៀងបទឈប់បាញ់ និងសេចក្ដីថ្លែងការណ៍រួម ស្ដីពីការព្រមព្រៀងសន្ដិភាព និងកាតព្វកិច្ចទាំងឡាយ ក្រោមច្បាប់អន្ដរជាតិ ឲ្យបានម៉ឺងម៉ាត់ និងស្មោះត្រង់។

លោក វ៉ាង វិនពីន ឯកអគ្គរដ្ឋទូតចិនប្រចាំកម្ពុជា បានលើកឡើងថា ចំណងមិត្ដភាពចិន-កម្ពុជា ជាចំណងមិត្ដភាពឆ្លងកាត់រាប់ពាន់ឆ្នាំ ក្នុងប្រវិត្ដសាស្ដ្រនេះ ហើយអរិយធម៌ចិន និងអរិយធម៌ខ្មែរ មានការរៀនសូត្រគ្នាទៅវិញទៅមក។

ឯកអគ្គរដ្ឋទូតចិនប្រចាំកម្ពុជា បានបន្ថែមទៀតថា ក្នុងអំឡុងពេលកន្លងមកនេះ ក្រោមការយកចិត្ដទុកដាក់ របស់ថ្នាក់ដឹកនាំចិន និងកម្ពុជា គឺទទួលបានការអភិវឌ្ឍន៍យ៉ាងល្អប្រសើរ រវាងប្រទេសទាំងពីរ៕