ពលរដ្ឋខ្មែរជាប់ខ្សែស្រឡាយចិន បន្តនាំគ្នាទៅកាត់ឆុង ដើម្បីរំដោះគ្រោះចង្រៃ និង​បួងសួង​សុំសេចក្តីសុខ

ប្រជាពលរដ្ឋខ្មែរជាប់ខ្សែស្រឡាយកាត់ចិន បានបន្តនាំគ្នាទៅកាត់ឆុង ដើម្បីរំដោះគ្រោះ​ឧបទ្រប់​ចង្រៃ និងអ៊ុចធូបសពះបន់ស្រន់បួងសួងសុំសេចក្តីសុខចម្រើន ។

ជារៀងរាល់ឆ្នាំ ឱ្យតែគៀកចូលដល់រដូវបុណ្យចូលឆ្នាំប្រពៃណីចិន-វៀតណាម គេ​តែង​សង្កេត​ឃើញ​មាន​បង​ប្អូនប្រជាពលរដ្ឋខ្មែរកាត់ចិនជាច្រើន តែងបាននាំគ្នាយកគ្រឿងដង្វាយផ្សេងៗ យក​ទៅ​សែន​ព្រេន ដើម្បីកាត់គ្រោះនៅទីសក្ការះ លើតំបន់រមណីយដ្ឋានប្រវត្តិសាស្ត្រវត្តភ្នំ ស្ថិត​ក្នុង​សង្កាត់​វត្ត​ភ្នំ ខណ្ឌដូនពេញ រាជធានីភ្នំពេញ ។

ពលរដ្ឋខ្សែស្រឡាយចិនលើកឡើងថា  នេះជា​ការ​សែន​ព្រេន​តាម​ទំនៀម​ទម្លាប់​ប្រពៃណី​របស់​ដូនតា ​តាមបែបសាសនាប្រពៃណីចិន ដែលជាការសែនព្រេនកាត់ផ្តាច់នូវគ្រោះចង្រៃចោល និង​តប​សង​មក​វិញ​នូវរឿងល្អៗចូលមកក្នុងជីវិត ទាំងការរស់នៅ ការប្រកបកិច្ចការងារ រួម​ទាំង​ការ​រក​ស៊ី​ទទួល​ទាន​ជាដើម។

សូមបញ្ជាក់ថា បុណ្យចូលឆ្នាំប្រពៃណីចិនវៀតណាម នឹងប្រព្រឹត្តិទៅរយៈពេល០៤ថ្ងៃ គិត​ពី​ថ្ងៃ​ទី​១៦ ដល់ថ្ងៃទី១៩ ខែកុម្ភៈ ឆ្នាំ២០២៦ ដែលបុណ្យនេះ គឺជាពេលវេលាដែលពលរដ្ឋកម្ពុជា មាន​ឈាម​ជ័រ​ជាប់ខ្សែ​ស្រឡាយកាត់ចិន ក៏នឹងចូលរួមរៀបចំពិធីសែនជូនដូនតា ដើម្បីសុំសេចក្តី​សុខ​សប្បាយ ​និងសុំពរជ័យឱ្យរកស៊ីទទួលទានកាន់តែរីកចម្រើន តាមបែបលក្ខណះគ្រួសាររៀងៗខ្លួន ៕ អត្ថបទ ៖ លីហេង